Kgothaletša Go Phegelela Dipakane Tša Moya

1 Ga se gwa ka gwa ba le bafsa ba bantši gakaakaa bao ba kopanelago go boleleng ditaba tša Mmušo! Ba dikete tše masome ba amogela keletšo e lego go Mmoledi 12:1, e rego: “Xopola Mmopi wa xaxo Ò sa le yo mofsa.” Ke’ng seo se tutuetšago bafsa ba gore ba kopanele ka mehla bodireding, gona ke ka baka la’ng ba bantši gakaakaa ba bona ba tsenela tirelo ya bobulamadibogo?

2 Ga go na pelaelo gore ba bantši ba ekiša boitshwaro bja lesogana le le tumilego Timotheo. Mmagwe le makgolo’agwe ba ile ba mo hola ka thuto ya moya go tloga bjaneng le go mo kgothaletša gore a phegelele dipakane tša moya. (2 Tim. 3:14, 15) Ke ka fao, ge sebaka sa ditokelo tše di oketšegilego tša tirelo se tšwelela, a ilego a swanelega le go ba yo di a loketšego.—Dit. 16:1-3.

3 Bafsa ba bangwe ba ka kgothaletšwa bjang go phegelela dipakane tša moya? Ke motheo wa mohuta mang woo o ka thewago? Batswadi ba ka aga bjang go rata therešo baneng ba bona le go ba thuša gore ba ipeele dipakane tša nako e telele?

4 Bea Motheo wa Mangwalo: Batswadi ba swanetše go kgonthišetša gore seo ba se rutago bana ba bona ke seo se tšwago go Jehofa e le gore ba kgone go dira gore bana ba bona ‘ba hlalefišetšwe phologo.’ (2 Tim. 3:15) Katanela go ba tsenya lerato le legolo la go rata Lentšu la Modimo, Beibele. Se se nyaka thuto ya ka mehla ya Beibele ye e nago le morero, yeo e feto-fetolwago go ya ka dinyakwa tša bona, gotee le go ba gona dibokeng ka mehla. Gore bafsa ba bantši ba be le tumelo e tiilego yeo e tlago go ba hlohleletša gore ba phegelele dipakane tša moya, ba swanetše go ba le lenaneo la bona ka noši la thuto ya motho ka noši gomme ba godiše tswalano ya bona le Jehofa.—1 Ba-Thes. 5:21; Ba-Heb. 11:1.

5 Bafsa ba Bakriste ba tla ikemišetša kudu go phegelela dikgahlego tša moya ge e ba batswadi ba bona le batho ba bangwe bao ba godilego ka phuthegong ba bea mohlala o mobotse le go bonagatša “lethabo la Jehofa.” (Neh. 8:10, NW) Ka go bonagatša lethabo, ka moka ga rena re ka thuša bafsa go lemoga gore dinyakwa tša Bokriste bja kgonthe ga di boima.—1 Joh. 5:3.

6 Bafsa ba bantši ba tutueditšwe ke babulamadibogo, baromiwa le balebeledi ba basepedi bao ba ilego ba šoma le bona tirelong ya tšhemo goba ba ba lahlela lentšu la kgothatšo. Batswadi ba ka thuša ka go laleletša badiri bao ba beago mohlala ba nako e tletšego magaeng a bona bakeng sa dijo goba mabakeng a mangwe bakeng sa go ba gotee e le Bakriste. Jesu Kriste o beile mohlala o mobotse kudu wa go nea tlhokomelo e leka-lekanego go bana.—Mar. 10:13-16.

7 Go Bea Dipakane: Ka tlhahlo e swanetšego ya batswadi, bana gantši ba ipeela dipakane tša bona e sa le ka pela bophelong. Ge bana ba šetše ba kgethile dipakane tše di swanetšego tša moya tšeo ba nyakago go di fihlelela, e ka ba tirelo ya bobulamadibogo, go hlankela moo go nyakegago thušo e kgolo, Bethele goba tirelo ya bobulamadibogo bjo bo kgethegilego, bjalo, bjalo, batswadi le batho ba bangwe ba bagolo ba ka ba kgothatša ka botho gore ba tšwele pele ba katanela pakane ya bona, ba ba nea dikeletšo bakeng sa go ba hlohleletša.

8 Phuthego e nngwe le e nngwe e swana le lapa. Ka gona, o mongwe le o mongwe wa rena o swanetše go ba le kgahlego ya go thuša bafsa gore ba tšwele pele ba sepela therešong le go dira tšwelopele moyeng. Re ka dira bjalo ka go ba kgonthišetša gore re a ba rata le go ba kgothaletša gore ba phegelele dipakane tša moya.