Letlolo La Dipotšišo

◼ Na ga re neele gabedi bakeng sa dipuku ge e ba re neela nakong ya ge re tšea dipuku le ge re tsenya meneelo e hweditšwego tšhemong ka mapokising a meneelo ao a kgethetšwego bakeng sa modiro wa Mokgatlo wa lefase ka bophara?

Aowa. Meneelo yeo e yago ka mapokising a meneelo bakeng sa modiro wa Mokgatlo wa lefase ka bophara ga se ya dipuku feela. Bobedi bagoeledi le batho bao ba thabelago e le ka kgonthe tšhemong ba hwetša dipuku ka ntle le tefo. Ge bagoeledi ba neela meneelo ya bona, ba neela bakeng sa go thekga go hlokomelwa ga diofisi tša makala, magae a Bethele, dikolo tša boromiwa le tša bodiredi, baromiwa, balebeledi ba basepedi, mafelo a go aba dipuku le ditirelo tše dingwe tše mmalwa tša go thekga tšeo di nyakegago bakeng sa go phetha kabelo ya kakaretšo yeo Jesu a e neilego barutiwa ba gagwe. Go gatiša dipuku ke feela karolo e nyenyane ya se.

Ka gona, ge go amogelwa meneelo go tšwa bathong bao ba thabelago tšhemong, ga se ra swanela go re moneelo ke wa “bakeng sa dipuku.” Go etša ge re ba hlalosetša, bao ba kganyogago e le ka kgonthe go bala dipuku tša rena ba di amogela ka ntle le tefo. Meneelo le ge e le efe yeo batho ba bjalo ba ka e neago e tla dirišetšwa go hlokomela ditshenyagalelo tšeo di akaretšwago modirong wa lefase ka bophara. Se se swanago se šoma le go meneelo yeo e neelwago ke bagoeledi.

Ka gona ga go na lebaka leo ka lona bagoeledi ba swanetšego go šia go kgopela moneelo bakeng sa modiro wa lefase ka bophara, ba ipotša gore ba šetše ba lefeletše dipuku.