Potšišo 1: Na Bophelo bja ka bo na le Morero?

ROSALIND, yo a goletšego Engelane, o be a nyoretšwe go hwetša tsebo. O be a nyaka le go thuša batho. Ka morago ga go aloga sekolong, o ile a hwetša mošomo wa maemo wo o bego o akaretša go thuša batho ba se nago magae, e bile o ile a thuša bao ba sa itekanelago mmeleng gotee le ba nago le mathata a go ithuta. Go sa šetšwe go ba le mošomo o kgotsofatšago le go ema gabotse ka dilo tše di bonagalago, o re: “Ke na le nywaga e mentši ke ipotšiša gore, ‘Ke ka baka la’ng re le mo?’ le gore ‘Morero wa bophelo ke ofe?’”

Ke ka baka la eng go botšišwa potšišo ye?

Batho ga ba swane le diphoofolo tše se nago tlhaologanyo. Re na le bokgoni bja go ithuta dilong tša nakong e fetilego, bja go rulaganyetša bokamoso le bja go tsoma morero bophelong bja rena.

Ba bangwe ba re karabo ke efe?

Batho ba bantši ba nagana gore morero o mogolo bophelong ke go hwetša mahumo goba botumo, e lego seo se tlišago lethabo.

Karabo yeo e umaka eng?

Re ipeela dilo tšeo di tlago pele bophelong. Thato ya Modimo ga e bohlokwa go feta dikganyogo tša rena.

Ke eng seo Beibele e se rutago?

Kgoši Solomone o ile a kgobelela mahumo le go phegelela boithabišo eupša a hwetša gore dilo tšeo ga di dire gore motho a dule a ikwa a ena le morero. O ile a bontšha seo se tlišago morero bophelong ge a be a ngwala gore: “Bofelo bja ditaba tšohle tšeo o di kwelego ke gore: Boifa Modimo wa therešo gomme o lote ditaelo tša gagwe. Ka gobane se ke sohle seo motho a tlamegilego go se dira.” (Mmoledi 12:13) Go lota ditaelo tša Modimo go akaretša’ng?

Karolo ya morero wa Modimo ka rena ke gore re thabele bophelo. Solomone o ngwadile gore: “Ga go se se phalago gore motho a je le go nwa gomme a thabiše moya wa gagwe ka tše botse ka baka la boitapišo bja gagwe. Ke bone gore se le sona se tšwa seatleng sa Modimo wa therešo.”—Mmoledi 2:24.

Le gona Modimo o nyaka gore re rate e bile re hlokomele malapa a rena. Ela hloko tlhahlo ye e bonolo le e šomago yeo e newago setho se sengwe le se sengwe sa lapa.

“Banna ba swanetše go rata basadi ba bona bjalo ka mebele ya bona.”—Baefeso 5:28.
“Mosadi o swanetše go ba le tlhompho e tseneletšego go monna wa gagwe.”—Baefeso 5:33.
“Bana, kwang batswadi ba lena.”—Baefeso 6:1.

Ge e ba re diriša melao yeo ya motheo ya Beibele, re tla hwetša tekanyo e itšego ya lethabo le kgotsofalo. Lega go le bjalo, selo se bohlokwa kudu seo re ka se dirago ke go ithuta ka gohle ka mo re ka kgonago ka Mmopi wa rena le go batamela kgauswi le yena bjalo ka Mogwera wa rena. Ge e le gabotse, Beibele e re laletša gore re ‘batamele Modimo.’ Ke moka e nea kholofetšo ye yeo e kgahlišago, e rego: “O tla le batamela.” (Jakobo 4:8) Ge o amogela taletšo ye, bophelo bja gago bo tla ba le morero wa kgonthe.

Rosalind, yo a tsopotšwego pejana, ga bjale o nagana gore o hweditše morero wa bophelo. O ka bala ka seo a rego se dirile gore a fetoše boemo bja gagwe bja kgopolo sehlogong seo se rego “Beibele e Fetoša Maphelo.”

Bakeng sa tsebišo e oketšegilego mabapi le kamoo o ka phelago ka tsela yeo e kgahlišago Modimo, bona kgaolo 12 ya puku ya Ke Eng Seo ge e le Gabotse Beibele e se Rutago? E ka tšewa go www.pr2711.com/nso

Jesu o Boletše Eng ka Morero wa Bophelo?

Jesu o be a tseba morero wa bophelo bja gagwe gabotse. O itše: “Ke tswaletšwe sona se gomme ke sona se ke se tletšego lefaseng, gore ke hlatsele therešo.” (Johane 18:37) Jesu o feditše bophelo bja gagwe a ruta batho therešo ka Modimo le ka merero ya Gagwe.

Bophelo bja rena bo tla ba le morero wa kgonthe ge e ba re latela mohlala wa Jesu. Ge e le gabotse, Jesu o re laletša gore re ithute go yena. (Mateo 11:29) Ela hloko ditsela tše pedi feela tšeo re ka dirago se ka tšona.

Jesu o rutile gore re swanetše go ‘lemoga gore re nyaka dilo tša moya’ e le gore re thabe. (Mateo 5:3) Re ka kgotsofatša go nyaka ga rena dilo tša moya ka go hwetša tsebo ka “Modimo a nnoši wa therešo le yo [a] mo romilego, Jesu Kriste.”—Johane 17:3.

Jesu o ile a laela balatedi ba gagwe gore ba rute ba bangwe ka seo ba bego ba ithutile sona. O itše: “Ka gona, eyang le dire batho ba ditšhaba ka moka barutiwa, le ba kolobetša leineng la Tate le la Morwa le la moya o mokgethwa, le ba ruta go boloka dilo tšohle tšeo ke le laetšego tšona.”—Mateo 28:19, 20.

Bao ba kgotsofatšago go nyaka ga bona dilo tša moya ka go ithuta Beibele le ka go diriša seo ba ithutago sona ba lemoga gore ba dira diphetogo tše dibotse maphelong a bona. Ba ba le kgodišego ya gore maphelo a bona a na le morero wa kgonthe ge ba thoma go thuša ba bangwe go ithuta ka Modimo.