Go Holwa ke “Mabele a Lexodimo”

KAPEJANA ka morago ga gore ba lopollwe ka mohlolo Egipita, ba-Isiraele ba ile ba bontšha go hloka tumelo mo gogolo go Molopolodi wa bona, Jehofa. Ka baka leo, Jehofa o ile a ba dira gore ba ralale lešokeng la Sinai lebaka la nywaga e 40. Lebakeng leo ka moka, ba-Isiraele le “lešaba la mahlakanasêla” la badiiledi bao ba bego ba e-na le bona ba be ba e-ja le go nwa “ ’me ba khora.” (Ekisodo 12:​37, 38) Psalme 78:​23-25 e anega kamoo se se ilego sa kgonega ka gona ka gore: “A [Jehofa] roma maru à le kwa lexodimong, a bula mejakô ya leratadima. A ba nešetša Mana ya xo lewa, a ba nea mabêlê a lexodimo. Ka moka xa bôná ba ja bušwa bya Barongwa, a ba rômêla dijô ’me ba khora.”

Ka ge a be a e-ja manna, Moše o ile a hlalosa dijo tše tša moswana-noši. O ngwadile gore mesong, “e itše ge phoka e tlogile . . . , mo lešokeng fase go be go le dilwana tša dikgokolwana tše nyane tše bjalo ka tšhwane mo lefaseng. Gomme ge bana ba Isiraele ba di bona ba botšana ba re: “Ke’ng ye?” (PK) goba ka go lebanya ka Sehebere, “man huʼ?” (Mongwalo wa ka tlase wa NW) Mohlomongwe lentšu “manna” le tšwa polelwaneng ye, e lego leina leo ba-Isiraele ba ilego ba bitša dijo tše ka lona. Moše o itše: “E be e le tše thšweu, di swana le dihlakauma, è le tše monate e ke ké senkxwa le nose.”​—Ekisodo 16:​13-15, 31.

Bjalo ka ge ba bangwe ba bolela, manna e be e se dijo tšeo di lego gona ka tlhago. Go be go akaretšwa matla ao a phagametšego a tlwaelegilego go a tšweletšeng. Ka mohlala, go ba gona ga ona go be go sa be feela lefelong le itšego goba sehleng se itšego. Ge a be a ka lala, a be a nyeuma diboko gomme a thoma go nkga; fela disola tše pedi tšeo lapa le lengwe le le lengwe le bego le di sola letšatšing la ka pele ga la Sabatha ya beke le beke di be di sa bole ge di letše, ka gona di be di kgona go lewa ka Sabatha​—e lego letšatši leo ka lona manna a bego a sa tšwelele. Ka kgonthe, manna e be e le dijo tša mohlolo.​—Ekisodo 16:​19-30.

Ge go bolelwa ka “ba matla” goba “barongwa,” go Psalme 78 go bontšhwa gore Jehofa a ka ba a ile a diriša barongwa bakeng sa go nea manna. (Psalme 78:​25, mongwalo wa ka tlase wa NW) Go sa šetšwe gore boemo e ka ba e le bofe, batho ba be ba e-na le mabaka ohle a go leboga Modimo bakeng sa botho bja gagwe. Lega go le bjalo, ba bantši ba ile ba bontšha boemo bja kgopolo bja go se leboge go yena Yo a ba lopolotšego bohlankeng kua Egipita. Le rena re ka tšea ditokišetšo tša Jehofa gabohwefo goba le gona go ba bao ba sa lebogego ge e ba re palelwa ke go naganišiša ka botho bja gagwe bjo lerato. Ka gona re ka leboga gore Jehofa o ile a akaretša pego ya go lopollwa ga ba-Isiraele le ditirgalo tša ka morago ga moo bakeng sa “xo ruta rena.”​—Ba-Roma 15:4.

Thuto Bakeng sa Isiraele e Hola Bakriste

Ge Jehofa a be a tšweletša manna, o be a naganne ka se se fetago go fo kgotsofatša dinyakwa tša nama tša ba-Isiraele ba dimilione tše e ka bago tše tharo. O be a nyaka ‘go ba kokobetša gomme a ba leke’ e le gore a ba sekiše le go ba laya bakeng sa gore ba holege. (Doiteronomio 8:​16; Jesaya 48:​17) Ge ba be ba ka arabela go sekišweng moo le tayong yeo, Jehofa o be a tla thabela ‘go ba direla tše botse mehleng e tlago’ ka go ba nea khutšo, katlego le lethabo Nageng ya Kholofetšo.

Selo se sengwe se bohlokwa seo ba bego ba swanetše go ithuta sona e be e le gore “motho xa a phele ka boxôbê fêla; ka xobane motho ó phela ka ohle ma-tšwa-molomong wa Morêna.” (Doiteronomio 8:3) Ge nkabe Modimo a be a se a ka a romela manna, batho ba ka be ba ile ba bolawa ke tlala​—e lego therešo yeo ba ilego ba e dumela ka go se dika-dike. (Ekisodo 16:​3, 4) Ba-Isiraele bao ba nago le tebogo letšatši le lengwe le le lengwe ba be ba gopotšwa ka ga go ba ga bona bao ba ithekgilego ka Jehofa ka mo go feletšego gomme ka go rialo ba be ba ikokobetša. Ge ba šetše ba tsene Nageng ya Kholofetšo yeo e tletšego ka mahumo a yona, ba be ba ka se ke ba lebala Jehofa le go ba ga bona ba ba ithekgilego ka yena.

Go swana le ba-Isiraele, Bakriste ba swanetše go dula ba nagana ka go ithekga ga bona ka Modimo bakeng sa dinyakwa tša bophelo​—tša nama le tša moya. (Mateo 5:3; 6:​31-33) Jesu Kriste ge a arabela go e nngwe ya diteko tša Diabolo, o ile a tsopola mantšu a Moše ao a hwetšwago go Doiteronomio 8:3, a rego: “Xo ngwadilwe xore motho xa a phele ka boxôbê fêla; ó phela ka mantšu ohle a a tšwaxo molomong wa Modimo.” (Mateo 4:4) Ee, barapedi ba therešo ba Modimo ba fepša ka go bala dipolelo tša Jehofa tšeo di hwetšwago Lentšung la gagwe. Go oketša moo, tumelo ya bona e a matlafala ge ba bona mafelelo a holago a dipolelo tše maphelong a bona ge ba dutše ba sepela le Modimo gomme ba etiša dikgahlego tša Mmušo wa gagwe pele.

Batho ba sa phethagalago ba ka lahlegelwa ke tebogo ya bona ya go leboga dilo tšeo di fetogago setlwaedi bophelong​—gaešita le ge dilo tše e le ponagatšo ya go kgomega ga Jehofa go lerato. Ka mohlala, mathomong ba-Isiraele ba be ba tlabja e bile ba thabišwa ke go tšweletšwa ga manna ka tsela ya mohlolo, eupša ge nako e dutše e e-ya ba bantši ba bona ba ile ba belaela. Ba be ba ngongorega ka tsela ya go se hlomphe ka gore, “dipelo tša rena di bile di tennwe ke boxôbê byó bo sa horišexo”​—e lego pontšho ya gore ba be ba thoma go “hlanôxêla Modimo e a phelaxo.” (Numeri 11:6; 21:5; Ba-Hebere 3:​12) Ka baka leo, mohlala wa bona o dira e le “xo eletša rena ba re fihletšwexo ke bofêlô bya mabaka.”​—1 Ba-Korinthe 10:11.

Re ka ela hloko bjang mohlala wo wa temošo? Tsela e nngwe yeo re ka dirago seo ka yona ke ka gore le ka mohla re se ke ra dumelela dithuto tša Beibele goba ditokišetšo tšeo re di hwetšago ka sehlopha sa mohlanka yo a botegago le yo bohlale di fetoga tša ka mehla goba tšeo di tlwaelegilego. (Mateo 24:​45) Ge re ka thoma go tšeela dimpho tša Jehofa tlase goba ra thoma go se sa di thabela, tswalano ya rena le yena e thoma go fola.

Ka lebaka le le kwalago, Jehofa ga a re tšhollele ka moela o sa kgaotšego wa dilo tše difsa tše di kgahlišago. Go e na le moo, o re hlabišetša seetša se se oketšegilego mabapi le Lentšu la gagwe ganyenyane-ganyenyane le ka mo go tšwelago pele. (Diema 4:​18) Se se nea batho ba gagwe sebaka sa go monya le go diriša dilo tšeo ba ithutago tšona. Jesu o be a latela mohlala wa Tatagwe ge a be a ruta barutiwa ba gagwe ba pele. O ba hlaloseditše Lentšu la Modimo “ka mo ba bexo ba kxôna xo mo kwa” goba go “kwešiša,” bjalo ka ge diphetolelo tše dingwe di bea taba bjalo.​—Mareka 4:​33; bapiša le Johane 16:12.

Matlafatša Tebogo ya Gago ya go Leboga Ditokišetšo tša Modimo

Jesu gape o be a boa-boeletša dilo. Go ba gona, monagano o ka kwešiša ntlha e itšego gabonolo​—ka mohlala, molao wa motheo wa Beibele​—eupša go o ela hloko le go o dira karolo ya “motho e mofsa” wa Bokriste go ka tšea nako e teletšana, kudu-kudu ge e ba ditsela tša kgale tša lefase le dikgopolo tša gona di tsemile medu. (Ba-Efeso 4:​22-24) Seo ruri ke se se diregilego ka barutiwa ba Jesu ge go tliwa tabeng ya go fenya boikgantšho le go hlagolela boikokobetšo. Jesu o ile a swanelwa ke gore a ba rute ka boikokobetšo mabakeng a mantši, lebakeng le lengwe le le lengwe a tšweletša ntlha e swanago ya motheo ka tsela e fapanego e le gore e nwelele, e lego seo mafelelong se ilego sa direga.​—Mateo 18:​1-4; 23:​11, 12; Luka 14:​7-11; Johane 13:​5, 12-17.

Mehleng yeno, diboka tša Bokriste le dikgatišo tša Watch Tower di latela mohlala wa Jesu tabeng ya go boa-boeletša dilo ka tsela e naganišišitšwego gabotse. Ka gona anke re lebeleleng se e le pontšho ya Modimo ya go kgomega ka lerato ka rena gomme le ka mohla re se ke ra lapišwa ke seo re se amogelago go etša ge ba-Isiraele ba ile ba lapišwa ke manna. Ka kgonthe, ge re dutše re katana ka go se fele pelo go monya dikgopotšo tša Jehofa tša ka mehla, re tla bona dienywa tše dibotse maphelong a rena. (2 Petro 3:1) Boemo bjo bjalo bja kgopolo bja go leboga ruri bo bontšha gore re ‘hlaologanya’ Lentšu la Modimo dipelong tša rena gotee le menaganong ya rena. (Mateo 13:​15, 19, 23) Mabapi le seo, re na le mohlala o mobotse wa mopsalme Dafida, yoo le ge a be a se na dijo tša moya tša mehuta-huta tšeo re di hwetšago lehono, a ilego a hlalosa melao ya Jehofa e le e “bose xo fetiša ’nose le todi ya tšôna.”​—Psalme 19:10.

“Manna” ao a Neago Bophelo bjo bo sa Felego

Jesu o boditše ba-Juda gore: “Boxôbê bya bophelô ké Nna. Bô-tata-weno ba lle Mana lešokeng, moka ba hwa. . . . Boxôbê byoo bya xo phela, byo bo foloxilexo lexodimong, ké Nna. Xe motho a e-ja boxôbê byó bya-ka, ó tlo phela xo ya xo ile . . . Boxôbê byo Nna ke tl’o xo bo nthša xore lefase le phelê, ké nama ya-ka.” (Johane 6:​48-51) Bogobe bja kgonthe goba manna bo be bo sa nee bophelo bjo bo sa felego e bile bo ka se kgone. Eupša bao ba bontšhago tumelo sehlabelong sa topollo sa Jesu mafelelong ba tla thabela tšhegofatšo ya bophelo bjo bo sa felego.​—Mateo 20:28.

Bontši bja bao ba dirišago topollo ya Jesu ba tla thabela bophelo bjo bo sa felego lefaseng la paradeise. “Lešaba le lexolo” la ba​—bao ba swantšheditšwego e sa le pele ke “lešaba la mahlakanasêla” la badiiledi bao ba ilego ba tlatša ba-Isiraele Khudugong ya bona go tšwa Egipita—​ba tla phologa ‘tlaišego e kgolo’ e tlago yeo e tlago go fediša bokgopo lefaseng. (Kutollo 7:​9, 10, 14; Ekisodo 12:​38) Moputso o mogolwanyane o thabelwa ke bao ba bego ba swantšhetšwa ke ba-Isiraele ka bobona. Moapostola Paulo o hlalositše ba, bao palo ya bona e lego 144 000, e le bao ba bopago Isiraele ya moya ya Modimo. Moputso wa bona lehung ke go tsošetšwa bophelong legodimong. (Ba-Galatia 6:​16; Ba-Hebere 3:1; Kutollo 14:1) Moo Jesu o tla ba nea mohuta o kgethegilego wa manna.

Seo se Hlaloswago ke “Mana a Fihlilwego”

Jesu yo a tsošitšwego bahung o ile a botša Isiraele ya moya gore: “Yo a fenyago ke tlo mo fa go ja mana a fihlilwego.” (Kutollo 2:​17, PK) Manna a a fihlilwego a seswantšhetšo a re gopotša ka manna ao Modimo a ilego a laela Moše gore a a boloke ka sebjaneng sa gauta ka gare ga areka e kgethwa ya kgwerano. Areka e be e beilwe ka karolong ya Sekgethwa-kgethwa ya tabarenekele. Moo e be e sa bonwe, go le bjalo ka ge eka e fihlilwe. A bolokilwe e le segopotšo, manna a ao e lego mohlala a be a sa bole ge a be a le ka Arekeng, ka gona e be e tla ba sešupo se sebotse sa kabo ya dijo tšeo di sa bolego. (Ekisodo 16:​32; Ba-Hebere 9:​3, 4, 23, 24) Jesu ge a nea ba 144 000 manna a fihlilwego, o kgonthišetša gore ba amogela go se hwe le go se bole e le barwa ba moya ba Modimo.​—Johane 6:​51; 1 Ba-Korinthe 15:54.

Mopsalme o itše: “Xo Wene [Jehofa] xo mothôpô wa bophelô.” (Psalme 36:9) Tokišetšo ya manna​—a kgonthe gotee le a seswantšhetšo​—e kgonthišetša gabotse gakaakang therešo yeo ya motheo! Manna ao Modimo a a neilego Isiraele ya bogologolo, manna a seswantšhetšo ao a a neilego ka mokgwa wa nama ya Jesu yeo e gafilwego bakeng sa rena le manna a seswantšhetšo ao a fihlilwego ao a a neago ba 144 000 ka Jesu, ka moka ga rena a re gopotša ka go ba ga rena ba ba ithekgilego ka Modimo ka mo go feletšego bakeng sa bophelo. (Psalme 39:​5, 7) Anke re eleng hloko ka boikokobetšo, ka boipoetšo le ka mehla go ithekga mo ka yena. Ke moka Jehofa o tla ‘re direla tše botse mehleng e tlago.’​—Doiteronomio 8:16.

[Seswantšho go letlakala 26]

Bakeng sa go hwetša bophelo bjo bo sa felego, batho ka moka ba ithekgile ka ‘bogobe bjo bo phelago bjo bo fologilego legodimong’

[Seswantšho go letlakala 28]

Go ba gona dibokeng ka moka tša Bokriste go bonagatša tebogo ya rena ya go leboga dikgopotšo tša Jehofa