Lebaka leo ka Lona Edene e go Kgomago

E NNGWE ya dikganetšo tše di makatšago tšeo diithuti tša Beibele di di tsošago mabapi le pego ya Edene ke ya gore ga e thekgwe ke Beibele ka moka. Ka mohlala, Moporofesara wa Dithuto tša Bodumedi Paul Morris o ngwala gore: “Ga go na ditšhupetšo tša ka morago tša Beibele tšeo di šupago ka go lebanya kanegelong ya Edene.” Tlhahlobo ya gagwe e ka dumelwa ke ba bantši bao go thwego ke ditsebi, eupša e tloga e fapane le ditherešo.

Ge e le gabotse Beibele e nea ditšhupetšo tše dintši ka serapa sa Edene, Adama, Efa gotee le noga.a Eupša phošo ya diithuti tše mmalwa e a fokola ge e bapišwa le phošo yeo e phatlaletšego yeo e dirilwego ke ba bantši. Ka go hlompholla pego ya Genesi ya serapa sa Edene, baetapele ba bodumedi le baswayadiphošo ba Beibele ge e le gabotse ba leka go hlompholla Beibele ka mo go feletšego. Bjang?

Go kwešiša seo se diragetšego Edene go bohlokwa go kwešišeng Beibele ka moka. Ka mohlala, Lentšu la Modimo le reretšwe go re thuša go hwetša dikarabo tša dipotšišo tše bohlokwa kudu tšeo batho ba nago le tšona. Nako le nako, dikarabo tša Beibele tša dipotšišo tše di tswalana le ditiragalo tšeo di diragetšego serapeng sa Edene. Ela hloko mehlala e mengwe.

● Ke ka baka la’ng re tšofala le go hwa? Adama le Efa ba be ba tla phela ka mo go sa felego ge nkabe ba ile ba tšwela pele ba ikokobeletša Jehofa. Ba be ba tla hwa ge feela ba rabela. Ba ile ba thoma go hwa letšatšing leo ba rabetšego ka lona. (Genesi 2:16, 17; 3:19) Ba ile ba lahlegelwa ke phethego gomme ba fetišetša sebe le go se phethagale baneng ba bona. Ka gona, Beibele e hlalosa ka gore: “Ka baka leo go etša ge ka motho o tee sebe se tsene lefaseng gomme lehu la tsena ka sebe, ka go re’alo lehu le aparetše batho bohle gobane bohle ba dirile sebe.”—Baroma 5:12.

● Ke ka baka la’ng Modimo a dumelela bokgopo? Serapeng sa Edene, Sathane o itše Modimo ke moaketši yo a timago dibopiwa tša gagwe dilo tše dibotse. (Genesi 3:3-5) Ka gona o ile a hlohla tshwanelo ya Jehofa ya go buša. Adama le Efa ba ile ba kgetha go latela Sathane; le bona ka mo go swanago ba ganne bobuši bja Jehofa e bile ge e le gabotse, ba phethile ka gore motho a ka itirela phetho ya se sebotse le se sebe. Ka toka ya gagwe e phethagetšego le bohlale, Jehofa o be a tseba gore go na le tsela e tee feela e nepagetšego ya go araba tlhohlo ye—go dumelela nako gore e fete, ka go nea batho sebaka sa go ipuša bjalo ka ge ba kgethile. Bokgopo bjo bo latetšego bo bile gona ka baka la tutuetšo e tšwelago pele ya Sathane gomme bo utolotše ganyenyane-ganyenyane therešo e kgolo ya gore: Motho ga a kgone go ipuša ntle le Modimo.—Jeremia 10:23.

● Morero wa Modimo ka lefase ke ofe? Serapeng sa Edene, Jehofa o ile a thea tekanyetšo ya bobotse bakeng sa lefase. O laetše Adama le Efa go tlatša lefase ka bana ba bona le gore ba “le buše,” e le gore ba ka tliša tekanyo e swanago ya bobotse le kwano polaneteng ka moka. (Genesi 1:28) Morero wa Modimo ka lefase ke gore e be paradeise yeo e tlago go dulwa ke lapa le le kopanego le le le phethagetšego la bana ba Adama le Efa. Beibele e bolela mo gontši mabapi le dithulaganyo tša Modimo tša go phethagatša morero wa gagwe wa mathomong.

● Ke ka baka la’ng Jesu Kriste a ile a tla lefaseng? Borabele bja serapeng sa Edene bo tlišitše kahlolo ya lehu go Adama le Efa gotee le bana ba bona ka moka, eupša Modimo ka lerato o neile kholofelo. O rometše Morwa wa gagwe lefaseng go re tlišetša seo Beibele e se bitšago topollo. (Mateo 20:28) Seo se bolela’ng? Ge e le gabotse, Jesu e be e le “Adama wa mafelelo”; o atlegile moo Adama a bego a paletšwe gona. Jesu o ile a tšwela pele e le motho yo a phethagetšego ka ge a ile a dula a ekwa Jehofa. Ke moka a neela bophelo bja gagwe ntle go tefo e le sehlabelo goba topollo, ka go realo batho bohle bao ba botegago ba hwetša tsela ya gore dibe tša bona di lebalelwe gomme mafelelong ba hwetše bophelo bjoo Adama le Efa ba bego ba bo thabela kua Edene pele ba dira sebe. (1 Bakorinthe 15:22, 45; Johane 3:16) Ka go re’alo Jesu o kgonthišeditše gore morero wa Jehofa wa go fetoša lefase gore le swane le paradeise ya Edene o tla phethagala.b

Morero wa Modimo ga se wo o sa kwešišegego, goba kgopolo feela yeo go inaganelwago ya thutatumelo. Ke selo sa kgonthe. Bjalo ka ge serapa sa Edene e be e le lefelo la kgonthe mo lefaseng, leo le nago le diphoofolo tša kgonthe le batho, ka gona morero wa Modimo ka bokamoso o kgonthišeditšwe, selo seo se tlago go direga kgauswinyane. Na bjo e tla ba bokamoso bja gago bja kgonthe? Phetho ke ya gago. Modimo o rata ge batho ba bantši ka mo go ka kgonegago ba eba le bokamoso bjo, gaešita le bao ba sa phelego ka ditekanyetšo tša Modimo.—1 Timotheo 2:3, 4.

Ge Jesu a be a ehwa, o ile a bolela le monna yoo a bego a sa phele ka ditekanyetšo tša Modimo. Monna yo e be e le sesenyi; o be a tseba gore o swanelwa ke go bolawa. Eupša o ile a tsoma khomotšo le kholofelo go Jesu. Jesu o ile a arabela bjang? “O tla ba le nna Paradeiseng.” (Luka 23:43) Ge e ba Jesu a nyaka go bona sesenyi seo sa nakong e fetilego moo—se tsošitšwe le go šegofatšwa ka go ba le sebaka sa go phela ka mo go sa felego paradeiseng yeo e swanago le ya Edene—na ga a nyake o eba le tšhegofatšo e swanago? O a nyaka! Le Tatagwe o a nyaka! Ge e ba o nyaka bokamoso bo bjalo, dira sohle seo o ka se kgonago go ithuta ka Modimo yo a dirilego serapa sa Edene.

[Mengwalo ya tlase]

[Box/​Pictures on page 10]

BOPOROFETA BJO BO KGOKAGANYAGO BEIBELE

“Ke tla tsoša bonaba magareng ga gago [noga] le mosadi le magareng ga peu ya gago le peu ya gagwe. E tla go pšhatla hlogo gomme wena wa e loma serethe.”—Genesi 3:15.

Bjo ke boporofeta bja mathomo bja Beibele, bjo bo boletšwego ke Modimo kua Edene. Baanegwa ba ba bane ke bomang: mosadi, peu ya gagwe, noga le peu ya yona? “Bonaba” bjo go boletšwego ka bjona bo tšwelela bjang?

NOGA

Sathane Diabolo.—Kutollo 12:9.

MOSADI

Mokgatlo wa Jehofa wa dibopiwa tša legodimong. (Bagalatia 4:26, 27) Jesaya o boletše e sa le pele ka “mosadi,” gore o be a tla belega setšhaba sa nakong e tlago sa moya.—Jesaya 54:1; 66:8.

PEU YA NOGA

Bao ba kgethago go dira thato ya Sathane.—Johane 8:44.

PEU YA MOSADI

Ka mo go kgethegilego ke Jesu Kriste, yoo a tšwilego karolong ya legodimong ya mokgatlo wa Jehofa. Bao gape ba akaretšwago go “peu” ye ke bana babo Kriste ba moya, bao ba tlago go buša le yena legodimong. Bakriste bao ba tloditšwego ba bopa setšhaba sa moya, “Isiraele wa Modimo.”—Bagalatia 3:16, 29; 6:16; Genesi 22:18.

GO LONGWA SERETHE

Kotlo e kwešago Mesia bohloko eupša mafelelo a yona e se a sa ruri. Sathane o ile a atlega go direng gore Jesu a bolawe lefaseng. Jesu o ile a tsošwa.

GO PŠHATLWA HLOGO

Kotlo ya lehu go Sathane. Jesu o tla fediša Sathane ka mo go sa felego. Le pele ga moo, Jesu o tla lokiša bobe bjo bo thomilwego ke Sathane kua Edene.—1 Johane 3:8; Kutollo 20:10.

Bakeng sa kakaretšo ya sehlogo se segolo sa Beibele, bona poroutšha ya Beibele—E na le Molaetša Ofe? yeo e gatišitšwego ke Dihlatse tša Jehofa.

[Seswantšho go letlakala 11]

Adama le Efa ba ile ba tlaišwa ke ditlamorago tše šoro tša sebe