Na Modimo o Amogela Mehuta ka Moka ya Borapedi?

Dikarabo tšeo di tlwaelegilego:

▪ “Madumedi ka moka ke ditsela tšeo di lebišago go Modimo.”

▪ “Ga go na taba gore o dumela eng ge feela o botega.”

Ke eng seo Jesu a se boletšego?

▪ “Tsenang ka kgoro e tshesane; gobane tsela e išago tshenyegong e petleke e bile e phatlaletše, gomme bao ba tsenago ka yona ke ba bantši; anthe kgoro ke e tshesane gomme tsela e išago bophelong e pitlagane, le gona ke ba sego kae ba ba e hwetšago.” (Mateo 7:13, 14) Jesu o be a sa dumele gore madumedi ka moka a lebiša go Modimo.

▪ “Ba bantši ba tla re go nna letšatšing leo, ‘Morena, Morena, na ga se ra ka ra porofeta ka leina la gago, ra leleka batemona ka leina la gago, ra dira mediro e mentši e matla ka leina la gago?’ Lega go le bjalo, ke tla ba botša ka re: Ga se ka ka ka le tseba! Tlogang go nna lena badiri ba go hloka molao.” (Mateo 7:22, 23) Jesu ga a amogele batho ka moka bao ba bolelago gore ba a mo latela.

BADUMEDI ba bantši ba swareletše ditumelong tša bona le metlwae. Eupša go thwe’ng ge e ba dithuto tšeo di sa dumelelane le seo se lego ka Lentšung la Modimo e lego Beibele? Jesu o bontšhitše kotsi ya go latela metlwae ya batho ge a be a botša baetapele ba bodumedi ba mehleng ya gagwe gore: “Le dirile lentšu la Modimo lefeela ka tlwaelo ya lena.” Ke moka o ile a tšwela pele go tsopola mantšu a a Modimo a rego: “Batho ba ba nkgodiša ka melomo ya bona, fela dipelo tša bona di kgole le nna. Ke lefeela ge ba dutše ba nthapela, gobane ba ruta ditaelo tša batho e le dithuta-tumelo.”—Mateo 15:1-9; Jesaya 29:13.

Selo se sengwe sa bohlokwa ke boitshwaro, e sego feela seo re se dumelago. Beibele ge e bolela ka bao ba ipolelago gore ba rapela Modimo e re: “Ba bolela phatlalatša gore ba tseba Modimo, eupša ba mo latola ka mediro ya bona.” (Tito 1:16) Ge e le gabotse, Beibele ge e bolela ka bao ba phelago mehleng ya rena e re: “Go e na le go rata Modimo, ba tla rata maipshino. Gaešita le ge ba tla iponagatša eka ke badumedi, bodumedi bja bona e ka se be bja kgonthe. O se ke wa dirišana le batho ba bjalo.”—2 Timotheo 3:4, 5, Contemporary English Version.

Potego ke ya bohlokwa eupša go nyakega se fetago seo. Ka baka la’ng? Ka gobane motho a ka foša eupša a e-na le maikemišetšo a mabotse. Ka gona, tsebo e nepagetšego ka Modimo ke ya bohlokwa. (Baroma 10:2, 3) Go ithuta therešo le go dira dilo ka go dumelelana le seo Beibele e se bolelago go tla re thuša go thabiša Modimo. (Mateo 7:21) Ka gona, bodumedi bja therešo bo akaretša maikemišetšo a swanetšego, tumelo e swanetšego le go tšea kgato ya maleba. Go tšea kgato ya maleba go bolela go dira thato ya Modimo letšatši le lengwe le le lengwe!—1 Johane 2:17.

Ge e ba o nyaka go tseba mo go oketšegilego mabapi le seo Beibele e re botšago sona ka Modimo, ikopanye le Dihlatse tša Jehofa bakeng sa thuto e sa lefelelwego ya legae ya Beibele.

[Ntlhakgolo go letlakala 9]

Bodumedi bja therešo bo akaretša maikemišetšo a swanetšego, tumelo e swanetšego le go tšea kgato ya maleba