Bontšha Go Kgomega Ka Bao Ba Thabelago

1 Ka godimo ga tšohle, Jehofa e bile yo botho kudu tabeng ya go bontšha go kgomega ka batho. Ga se a nea feela dilo tše di bonagalago ka bontši eupja o re neile le dilo tša moya tšeo re di nyakago le tše re di thabelago. O kgomegile kudu ka rena mo e lego gore o bile o hlahloba seo se lego ka dipelong tša rena.—Ps. 139:23.

2 Nakong ya ge Jesu a be a le lefaseng, o ile a latela mohlala wa Tatagwe ka mo go phethagetšego tabeng ya go bontšha go kgomega ka ba bangwe. Na o gopola monna yo a ilego a re go Jesu, “Morêna, xe O ka rata, O ka kxôna xo mphodiša”? Jesu o ile a araba ka gore, “Ke rata fao!” (Mat. 8:1-3) Ge Jesu a be a bona mohlologadi a le manyaming, o ile a dira’ng? O ile a ema gomme a mo thuša. (Luka 7:11-15) Na o ka ba yo a phafogetšego kudu go bontšha go kgomega ka bao ba thabelago?

3 Ka go ekiša Tatago rena Jehofa le Morwa wa gagwe Kriste Jesu, le rena re swanetše go bontšha go kgomega ga motho ka noši ka ba bangwe. Re dira se ka go boloka pego e nepagetšego ya ntlo le ntlo. Se se akaretša go ngwala leina le aterese e nepagetšego ya motho yo a thabelago gotee le taba yeo re boletšego ka yona ketelong ya pele. Ke moka pele re boela, re lokišetše gabotse. Ge e ba re tlogetše dimakasine ketelong e fetilego, mohlomongwe leeto la rena la go boela le ka thewa kgopolong e itšego yeo e bolelwago ka go se sengwe sa dihlogo. Ela hloko kamoo se se ka dirwago ka gona.

4 Ge e ba o tlogetše Morokami wa October 1, 1992, gomme o ile wa lebiša tlhokomelo sehlogong se se rego, “Na Batho Ruri ba Nyaka Mesia?,” mo gongwe o ka lokišeletša go gatelela Kutollo 21:4 le Johane 17:3 leetong la gago la go boela.

Ka mohlala, ka morago ga go bala Kutollo 21:4, mo gongwe o ka botšiša:

◼“Re ka ba bjang karolo ya lefase le bjalo? [Emela karabo.] Theetša seo Mesia a boletšego gore se be se nyakega e le gore go hwetšwe bophelo lefaseng la go swana le le.” Ke moka bala Johane 17:3, o gatelela gore bophelo bjo bo sa felego lefaseng le lefsa la khutšo bo ka hwetšwa ka go monya tsebo ya go tseba Modimo le Kriste. Ge e ba go e-na le go thabela mo go itšego, leka go thoma thuto ka pampišana ya Bophelo Lefaseng le Lefsa la Khutšo.

5 O ka hwetša karabelo e botse ka go bolela ka ntlha yeo e kgethilwego go tšwa go Phafoga! ya October 8, 1992 yeo e bolelago ka taba ya gore “O ka Kgona go Fenya Maikwelo a go se Thabe.” Ge o boela, mo gongwe o ka thea poledišano ya gago go Ba-Filipi 4:6, 7.

Mo gongwe o ka botšiša:

◼“Ke’ng seo o dumelago gore ke tharollo ya go fenya maikwelo a go se thabe lehono?” Dumela karabo gomme ka morago o re: “Ka mo go kgahlišago, Beibele e akaretša melao ya motheo yeo ge e ba e dirišwa e tlaleletšago khutšong ya monagano le ya pelo. [Lebiša tlhokomelo dintlheng tše swanetšego go tšwa go Ba-Filipi 4:6, 7.] Beibele e šupa go nako yeo ka yona bohle ba tlago go phela ka melao ya motheo ya Beibele gomme go ka se sa hlwa go e-ba le maemo ao a bakago maikwelo a go se thabe.” Ke moka gatelela ditšhegofatšo tše dingwe tša nakong e tlago ka go hlahloba pampišana ya Bophelo Lefaseng le Lefsa la Khutšo, gomme o lebiše thutong.

6 Go thwe’ng ge e ba mong wa ntlo a šetše a e-na le ye nngwe ya dipuku tša rena? Ke ka baka la’ng o sa e dirišetše go thoma thuto? Ge e ba e le puku ya Phela ka mo go sa Felego, bula go karolo ya dikagare gomme o kgopele mong wa ntlo gore a kgethe taba yeo a tla ratago go boledišanwa ka yona. Ka gona o ka thoma thuto ka go hlahloba serapa goba tše pedi.

7 Go bontšha go kgomega ka bao ba thabelago ka go lokišetša gabotse le go dira maeto a go boela a atlegago go bontšha gore re baekiši ba Modimo le Kriste, re nyaka ge ba bantši ka mo go ka kgonegago ba ka phološwa.—1 Pet. 3:9.