Dipotšišo tše Tšwago go Babadi
Na go be go e-na le diphaphathi tše pedi feela tša mafsika ka gare ga areka ya kgwerano, goba na go be go e-na le dilo tše dingwe?
Nakong ya ge tempele ya Salomo e neelwa ka 1026 B.C.E., “ka mo teng xa polokêlô xo be xo se selò xa e se diphaphathi tše pedi tšela tše Mošê a di beilexo mo xo yôna bà le kwa Horebe, mola Morêna a dira kxwêranô le Ba-Isiraele xe ba e-tšwa Egipita.” (2 Koronika 5:10) Lega go le bjalo, go be go se bjalo ka mehla.
‘Ka kgwedi ya boraro ya ge ba-Isiraele ba tšwile nageng ya Egipita,’ ba ile ba tsena lešokeng la Sinai. (Ekisodo 19:1, 2) Ka morago, Moše o ile a namela thaba ya Sinai moo a ilego a newa diphaphathi tše pedi tša mafsika a Molao. O hlalosa gore: “Ka boa ka foloxa thabeng, ka nôkêla matlapa polokelong ye ke bexo ke e dirile. A sa le mo xo yôna ka mo Morêna a ntaetšexo ka xôna.” (Doiteronomio 10:5) Ye e be e le areka ya nakwana, goba lepokisi leo Jehofa a laetšego gore Moše a tsenye mafsika a Molao ka gare ga lona. (Doiteronomio 10:1) Areka ya kgwerano e be e se ya dirwa go ba go fihla mo e ka bago bofelong bja 1513 B.C.E.
Nakwana ka morago ga go lokollwa ga bona Egipita, ba-Isiraele ba ile ba thoma go ngunanguna ka dijo. Ka gona, Jehofa o ile a ba nea manna. (Ekisodo 12:17, 18; 16:1-5) Mehleng yeo, Moše o ile a laela Arone a re: “Tšea pitšana; mo xo yôna O thšêlê Mana e tletšexo lefišwana O e beê pele xa Morêna; e bolokêlwê ditloxolo tša lena.” Pego e re: “Arone ó dirile tše Morêna a di laetšexo Mošê; a boloka pitšana yeo mo xo tlilexo xwa bolokwa melaô.” (Ekisodo 16:33, 34) Le ge go se pelaelo gore ka nako yeo Arone o ile a tlatša lefišwana, goba sebjana ka manna, go bolokwa ga sona ka Pitšaneng go be go swanetše go dirwa feela ka morago ga ge Moše a dirile Areka gomme a tsentše mafsika ka gare.
Go etša ge go šetše go bontšhitšwe, areka ya kgwerano e ile ya dirwa mafelelong a 1513 B.C.E. Lepara la Arone le ile la tsenywa ka gare ga Areka yeo lebaka le letelele ka morago ga moo, ka morago ga borabele bja Kora le bja ba bangwe. Moapostola Paulo o bolela ka “areka ya kgwerano . . . yeo go yona go bego go e-na le sebjana sa gauta seo se nago le manna le molamo wa Arone wo o bego o thuntše matšoba le matlapa a kgwerano.”—Ba-Hebere 9:4.
Manna e be e le tokišetšo yeo e dirilwego ke Modimo nakong ya nywaga e 40 ya leeto la ba-Isiraele la lebakanyana lešokeng. Ba ile ba se sa a hwetša ge “ba thôma xo ja mabêlê a naxa” ya kholofetšo. (Jošua 5:11, 12) Lepara la Arone le ile la tsenywa ka arekeng ya kgwerano ka morero—go lemoša moloko wa marabele goba go hlatsela gore borabele bo be bo sa amogelege. Se se ka ba se bolela gore lepara le beilwe ka moo nakong ka moka ya leeto la lešokeng. Ka gona, go ka kwagala go phetha ka gore lepara la Arone le lefišwana la manna la gauta di ntšhitšwe ka arekeng ya kgwerano nakwana ka morago ga ge ba-Isiraele ba tsene nageng ya kholofetšo, eupša pele ga ge tempele ya Salomo e neelwa.