Ithekge Ka Moya Wa Modimo Ge O Swaragana Le Diphetogo Tša Bophelo

“Se O swanetšexo xo se phêxêlêla ké xore Modimo a bônê Ò le mmotexi.”—2 TIMOTHEO 2:15.

1. Ke diphetogo dife tšeo di hlohlago boemo bja rena bjo bobotse bja moya?

LEFASE leo le re dikologilego le fetoga ka go se kgaotše. Re bona tšwelopele e kgahlišago ya thutamahlale le ya thekinolotši yeo e sepedišanago le go phuhlama mo gogolo ga ditekanyetšo tša boitshwaro. Bjalo ka ge re ahla-ahlile se sehlogong se se fetilego, Bakriste ba swanetše go ganetša moya o lwantšhanago le Modimo wa lefase le. Lega go le bjalo, ge lefase le dutše le fetoga, le rena re fetoga ka ditsela tše dintši. Re tloga bjaneng go ya go beng batho ba bagolo. Re ka hwetša goba ra lahlegelwa ke lehumo, boemo bjo bobotse bja tša maphelo le baratiwa. Diphetogo tše bjalo tše dintši ke tšeo re ka se kgonego go di laola, gomme di ka re tlišetša ditlhohlo tše difsa le tšeo di boifišago boemong bja rena bjo bobotse bja moya.

2. Bophelo bja Dafida bo ile bja fetoga bjang?

² Batho ba mmalwa ba lebeletšana le diphetogo tše bjalo tše dikgolo maphelong a bona go swana le Dafida, morwa wa Isai. Dafida o ile a fetoga kapejana go tloga go beng motho feela e le mošemane wa modiši go ya go beng nkgwete e tumilego ya setšhaba. Ka morago o ile a ba moneneri, a tsongwa bjalo ka phoofolo ke kgoši yeo e nago le lehufa. Ka morago ga moo, Dafida o ile a ba kgoši le mofenyi. O ile a kgotlelela ditla-morago tše bohloko tša sebe se segolo. O ile a lebeletšana le masetla-pelo le go arogana ga lapa la gagwe. O ile a ba le lehumo, a gola gomme a lebeletšana le mahlaba a botšofadi. Lega go le bjalo, go sa šetšwe diphetogo tše dintši bophelong bja gagwe, Dafida o ile a bontšha go holofela le go bota Jehofa le moya wa Gagwe bophelong ka moka. O ile a dira sohle seo a ka se kgonago go ipontšha e “le mmotexi,” gomme Modimo o ile a mo šegofatša. (2 Timotheo 2:15) Gaešita le ge maemo a rena a fapana le a Dafida, re ka ithuta tseleng yeo a ilego a swaragana le ditaba bophelong bja gagwe. Mohlala wa gagwe o ka re thuša go kwešiša kamoo re ka tšwelago pele re hwetša thušo ya moya wa Modimo ge re dutše re lebeletšana le diphetogo maphelong a rena.

Boikokobetšo bja Dafida—Mohlala o Mobotse

3, 4. Dafida o ile a tloga bjang go beng mošemane wa modiši go ya go beng motho yo a tumilego nageng ya gabo?

³ Ge e be e le mošemane, Dafida o be a sa tuma gaešita le ka lapeng la gabo. Ge moporofeta Samuele a be a e-tla Betlelehema, tatago Dafida o ile a tliša barwa ba šupago ba barwa ba gagwe ba seswai. Dafida, e lego morwa yo monyenyane, o ile a tlogelwa gore a diše dinku tša bona. Lega go le bjalo, Jehofa o be a kgethile Dafida go ba kgoši ya nakong e tlago ya Isiraele. Dafida o ile a bitšwa a le madišong. Se se latelago, pego ya Beibele e re: “Samuele a swara lenaka la makhura a mo tlotša bana babô bà le xôna. Mohla woo môya wa Modimo wa tlêla Dafida wa dula mo xo yêna.” (1 Samuele 16:12, 13) Dafida o ile a ithekga ka moya woo bophelo bja gagwe ka moka.

⁴ Go se go ye kae mošemane yo wa modiši o be a tla tuma nageng ya gabo. O ile a bitšwa gore a tlo hlankela kgoši le go e leletša mmino. O ile a bolaya Goliata wa mohlabani, senatla seo se boifišago kudu moo e lego gore gaešita le mašole ao a nago le phihlelo a Isiraele a be a boifa go lebeletšana le sona. Ge a kgethilwe go eta banna ba ntwa pele, Dafida o ile a lwa le ba-Filisita ka katlego. Batho ba ile ba mo rata. Ba ile ba hlama dikopelo tšeo di mo retago. Pejana, moeletši wa Kgoši Saulo o ile a hlalosa Dafida yo monyenyane e sego feela a “tseba xo letša” harepa eupša gape e le “seôká, e bile [e le] moxale thlabanong, maitse ’a ditaba, monna wa senatla.”—1 Samuele 16:18; 17:23, 24, 45-51; 18:5-7.

5. Ke’ng seo se ka bago se ile sa dira gore Dafida a ikgantšhe, gomme re tseba bjang gore ga se a ka a ba bjalo?

⁵ Botumo, bobotse, bofsa, go ba sethakga polelong, bokgoni bja mmino, bokgoni bja tša bohlabani, go thekgwa ke Modimo—go be go bonagala Dafida a e-na le dilo tše ka moka. Selo le ge e le sefe sa dilo tše se ka ba se ile sa mo dira gore a ikgantšhe, lega go le bjalo ga go le se tee sa tšona seo se ilego sa dira gore a be bjalo. Ela hloko karabo ya Dafida go Kgoši Saulo, yoo a ilego a neela morwedi wa gagwe go Dafida gore a mo nyale. Dafida o ile a bolela ka boikokobetšo bja kgonthe gore: “Ké nna mang? Bophelô bya-ka ké eng? Le moloko wa tate mo xo Isiraele ké selô mang xe nka ba mokxônyana wa kxoši?” (1 Samuele 18:18) Seithuti se sengwe ge se bolela ka temana ye se ngwadile gore: “Dafida o be a sa bolele gore ke ka baka la ditshwanelego tša motho goba ka baka la maemo a gagwe, goba ka baka la leloko la gagwe moo a ka ipolelago gore o swanelwa ke go ba mokgonyana wa kgoši.”

6. Ke ka baka la’ng re swanetše go hlagolela boikokobetšo?

⁶ Boikokobetšo bja Dafida bo be bo theilwe go lemogeng ga gagwe gore Jehofa ke yo a phagamego kudu ka tsela le ge e le efe go feta batho bao ba sa phethagalago. Dafida o ile a makatšwa le ke gore Modimo o ela motho hloko. (Psalme 144:3) Le gona Dafida o be a tseba gore bogolo le ge e le bofe bjo a ka bago a e-na le bjona e be e le feela ka baka la ge Jehofa a ile a bontšha boikokobetšo, a ipea boemong bja tlase bakeng sa go mo thekga, go mo šireletša le go mo hlokomela. (Psalme 18:35) A thuto e botse gakaakang bakeng sa rena! Ditalente tša rena, dilo tšeo re di fihleletšego le ditokelo tša rena le ka mohla ga se tša swanela go re dira gore re ikgogomoše. Moapostola Paulo o ngwadile gore: “O swere eng se O sa kaxo wa se fiwa? Xomme xe O filwe, O re’ng xe O ikxodiša wa e a rexo: Nna xa k’a fiwa?” (1 Ba-Korinthe 4:7) E le gore re hwetše moya o mokgethwa wa Modimo le go thabela go amogelwa ke yena, re swanetše go hlagolela le go kgomarela boikokobetšo.—Jakobo 4:6.

“Le se kê la Itefeletša”

7. Ke sebaka sefe sa go bolaya Kgoši Saulo seo se ilego sa itšweletša go Dafida?

⁷ Gaešita le ge botumo bja Dafida bo se bja ka bja tsoša boikgantšho le ge e le bofe ka pelong ya gagwe, bo ile bja tšweletša lehufa le le bolayago go Kgoši Saulo, yoo moya wa Modimo o bego o tšwile go yena. Gaešita le ge Dafida a be a sa dira phošo, o ile a tšhaba e le gore a phološe bophelo bja gagwe gomme a dula lešokeng. Tiragalong e nngwe, ge Kgoši Saulo a be a nyaka Dafida ka go se hwe matwa, o ile a tsena ka legageng, a sa tsebe gore Dafida le bagwera ba gagwe ba be ba ikutile ka fao. Banna ba Dafida ba ile ba mo kgothaletša go diriša sebaka seo go bego go bonagala Modimo a mo neile sona sa go bolaya Saulo. Re ka ba bona ka leihlo la kgopolo ba le ka lefsifsing gomme ba sebela Dafida gore: “O k’O bônê; ké lôna ’tšatši ’le Morêna a le boletšexo mola a re: Tseba xore lenaba la xaxo ke tlo le neêla seatleng sa xaxo, xore O le dirê ka mo O rataxo.”—1 Samuele 24:3-7.

8. Ke ka baka la’ng Dafida a ile a ithiba gore a se ke a itefeletša?

⁸ Dafida o ile a gana go gobatša Saulo. A bontšha tumelo le go se fele pelo, o be a kgotsofaletše go tlogela ditaba ka diatleng tša Jehofa. Ka morago ga ge kgoši e tšwele ka legageng, Dafida o ile a e goeletša gomme a re: “Nna le wêna re tlo ahlolêlwa ke Morêna; xomme Morêna ó tlo ntefeletša xo wene; xe e le sa-ka seatla se ka se Xo dirê selô.” (1 Samuele 24:13) Gaešita le ge a be a tseba gore Saulo o be a fošitše, Dafida ga se a ka a itefeletša; le gona ga se a ka a bolela le Saulo gampe goba go bolela ka yena gampe. Mabakeng a mangwe gape a mmalwa, Dafida o ile a ithibela go itšeela molao matsogong. Go e na le moo, o ile a ithekga ka Jehofa gore a lokiše ditaba.—1 Samuele 25:32-34; 26:10, 11.

9. Ke ka baka la’ng re sa swanela go itefeletša ge e ba re lebeletšana le kganetšo goba tlaišo?

⁹ Ka go swana le Dafida, o ka ikhwetša o le maemong a thata. Mohlomongwe o ganetšwa goba o tlaišwa ke bao o tsenago le bona sekolo, bao o šomago le bona, ditho tša lapa goba ba bangwe bao ba sego tumelong ya gago. O se ke wa itefeletša. Letela Jehofa, o kgopele moya wa gagwe o mokgethwa gore o go thuše. Mohlomongwe bona bao ba sa dumelego ba tla kgahlišwa ke boitshwaro bja gago bjo bobotse gomme e tla ba badumedi. (1 Petro 3:1) Go sa šetšwe gore go diragala eng, kgonthišega gore Jehofa o bona boemo bja gago gomme o tla dira selo se itšego ka bjona ka nako ya gagwe e beilwego. Moapostola Paulo o ngwadile gore: “Baratwa ba-ka! Le se kê la itefeletša; šuthêlang boxale bya Modimo; xobane xo ngwadilwe xwa thwe: Tefetšô ké ya-ka, le kôtlô ké ya-ka, O r’yalo Morêna.”—Ba-Roma 12:19.

“Theetša Tayo”

10. Dafida o ile a wela bjang sebeng, gomme o ile a leka go se uta bjang?

¹⁰ Nywaga e ile ya feta. Dafida o ile a ba kgoši e rategago ya go tuma kudu. Bophelo bja gagwe bja potego e kgahlišago kudu, gotee le dipsalme tše dibotse tšeo a di ngwadilego ge a be a tumiša Jehofa, di ka nea gabonolo kgopolo ya gore yo e be e le monna yoo le ka mohla a ka se welego sebeng se segolo. Lega go le bjalo, o ile a wela sebeng se segolo. Ka letšatši le lengwe, ge kgoši e be e le godimo ga tlhaka ya ngwako wa yona e ile ya bona mosadi yo mobotse a hlapa. E ile ya botšiša ka yena. Ge a tsebile gore mosadi yoo e be e le Batseba le gore monna wa gagwe Uria o be a ile ntweng, Dafida o ile a mmitša gomme a robala le yena. Ka morago, o ile a tseba gore o be a imile. Ye e be e tla ba taba ya dihlong gakaakang ge e ba e be e ka utollwa! Ka tlase ga molao wa Moše, kotlo ya bohlotlolo e be e le polao. Go bonagala kgoši e ile ya nagana gore sebe se se be se ka utwa. Ka gona e ile ya romela molaetša madireng, ya laela gore Uria a boe Jerusalema. Dafida o be a holofetše gore Uria o tla fetša bošego le Batseba, eupša seo ga se sa ka sa direga. Ga bjale a tlaletšwe, Dafida o ile a romela Uria morago go boela ntweng le lengwalo leo le yago go Joaba, molaodi wa madira. Lengwalo le ile la laela gore Uria a bewe ka lehlakoreng la ntwa leo le bego le tla dira gore a bolawe. Joaba o ile a latela taelo yeo gomme Uria o ile a bolawa. Ka morago ga ge Batseba a feditše lebaka la tlwaelo la go lla, Dafida o ile a mo tšea gore e be mosadi wa gagwe.—2 Samuele 11:1-27.

11. Ke boemo bofe bjoo Nathane a ilego a bo botša Dafida, gomme o ile a arabela bjang?

¹¹ Go ile gwa bonagala leano le šomile, gaešita le ge Dafida a swanetše go ba a be a tseba gore taba ka moka e be e le molaleng go Jehofa. (Ba-Hebere 4:13) Dikgwedi di ile tša feta, gomme ngwana o ile a belegwa. Ke moka, ka taelo ya Modimo, moporofeta Nathane o ile a ya go Dafida. Moporofeta o ile a botša kgoši ka boemo bjoo go bjona monna wa mohumi yoo a nago le dinku tše dintši a ilego a tšea le go bolaya nku e tee e rategago ya monna wa modiidi. Taba ye e ile ya hudua maikwelo a Dafida a toka eupša ga se a ka a belaela gore e na le tlhaloso e utegilego. Dafida o ile a nea kahlolo ya kapejana malebana le monna wa mohumi. A tuka bogale, o ile a botša Nathane gore: “Monna eo a dirilexo ka mokxwa woo ó swanetše xo bolawa.”—2 Samuele 12:1-6.

12. Ke kahlolo efe yeo Jehofa a ilego a e nea malebana le Dafida?

¹² Moporofeta o ile a araba ka gore “monna eo ké wene!” Dafida o be a ikahlotše. Ka ntle le pelaelo, kapejana kgalefo ya Dafida e ile ya dira gore a be le dihlong o šoro le go nyama kudu. A maketše, o ile a theetša ge Nathane a mo nea kahlolo e sa phemegego ya Jehofa. Go be go se na mantšu a kwelobohloko goba a khomotšo. Dafida o be a nyaditše lentšu la Jehofa ka go dira seo e bego e le se sebe. Na o be a se a bolaya Uria ka lerumo la lenaba? Lerumo le ka se tloge ngwakong wa Dafida. Na o be a se a tšea mosadi wa Uria ka sephiring? Bobe bjo bo swanago bo be bo tla mo wela, e sego ka sephiring, eupša phatlalatša.—2 Samuele 12:7-12.

13. Dafida o ile a arabela bjang tayong ya Jehofa?

¹³ Selo se sebotse seo se ka bolelwago ka Dafida ke gore ga se a ka a gana molato wa gagwe. Ga se a ka a befelela moporofeta Nathane. Ga se a ka a bona ba bangwe phošo goba go itokafatša bakeng sa seo a bego a se dirile. Ge a be a lebeletšane le dibe tša gagwe, Dafida o ile a amogela boikarabelo ka go bolela gore: ‘Ke senyeditše Morena.’ (2 Samuele 12:13) Psalme 51 e bontšha go nyamišwa ke molato wa gagwe le go itshola ga gagwe mo go tseneletšego. O ile a kgopela Jehofa gore: “Se nthakê pele xa xaxo; ’me O se tlošê môya-mokxêthwa wa xaxo xo nna.” O be a dumela gore Jehofa ka kgaugelo ya gagwe, o be a ka se hlokomologe “pelo xe e rôbêxile, xe e setlêxile” ka baka la sebe. (Psalme 51:11, 17) Dafida o ile a tšwela pele a ithekga ka moya wa Modimo. Gaešita le ge Jehofa a se a šireletša Dafida go ditla-morago tše šoro tša sebe sa gagwe, o ile a mo lebalela.

14. Re swanetše go arabela bjang tayong ya Jehofa?

¹⁴ Ka moka ga rena ga se ra phethagala, gomme ka moka ga rena re dira sebe. (Ba-Roma 3:23) Ka dinako tše dingwe re ka wela sebeng se segolo, go etša ge Dafida a dirile. Go swana le ge tate yo lerato a laya bana ba gagwe, Jehofa le yena o phošolla bao ba nyakago go mo hlankela. Lega go le bjalo, gaešita le ge tayo e hola, ga e amogelege gabonolo. Ge e le gabotse, ka dinako tše dingwe e “byalo ka e ke ké xo hlokofatšwa.” (Ba-Hebere 12:6, 11) Lega go le bjalo, ge e ba re “theetša tayo,” re ka boelanywa le Jehofa. (Diema 8:33, NW) E le gore re thabele tšhegofatšo e tšwelago pele ya moya wa Jehofa, re swanetše go amogela phošollo gomme re šomele gore re amogelwe ke Modimo.

O se ke wa Holofela Mahumo a sa Kgonthišegego

15. (a) Batho ba bangwe ba diriša mahumo a bona ka ditsela dife? (b) Dafida o ile a kganyoga go diriša mahumo a gagwe bjang?

¹⁵ Ga go na leswao la gore Dafida o be a e-tšwa setlogong se se phagamego goba gore lapa la gabo le be le humile. Lega go le bjalo, nakong ya bogoši bja gagwe, Dafida o ile a kgoboketša lehumo le lentši kudu. Bjalo ka ge o tseba, ba bantši ba boloka lehumo la bona, ka megabaru ba nyaka go le oketša, goba go le diriša ka boithati. Ba bangwe ba diriša tšhelete ya bona bakeng sa go itumiša. (Mateo 6:2) Dafida o ile a diriša lehumo la gagwe ka tsela e fapanego. O be a kganyoga go tumiša Jehofa. Dafida o ile a botša Nathane kganyogo ya gagwe ya go agela Jehofa tempele bakeng sa go bea areka ya kgwerano, yeo ka nako yeo e bego e le Jerusalema “e ruleletšwe ke mathêbô.” Jehofa o be a thabišitšwe ke maikemišetšo a Dafida eupša o ile a mmotša ka Nathane gore tempele e be e tla agwa ke morwa wa Dafida e lego Salomo.—2 Samuele 7:1, 2, 12, 13.

16. Dafida o ile a dira ditokišetšo dife bakeng sa go agwa ga tempele?

¹⁶ Dafida o ile a kgoboketša ditlabakelo tšeo di bego di tla dirišwa modirong wo o mogolo wa go aga. Dafida o ile a botša Salomo gore: “Ke lokišeditše Ngwakô wa Morêna dixauta tša ’Talente tše dikete tše lekxolo, le silifêra ya ’Talente tše dikete tše sekete, le mphiri, le thsipi ye e sa lekanywexo; di xôna ké tše ntši; le dikwata le mafsika ke di lokišitše. Xomme wena O ka di oketša ka tše dingwê.” Go tšwa lehumong la gagwe, o ile a neela ka ditalente tše 3 000 tša gauta le ditalente tše 7 000 tša silifera.a (1 Koronika 22:14; 29:3, 4) Go nea ga Dafida ka seatla se se bulegilego e be e se feela go bontšha mahumo a gagwe eupša e be e le pontšho ya tumelo le ya boineelo go Jehofa Modimo. Ka go lemoga Mothopo wa mahumo a gagwe, o ile a botša Jehofa gore: “Di tšwile xo Wene tšohle, rè Xo nthšeditše tšohle di tšwaxo ’atleng sa xaxo.” (1 Koronika 29:14) Pelo ya Dafida ya go fana kudu e ile ya mo tutueletša go dira sohle seo a bego a ka kgona go se dira bakeng sa go godiša borapedi bjo bo sekilego.

17. Keletšo e lego go 1 Timotheo 6:17-19 e šoma bjang go bobedi bahumi le badiidi?

¹⁷ Ka mo go swanago, anke re dirišeng dilo tša rena tše di bonagalago go dira botse. Go e na le go phegelela tsela ya bophelo ya go rata dilo tše di bonagalago, go kaone gore re nyake go amogelwa ke Modimo—yeo ke tsela ya bohlale bja kgonthe le ya lethabo. Paulo o ngwadile gore: “Bahumi ba mehleng ya byale ba laêlê O re ba se ikxodišê, ba se holofêlê lehumô la xo tla le xo tloxa; ba holofêlê Modimo e a phelaxo, e a re faxo tšohle xore di re natêfêlê. Ba laêlê O re ba humê medirô e boló, ba ratê xo nea, ba abêlê ba bangwê. E bê xôna xo ithuêla, xo thêa mothêô wa mehla e tl’o xo tla xore ba fihlêlê byo e lexo bophelô bya ruri.” (1 Timotheo 6:17-19) Go sa šetšwe gore maemo a rena a tša boiphedišo ke afe, anke re ithekgeng ka moya wa Modimo gomme re phelele tsela ya bophelo yeo e tla re dirago gore re “ruele Modimong.” (Luka 12:21) Ga go na selo seo se lego bohlokwa go feta boemo bjo bo amogelegago go Tatago rena yo lerato wa legodimong.

Ipontšhe o Amogelega go Modimo

18. Ke ka tsela efe Dafida a ilego a beela Bakriste mohlala o mobotse?

¹⁸ Bophelong bja gagwe ka moka, Dafida o ile a nyaka go amogelwa ke Jehofa. O ile a goeletša kopelong ka gore: “Modimo, nthšôkêlwê! Nthšôkêlwê, xobane môya wa-ka o khuta ka Wêna.” (Psalme 57:1) Go bota ga gagwe Jehofa e be e se ga lefeela. Dafida o ile a tšofala, a “atetšwe ke matšatši.” (1 Koronika 23:1) Gaešita le ge Dafida a ile a dira diphošo tše dikgolo, o gopolwa e le yo mongwe wa dihlatse tše dintši tša Modimo tšeo di ilego tša bontšha tumelo e kgolo.—Ba-Hebere 11:32.

19. Re ka ipontšha bjang re amogelega go Modimo?

¹⁹ Ge o dutše o lebeletšane le maemo a fetogago bophelong, gopola gore go etša ge Jehofa a ile a thekga Dafida, a mo matlafatša le go mo phošolla, A ka go direla se se swanago. Ka go swana le Dafida, moapostola Paulo o ile a lebeletšana le diphetogo tše dintši bophelong. Lega go le bjalo, le yena o ile a dula a botega ka go ithekga ka moya wa Modimo. O ngwadile gore: “Ke kxôna tšohle ka Eo a mphaxo matla.” (Ba-Filipi 4:12, 13) Ge e ba re ithekga ka Jehofa, o tla re thuša gore re atlege. O nyaka gore re atlege. Ge e ba re mo theetša gomme re batamela kgaufsi le yena, o tla re nea matla a go dira thato ya gagwe. Le gona ge e ba re tšwela pele re ithekga ka moya wa Modimo, re tla kgona go ‘ipontšha re botegela Modimo’ gona bjale le ka mo go sa felego.—2 Timotheo 2:15.

[Mengwalo ya ka tlase]

[Caption on page 16]

Dafida o ile a ithekga ka moya wa Modimo gomme a nyaka go amogelwa ke Modimo. Na o dira se se swanago?

[Caption on page 18]

“Di tšwile xo Wene tšohle, rè Xo nthšeditše tšohle di tšwaxo ’atleng sa xaxo”

O be o tla Araba Bjang?

• Re ka itiša bjang malebana le boikgantšho?

• Ke ka baka la’ng re sa swanela go itefeletša?

• Re swanetše go ba le pono efe ka tayo?

• Ke ka baka la’ng re swanetše go bota Modimo e sego mahumo?