Bjala Ka Bontši Gore O Bune Ka Bontši

1 Molemi yo mongwe le yo mongwe o tseba gore ge a bjala peu ya gagwe ka bontši, go ka direga gore a bune ka bontši, eupja ge e ba a bjala ganyenyane, gona ruri o tla buna ganyenyane. (2 Ba-Kor. 9:6) Mohlomongwe ga go na mo gongwe moo sehlogo se se kwalago kudu go feta tabeng ye e lego mabapi le go nea bohlatse ga rena. Go molaleng gore nako e ntši ye re ka e dirišago ge re nea bohlatse, e tla re dira gore re bune kudu ka tsela ya diphihlelo tše di kgahlišago, maeto a go boela ao a nago le dienywa le dithuto tša magae tša Beibele tše di atlegago.

2 Gape re nyaka go bjala ka bontši ge go tliwa dimakasineng, diporoutšheng le dipukung tše dingwe. Ka dinako tše dingwe mo gongwe re di tlogela di kgobelana rakeng ka gae mola di ka be di dirišetšwa go tliša bao ba swanelegago ba lego tšhemong ya rena tsebong ya therešo. (Bapiša le Mateo 25:25.) Anke re naganišišeng ka taba ya go sepedišwa ga dimakasine. Go bile le go fokotšega mo go diregago ganyenyane-ganyenyane dimakasineng tšeo re di sepedišago. Bagoeledi Afrika Borwa ngwageng wa tirelo wa 1993 ba sepedišitše go ya ka palo-gare, dimakasine tše 4,2 ka kgwedi. Gaešita lege go ka ba go e-na le mabaka a mantši bakeng sa se ao a akaretšago maemo a fokolago a tša boiphedišo, fela re dumela gore bagoeledi ba bantši ga ba rulaganye nako ya gore ba be le karolo modirong wa dimakasine ka mehla. Diphuthegong tše dintši go rulagantšwe Letšatši la Dimakasine la beke le beke leo ka lona phuthego ka moka e ka bago le karolo sebopegong se se bohlokwa sa go bjala peu ya Mmušo ka bontši. Go e na le go beela Mokibelo o tee goba e mebedi ka thoko kgweding e nngwe le e nngwe, bagolo ba swanetše go dira dithulaganyo bakeng sa modiro wa dimakasine Mokibelo O MONGWE LE O MONGWE.

3 Mafelong a mangwe banababo rena ba hweditše go sepediša dimakasine go le thata ka baka la bošoro bjo bo tšwelago pele makheišeneng. Bagolo ba swanetše go kgothaletša bagoeledi go šoma mafelong ao a homotšego. Ge e ba go sa kgonege go nea bohlatse setarateng, gona e-yang ka ntlo le ntlo. Ditsejana tša dimakasine ke tsela e nngwe e botse ya go oketša go sepedišwa ga dimakasine gomme mafelelong go thongwe dithuto tša Beibele.

4 Lehlakore le lengwe leo re nyakago go bjala ka bontši go lona ke modirong wa rena wa dithuto tša Beibele. Ka August 1993, go begilwe tlhora e mpsha ya dithuto tše 63887 tša Beibele Afrika Borwa. Le dirile gabotse gomme re rata go reta ka moka bao ba bilego le karolo modirong wo o bohlokwa. Ge molemi a bjala peu, o letela go buna puno e botse. Ka gona go tšwa dithutong tše fetago 63000 tša Beibele tšeo di swarwago, na ga se ra swanela go buna ka mo go oketšegilego barutiwa ba bafsa kgweding e nngwe le e nngwe?

5 Gore re bune bjalo re swanetše go rata go šoma ka thata le go diriša ditšhišinyo ka moka tše dibotse tšeo re di hweditšego ditokollong tša morago bjale tša Tirelo ya Rena ya Mmušo mabapi le dithuto tša Beibele. Na wena ka noši o šetše o dirišitše ditšhišinyo tše? (Ela hloko Tirelo ya Rena ya Mmušo, June go ya go December 1993.) Ke ka baka la’ng o sa dire dikopi tša dihlogo tše gomme wa di boloka mafelelong a puku ya Phela ka mo go sa Felego le ya Go ba Batee Borapeding gore o fele o gaša mahlo go tšona ka mehla? Molebeledi wa tirelo le baswari ba thuto ya puku le bona ba tla rata go diriša dihlogo tše bakeng sa go thuša bohle ba lego ka phuthegong gore ba kgone go swara dithuto tša Beibele, ka go rialo ba kgonthišetša puno e botse ya barutiwa ba bafsa.—Mat. 28:19, 20.

6 Ka moka ga rena re swanetše go ipotšiša gore, Na nka bjala ka bontši kudu bodireding? (1 Ba-Thes. 4:1) Ke ka baka la’ng le sa dule fase gomme la naganišiša le le motho ka o tee ka o tee goba le le lapa, kamoo le ka bago le karolo e kgolo ka gona go abjeng ga dimakasine. Ge e ba o se na thuto ya Beibele mo nakong ye, gona e kgopele ka thapelo gomme o šome ka thata tšhemong gore o e hwetše. Ge e ba o swara thuto, gona diriša ditšhišinyo tšeo di newago ka mokgatlo wa Jehofa bakeng sa go kgonthiša gore o tla buna mafelelo ao a kgahlišago. Ka go dira se re tla buna mo gontši kudu go dira gore Jehofa a tumišwe.