Ithute Lentšung la Modimo
Na Modimo o tla Tliša Pušo ya Lefase ka Bophara?
Sehlogo se se ahlaahla dipotšišo tšeo o ka bago o ile wa di botšiša le go go bontšha moo o ka balago dikarabo gona ka Beibeleng ya gago. Dihlatse tša Jehofa di tla thabela go ahlaahla dikarabo tše le wena.
1. Ke ka baka la eng batho ba tsoma pušo ya lefase ka bophara?
Lehono, mathata a batho gantši ke a lefase ka bophara. Ditšhabeng tše dingwe, batho ba bantši ba a diila e bile ba gateletšwe. Go tše dingwe, batho ba bantši ba bonagala ba ena le dilo tša go feta tekano. Ke bolaodi bja lefase ka bophara feela bjo bo ka abago ditšweletšwa tša lefase ka go lekalekana.—Bala Mmoledi 4:1; 8:9.
2. Ke mang yo a ka fiwago pušo ya lefase ka bophara?
Kgopolo ya mabapi le mmuši wa lefase ka bophara ga e amogelwe ke batho ba bantši ka baka la gore ga go na monna goba mosadi yo a ka dirago mošomo wo gabotse. Ga go na motho yo a ka amogelwago ke batho bohle. Le gona, ke mang yo a ka se senywego ke matla a bolaodi? Kgopolo ya gore batho ka moka ba bušwe ke motho o tee wa mogateledi e a tšhoša.—Bala Diema 29:2; Jeremia 10:23.
Jehofa Modimo o kgethile Morwa wa gagwe, Jesu, gore a buše batho ka mo go sa felego. (Luka 1:32, 33) Jesu o na le maitemogelo a go phela lefaseng. Ge a be a le lefaseng, Jesu o ile a fodiša balwetši, a ruta ba boleta, gomme a fetša nako a ena le bana. (Mareka 1:40-42; 6:34; 10:13-16) Ka gona, Jesu ke Mmuši yo a swanelegago.—Bala Johane 1:14.
3. Na ruri go a kgonega gore go be le pušo ya lefase ka bophara?
Modimo o kgethile Morwa gagwe gore a buše lefase a le legodimong. (Daniele 7:13, 14) Bjalo ka ge go sa nyakege gore mmuši wa motho a be nageng e nngwe le e nngwe yeo a e bušago, ga go nyakege gore Jesu a be lefaseng ka boyena gore a buše batho.—Bala Mateo 8:5-9, 13.
Na batho ka moka ba tla amogela Jesu e le Mmuši? Aowa. O tla amogelwa feela ke batho bao ba ratago se sebotse. Jehofa o tla fediša lefaseng bao ba sa amogelego Mmuši yo a rategago le yo a lokilego yoo a mo kgethilego.—Bala Mateo 25:31-33, 46.
4. Mmuši wa lefase ka bophara o tla dira eng?
Bjalo ka ge modiši a kgoboketša dinku tša gagwe, Jesu o šetše a kgoboketša batho ba boleta go tšwa ditšhabeng ka moka le go ba ruta ditsela tša Modimo tša lerato. (Johane 10:16; 13:34) Batho ba bjalo e ba bathekgi ba mafolofolo ba Jesu le bogoši bja gagwe. (Psalme 72:8; Mateo 4:19, 20) Go dikologa lefase, balata ba botegago ba Jesu ba tsebatša ka botee gore Jesu ke Kgoši.—Bala Mateo 24:14.
Go se go ye kae, Jesu o tla diriša matla a gagwe a bolaodi go imolla batho pušong yeo e tletšego bomenetša. O kgethile ba bangwe ba balatedi ba gagwe bao ba botegago gore ba buše le yena lefaseng e le dikgoši legodimong. (Daniele 2:44; 7:27) Mmušo wa Jesu o tla tlatša lefase ka tsebo ya Jehofa e bile o tla hloma paradeise ya go swana le yeo e ilego ya lahlega mathomong a histori ya batho.—Bala Jesaya 11:3, 9; Mateo 19:28.