Bodumedi​—Na ke Kgetho Ya-ka Goba ya Batswadi Ba-ka?

KUA Poland, batho ba bantši ba botša Dihlatse tša Jehofa gore, “Ke belegetšwe bodumeding bjo gomme ke tla hwela go bjona.” Mantšu ao a bolela gore go ya ka pono ya bona, bodumedi bo fetišetšwa go tloga molokong o mongwe go ya go o mongwe. Na lefelong leo o dulago go lona batho ba na le pono e swanago ka bodumedi? Gantši pono e bjalo e ba le mafelelo a afe? Bodumedi bo fetoga tsela e tlwaelegilego ya go dira dilo le motlwae wa ka gae. Na se se ka diragalela Dihlatse tša Jehofa tšeo di ithutilego therešo go batswadi ba tšona goba go bomakgolo’a tšona?

Se ga se sa ka sa diragalela Timotheo, yo a ilego a hlahlwa ke mmagwe le makgolo’agwe ba ineetšego gore a dumele go Modimo wa therešo le go mo rata. Timotheo o tsebile mangwalo a makgethwa “go tloga boseeng.” Ge nako e dutše e e-ya, Timotheo gotee le mmagwe le makgolo’agwe ba ile ba kgodišega gore tsela ya Bokriste ke ya therešo. O ile a ‘kgodišwa gore a dumele’ seo a se kwelego Mangwalong mabapi le Jesu Kriste. (2 Tim. 1:5; 3:14, 15) Ka gona, gaešita le ge batswadi ba Bakriste lehono ba dira sohle seo ba ka se kgonago go thuša bana ba bona go hlankela Jehofa, bana ka bobona ba swanetše go hlagolela kganyogo ya go ba bahlanka ba Jehofa.—Mar. 8:34.

Yo mongwe le yo mongwe o swanetše gore a tutuetšwe ka tsela e kgodišago ya go nea mabaka e le gore a hlankele Jehofa ka gobane a mo rata gomme a dule a botega go sa šetšwe seo se diregago. Ke moka, tumelo ya gagwe e tla tia gomme ya tsema medu.—Baef. 3:17; Bakol. 2:6, 7.

Tema Yeo e Kgathwago ke Bana

Alberta yo a godišeditšwego lapeng la Dihlatse o re: “Ka mehla ke be ke nagana gore bodumedi bja Dihlatse tša Jehofa ke bja therešo, eupša ke be ke thatafalelwa ke go amogela seo di se bolelago mabapi le kamoo ke swanetšego go phela ka gona.” Ge e ba o le mofsa, le wena o ka ikwa ka mo go swanago. Ke ka baka la’ng o sa dire maiteko a go bona seo se bolelwago ke go phela ka tsela yeo Modimo a nyakago re phela ka yona gomme o hwetše lethabo ge o dira thato ya gagwe? (Ps. 40:8) Albert o re: “Ke ile ka thoma go rapela. Mathomong ke ile ka hwetša go le thata go dira bjalo. Ke ile ka ikgapeletša go rapela. Lega go le bjalo, ka morago ga nako e kopana ke ile ka ikwa gore nka ba yo bohlokwa mahlong a Modimo ge e ba ke leka go dira thato ya gagwe. Se se ile sa mpha matla a go dira diphetogo tše di nyakegago.” Ka go hlagolela tswalano ya kgaufsi le Jehofa, o ka kgona go ba kganyogo ya go dira seo a se nyakago go rena.—Ps 25:14; Jak. 4:8.

Nagana ka papadi yeo o ilego wa e bapala, mohlomongwe kgwele ya maoto goba papadi engwe. Ge e ba o sa tsebe melao ya yona goba o sa e tsebe gabotse, e ka ba e tšwafišago. Lega go le bjalo, ge e ba o ithutile melao ya yona gomme wa kgona go e bapala gabotse, na o ka se lebelele pele go e bapala, goba mohlomongwe go tsoma dibaka tša go e bapala? Go bjalo le ka mediro ya Bokriste. Ka gona, dira maiteko a go lokišeletša diboka tša Bokriste. Tšea karolo. Ka go rialo, o ka kgothatša ba bangwe ka mohlala wa gago, go sa šetšwe nywaga ya gago.—Baheb. 10:24, 25.

Go bjalo le ka go botša ba bangwe ka tumelo ya gago. Se le sona se swanetše go dirwa ka lerato, e sego ka kgapeletšo. Ipotšiše gore: ‘Ke ka baka la’ng ke nyaka go botša ba bangwe ka Jehofa? Ke na le mabaka afe a go mo rata?’ O swanetše go tseba Jehofa bjalo ka Tate yo lerato. A diriša Jeremia, Jehofa o itše: “Le tlo nnyaka, la nkhwetša; xobane Le tlo ba Le nnyaka ka dipelo tša lena ka moka.” (Jer. 29:13, 14) Se se ka nyaka gore o dire’ng? Jakub o re: “Ke ile ka swanelwa ke go fetoša tsela ya ka ya go nagana. Ke be ke e-ba gona dibokeng gomme ke tšea karolo bodireding go tloga ge ke be ke sa le ngwana, eupša ke be ke dira mediro ye feela ka gobane e le setlwaedi. Ke feela ka morago ga go tseba Jehofa gakaone le go hlagolela tswalano ya kgaufsi le yena moo ke ilego ka rata therešo e le ka kgonthe.”

Segwera se sebotse le se se agago se ka dira gore o rate bodiredi. Seema se buduletšwego se re: “Šika le bahlale O hlalefê; mokxônana-le-mašilo ó tlo thsereana.” (Die. 13:20) Ka gona, tsoma segwera gare ga bao ba phegelelago dipakane tša moya gomme ba dula ba thabile tirelong ya Jehofa. Jola o re: “Ke ile ka hwetša e le mo go kgothatšago go gwerana le bafsa ba bantši bao ba sekametšego dilong tša moya. Ke ile ka thoma go thabela go tšea karolo ka mehla bodireding.”

Tema Yeo e Kgathwago ke Batswadi

Jola o tšwela pele ka gore: “Ke leboga batswadi baka kudu ge ba ile ba nthuta ka Jehofa.” Ee, batswadi ba ka ba le tutuetšo e kgolo kudu dikgethong tša bana ba bona. Moapostola Paulo o ngwadile gore: ‘Lena bo-tate, tšwelang pele le godiša bana ba lena ka tayo le tlhahlo ya monagano ya Jehofa.’ (Baef. 6:4) Keletšo ye e buduletšwego e bontšha gabotse gore karolo ya batswadi ke go ruta bana ba bona ditsela tša Jehofa, e sego tša bona. Go e na le go kgothaletša bana ba gago go phegelela dipakane tšeo o ka bago o be o nyaka go di fihlelela, e tla ba mo go kgahlišago gakaakang ge o ka ba thuša go dira gore pakane ya bona bophelong e be go phela ka go dumelelana le merero ya Jehofa!

O ka tiišetša mantšu a Jehofa ka dipelong tša bana ba gago gomme wa “[bolela] ôna Ò dutše ngwakong wa xaxo, le xe O le tseleng xe O y’o rôbala le xe Ò tsoxa.” (Doit. 6:6, 7) Ewa le Ryszard, bao nago le bana ba bararo ba gopola ka gore: “Re ile ra bolela kudu ka mehuta e fapanego ya tirelo ya nako e tletšego.” Mafelelo e bile afe? “Barwa ba rena ba ile ba nyaka go ingwadiša Sekolong sa Bodiredi sa Pušo ya Modimo e sa le ba banyenyane, ba ba bagoeledi gomme mafelelong ba itirela phetho ya go kolobetšwa. Ka morago ba ile ba tsenela tirelo ya Bethele goba ba hlankela e le babulamadibogo ba nako e tletšego.”

Mohlala o mobotse wa batswadi o bohlokwa. Ryszard o re: “Re be re ikemišeditše go se phele maphelo a mabedi, re phele ka tsela engwe ge re le ka gae gomme re phele ka tsela e fapanego ge re le dibokeng.” Ka gona, ipotšiše gore: ‘Ke’ng seo bana ba-ka ba se bonago bophelong bja-ka? Na ba bona ke rata Jehofa e le ka kgonthe? Na ba bona lerato le dithapelong tša-ka le mokgweng wa-ka wa go ba le thuto ya motho ka noši? Na ba le bona tseleng yeo ke lebelelago bodiredi bja tšhemo, boithabišo le dilo tše bonagalago gotee le go seo ke se bolelago ka ditho tša phuthego?’ (Luka 6:40) Bana ba tla bona tseleng ya gago ya bophelo ya letšatši le letšatši gomme ba lemoga phaphano magareng ga seo o se bolelago le seo o se dirago.

Tayo e kgatha tema ya bohlokwa go godišeng bana. Lega go le bjalo, Lentšu la Modimo le buduletšwego le re laela gore “ngwana [re] mo eteletše tsela y’axwe.” (Die. 22:6) Ewa le Ryszard ba hlalosa gore: “Re ile ra ipha nako ya go swara thuto ya Beibele le ngwana yo mongwe le yo mongwe a nnoši.” Ke therešo gore batswadi ke bona ba tlago go dira phetho ya ge e ba go nyakega gore ngwana yo mongwe le yo mongwe a swarelwe thuto ya gagwe a nnoši. Go sa šetšwe gore boemo ke bofe, ngwana o swanetše go tlwaetšwa go ya ka dinyakwa tša gagwe. Se se nyaka gore le feto-fetoge le maemo gomme le be le teka-tekano. Ka mohlala, go e na le go fo botša bana gore mmino o itšego ga se wa loka, ke ka baka la’ng le sa ba bontšhe kamoo ba ka dirago dipheto tše bohlale le kamoo melao ya motheo ya Beibele e akaretšwago ka gona?

Bana ba gago ba ka tseba gabotse seo o se letetšego go bona gomme ba bonala eka ba dumelelana le dikganyogo tša gago. Lega go le bjalo, o swanetše go ba fihlelela pelo. Gopola gore “maanô pelong ya monna ké meetse a bodiba; a xiwa ke yo thlaloxanyô.” (Die. 20:5) E-ba le temogo, o šetše maswao a bothata le ge e le bofe bjoo bana ba gago ba ka bago ba e-na le bjona gomme o tšee kgatho gatee-tee. Ntle le go ba latofatša, bontšha gore o tshwenyega ka bona gomme o ba botšiše dipotšišo tšeo di swanetšego. Lega go le bjalo, e-ba šedi gore o se botšiše dipotšišo tše dintši. Go tswenyega ga gago e le ka kgonthe go tla ba kgoma pelo gomme gwa dira gore o kgone go ba thuša.

Tema e Kgathwago ke Phuthego

Bjalo ka yo mongwe wa bahlanka ba Modimo, na o ka thuša bafsa ka phuthegong go thabela bohwa bja moya bjo ba bo amogetšego? Le ge batswadi ba e na le boikarabelo bja go tlwaetša bana ba bona, ba bangwe ka phuthegong, kudu-kudu bagolo, ba ka thekga boiteko bjoo bo dirwago ke batswadi. Ke gabohlokwa kudu go thuša bao ba tšwago malapeng a aroganego bodumeding.

Ke’ng seo bagolo ba ka se dirago go thuša bafsa go rata Jehofa le gore ba ikwe ba le bohlokwa e bile ba ratwa? Mariusz yo a hlankelago e le molebeledi ka phuthegong kua Poland o re: “Bagolo ba swanetše go boledišana le bafsa. Se ga se sa swanela go dirwa ge go e na le mathata feela, eupša le mabakeng a mangwe—ge ba le bodireding, ka morago ga diboka goba nako le nako ge ba e na le bona.” Ke ka baka la’ng o sa botšiše bafsa kamoo ba ikwago ka gona ka phuthego? Poledišano e bjalo yeo e dirago gore ba lokologe e dira gore bafsa ba rate phuthego gomme e ba thuša go ikwa ba le karolo ya yona.

Ge e ba o le mogolo, na o tlwaelana le bafsa ba lego ka phuthegong ya geno? Gaešita le ge ga bjale a hlankela bjalo ka mogolo, Albert yo go boletšwego ka yena pejana, o ile a lebeletšana le diteko tše fapa-fapanego ge a be a sa le mahlalagading. O re: “Bjalo ka mofsa, ke be ke hloka ketelo ya bodiši.” Le gona, bagolo ba ka bontšha go tshwenyega ka bafsa ka go ba rapelela gore ba atlege moyeng.—2 Tim. 1:3.

Ke mo gobotse gore bafsa ba tšee karolo medirong ya phuthego. Go se go bjalo, ba ka thoma go phegelela dipakane tša lefase. Na lena batho ba bagolo le ka šoma le bona bodireding e le gore ba gwerane le lena? Fetšang nako le e-na le bafsa e le gore ba le bote gomme ba gwerane le lena. Jola o gopola ka gore: “Kgaetšedi yo mongwe wa mmulamadibogo o ile a nkgahlegela. Lekga la pele ge ke be ke ithapela go ya bodireding, e be e le ge ke sepela la yena.”

Kgetho ya Gago

Bafsa, ipotšišeng gore: ‘Dipakane tša-ka ke dife? Ge e ba ga bjale ke se ka hlwa ke kolobetšwa, na ke ipeetše pakane ya go kolobetšwa?’ Phetho ya go kolobetšwa e swanetše go thewa leratong le tšwago pelong la go rata Jehofa, e sego ka ge e le motlwae wa ka gae.

Ee, eka Jehofa e ka ba Mogwera wa gago wa kgonthe gomme therešo ya ba lehumo la gago. Jehofa o boletše ka moporofeta Jesaya gore: “O se kê wa thšoxa, xobane Modimo wa xaxo ké Nna.” Jehofa o tla ba le wena ge feela o dula o le mogwera wa gagwe. O tla go matlafatša e le ka kgonthe gomme a ‘go hleka ka letsogo la gagwe le letona le ka toko ya gagwe.’—Jes. 41:10.

[Mongwalo wa tlase]

[Seswantšho go letlakala 4]

Lekang go lemoga seo se lego ka pelong ya ngwana wa lena

[Seswantšho go letlakala 6]

Phetho ya go kolobetšwa e swanetše go thewa leratong le tšwago pelong la go rata Jehofa