DIPOTŠIŠO TŠA BEIBELE DI A ARABJA

Na polanete ya rena e bile gona ka morero?

Polanete ya rena e hlametšwe gore go be le bophelo go yona. E na le meetse a mantši, ao a lego bohlokwa gore re phele. Go sekama ga lefase ge le dikologa go loketše go thibela mawatle gore a se kgahle goba go bela. Le gona moya wa sebakabakeng le matlakgogedi a lefase a le šireletša phišong e kotsi. Go tswalana ga dimela le diphoofolo mo lefaseng go tloga go makatša. Ka baka leo, batho ba bantši ba phethile ka gore polanete ya rena e hlamilwe ka morero—Bala Jesaya 45:18.

Eupša o ka ipotšiša gore: ‘Na tlaišego le go hloka toka ke karolo ya morero woo?’—Bala Doiteronomio 32:4, 5.

Na morero ka lefase o tla phethagatšwa?

Lefase le be le bopetšwe gore e be legae leo le thabelwago ke batho bao ba hlomphanago le go rata Mmopi wa bona. Ka go re’alo, morero ka batho o feta wa dimela goba diphoofolo. Re ka kwešiša seo Mmopi wa rena a lego sona gomme ra hlompha le go ekiša lerato le toka ya gagwe.—Bala Mmoledi 12:13; Mika 6:8.

Mmopi wa rena o kgona go phethagatša dilo ka moka tšeo a di rerago. Ka gona re ka kgonthišega gore o tla fediša tlaišego le go hloka toka gomme a dira gore polanete ya rena e be legae le le phethagetšego la batho.—Bala Psalme 37:11, 29; Jesaya 55:11.