DIPOTŠIŠO TŠA BEIBELE DI A ARABJA
Na re tla ka ra ba le mmušo o tee wa lefase ka moka?
Mmušo wa lefase ka moka o ka kopanya bjang batho ba ditšhaba ka moka? Jesaya 32:1, 17; 54:13
Mmušo wa lefase ka moka o ka kopanya bjang batho ba ditšhaba ka moka? Jesaya 32:1, 17; 54:13
Akanya kamoo mmušo wa lefase ka moka o ka holago batho. Lehono batho ba bantši ba a tlaišega ka ge ba diila kudu, mola ba bangwe ba humile kudu. Eupša mmušo o nago le kwelobohloko wa lefase ka moka o ka kgonthišetša gore batho ka moka ba hwetša dinyakwa tša bona. Na o nagana gore batho ba tla ka ba hlama mmušo o bjalo?—Bala Jeremia 10:23.
Go theoša le histori, mebušo e paletšwe ka ditsela tše dintši go hlokomela balata ba yona, kudukudu badiidi. Mebušo e mengwe e sehlogo. (Mmoledi 4:1; 8:9) Eupša Modimo Ramatlaohle o holofeditše go tliša mmušo woo o tlago go tšeela mebušo e mengwe ka moka legato. Mmuši wa wona o tla hlokomela batho e le ka kgonthe.—Bala Jesaya 11:4; Daniele 2:44.
Mmušo wa Modimo o tla dira eng?
Jehofa Modimo o kgethile Mmuši wa maleba wa lefase, e lego Morwa wa gagwe, Jesu. (Luka 1:31-33) Ge Jesu e be e sa le motho lefaseng, o be a thabela go thuša batho. Ka ge e le Kgoši, o tla kopanya batho ba ditšhaba ka moka gomme a imolla batho tlaišegong ka moka.—Bala Psalme 72:8, 12-14.
Na batho ka moka ba tla amogela Jesu e le Mmuši? Aowa. Eupša Jehofa ga a fele pelo. (2 Petro 3:9) O nea batho sebaka sa go amogela Jesu e le Mmuši. Kgauswinyane, Jesu o tlo fediša batho ba babe lefaseng gomme a dira gore go be le khutšo le tšhireletšego lefaseng ka bophara.—Bala Mika 4:3, 4.