Go Ja Dijo Tša Moya Ka Mehla Go Bohlokwa Bakeng Sa Lapa La Bokriste

1 “Motho xa a phele ka boxôbê fêla; ó phela ka mantšu ohle a a tšwaxo molomong wa Modimo.” (Mat. 4:4) Mantšu ao ke therešo gakaakang! Go etša ge re nyaka dijo tša go fepa mmele letšatši le letšatši, go bjalo le ka go ja dijo tša moya. Go re thuša gore re iphepe ka Lentšu la Modimo ka mehla, Mokgatlo o gatišitše pukwana ya Go Hlahloba Mangwalo ka Mehla. Bjalo ka lapa la Bokriste, na le beela nako ya go hlahloba temana ya letšatši ka thoko?

2 Batswadi ba Swanetše go Bea Mohlala: Ka baka la go dula re swaregile, go bonolo go thišiša go hlahloba temana, re nagana gore go tla dirwa ka nako e nngwe. Eupja ge e ba batswadi ba hlokometše dinyakwa tša moya tša lapa, ba tla hwetša sebaka, ee ba tla bula sebaka letšatšing le lengwe le le lengwe bakeng sa gore lapa le be gotee. (Mat. 5:3, bapiša le NW.) Ba tla gata mogato wa pele e sego ka go fo bala temana ya letšatši le bana ba bona, eupja le go gatelela dintlha ditlhalosong tša Morokami le go ahla-ahla kamoo tsebišo le keletšo di ka dirišwago ka gona ka mo go holago. Ke therešo gore go ka nyakega boiteko gore mokgwa o itšego o tlwaelwe, eupja go a hola. (Bapiša le Ditiro 17:11, 12.) Ka gona, batswadi, katanelang go bea mohlala o mobotse!

3 Nyaka Nako e Botse: Nako e kaone kudu ke efe ya gore lapa ka moka le be gotee gore le boledišane ka temana, le sa dire gore e be taba e tlago ka sewelo? Go na le mohola wa go thoma letšatši ka go hlahloba temana ya Beibele. Bethele le magaeng a baromiwa lefaseng ka bophara, letšatši le thoma ka borapedi bja mesong, go akaretša le go ahla-ahla temana ya letšatši ka boripana. Se se thuša banababo rena gore ba thome letšatši la bona gabotse, ba naganišiša ka dikgopotšo tša Jehofa letšatši le letšatši.—Ps. 1:1, 2; Ba-Fil. 4:8.

4 Malapa a Bakriste le wona a ka holega poledišanong ya Beibele ya mesong. Bana ba ka thušwa go lebana le dilo tšeo di beago boemo bja bona bja moya kotsing tšeo ba gahlanago le tšona sekolong. Ge e ba ka lebakanyana go sa kgonege gore lapa ka moka le dulele poledišano ya temana ya letšatši, gona batswadi ba ka nagana ka dithulaganyo tše dingwe gore phepo ye e bohlokwa ya moya e se fošwe. Ka mohlala, ge e ba tate a swanelwa ke go ya mošomong pele bana ba tsoga mesong, mma mohlomongwe a ka diriša nako e itšego a ahla-ahla temana le bana. Ka lehlakoreng le lengwe, malapa a mangwe a rulaganyetša go ahla-ahla temana mantšiboa ka ge a e-ba gotee ka nako yeo. Lapa le lengwe le lengwe le ka dira lenaneo leo le swanelago maemo a lona gabotse.

5 Phepo ya moya ya letšatši le letšatši e bohlokwa bakeng sa lapa la Bokriste. Go hlahloba temana ya letšatši a go etišweng pele. (Ba-Fil. 1:10) Go ahla-ahla temana ya Beibele ya letšatši le letšatši go tla re thuša gore re kgomarele melao ya motheo le melao ya go loka ya Jehofa. Tirišano ya setho se sengwe le se sengwe sa lapa e tla dira gore thulaganyo ye e hole bohle.