Diboka Tša Tirelo Tša October
Beke e Thomago ka October 5
10 mets:Ditsebišo tša phuthego, Ditsebišo tše di kgethilwego go Tirelo ya Rena ya Mmušo le dintlha tše kgolo go tšwa go Ditaba tša Pušo ya Legodimo. Hlahloba dihlogo tše kgahlišago go tšwa dimakasineng tša morago bjale; e-ba le pontšho e tee goba tše pedi tše kopana tšeo di bontšhago kamoo di ka sepedišwago ka gona ka morago ga ge go dirišitšwe poledišano ya Mangwalo pele.
15 mets:“Diriša Dimakasine ka mo go Holago.” Dipotšišo le dikarabo. Kgothaletša banababo rena gore ba bolelele dipeeletšo go bohle bao ba kopanago le bona ka October. Ge le ahla-ahla serapa 6, nea ditšhišinyo tša kamoo go ka thongwago tsejana ya makasine ka gona: Diriša matseno a bonolo le a lebanyago; boloka pego e botse ya ntlo le ntlo; hlohleletša kgahlego ditokollong tša nako e tlago ka go bolela dihlogo tše tlago; kgonthišetša gore o boela dibekeng tše dingwe le tše dingwe tše pedi.—kmSE 7/84 letl. 8.
20 mets:Go swara Thuto ya Puku ya Phuthego ka puku ya Motho yo a Phagamego Kudu. Moswari wa Thuto ya Puku ya Phuthego o diriša sehlopha sa bagoeledi ba bane goba ba bahlano go bontšha phuthego kamoo thuto e swarwago ka gona. Pontšho ye e swanetše go boeletšwa gabotse le go swarwa go ya ka ditaelo tše di akareditšwego go Tirelo ya Rena ya Mmušo ya September. Diriša kgaolo 11 ya puku ya Motho yo a Phagamego Kudu. Bontšha kamoo mangwalo a matelele ao a bontšhitšwego a ka arolwago ka gona e le gore go dumelelwe babadi ba fetago o tee goba go gatelelwa ga dikarolo tša bohlokwa ge nako e sa dumele gore go balwe ditemana ka moka. Moswari a ka tsenya ditlhaloso tše kopana tše lebišitšwego go batheetši go hlalosa mokgwa wo o dirišwago. O mongwe le o mongwe go batheetši o swanetše go ba a latela ka koping ya gagwe ya puku.
Kopelo 63 le thapelo ya go phetha.
Beke e Thomago ka October 12
10 mets:Ditsebišo tša phuthego. Bala pego ya kgwedi le kgwedi ya ditšhelete; nea theto yeo e theilwego go 2 Ba-Korinthe 9:6, 7. Kgopela bagoeledi bao ba lokišeditšego gore ba laodiše diphihlelo tše kgahlišago tša go sepediša dimakasine le dipeeletšo ka October.
15 mets:“Aga Matseno a Tutuetšago.” Nea polelo yeo e ahla-ahlago tsela ya go lokišeletša dithero go dirišwa dihlogo tše di kgahlišago tšeo di lego ka go dimakasine tša October. Rulaganyetša gore bagoeledi ba babedi goba ba bararo bao ba swanelegago ba dire pontšho ka dithero tšeo di šišintšwego; akaretša thero e tee ka mogoeledi yo monyenyane.
20 mets:“Bontšha go Kgomega ka Bao ba Thabelago.” Boledišana le batheetši. Ge le ahla-ahla serapa 2, laodiša dintlha tše di kgethilwego go tšwa go Morokami wa December 1, 1981, matlakala 3-5, o bontšha kamoo re ka ekišago Jesu ka gona ka go bontšha go kgomega ka ba bangwe. Akaretša ditlhaloso mabapi le kamoo go ka tlatšwago pego ya ntlo le ntlo ka gona le kamoo e swanetše go dirišwa ka gona go latelela kgahlego. Ka boripana dira pontšho ya tšhišinyo e tee. Ka morago ga gore mogoeledi yo a swanelegago a dire pontšho ya mokgwa wo o šišintšwego, kgopela batheetši gore ba hlalose mabaka ao ka ona seo e ka bago tsela e atlegago ya go thoma dithuto tšhemong ya lefelong leo.
Kopelo 88 le thapelo ya go phetha.
Beke e Thomago ka October 19
5 mets:Ditsebišo tša phuthego. Ka boripana hlalosa kamoo go tlatšwago dikgoba tša dipeeletšo ka gona, gomme o hlaole ngwanabo rena goba banababo rena bao ba abetšwego go amogela dipeeletšo.
20 mets:“Thuša Bana go Hlankela Jehofa go tšwa Pelong.” Poledišano le batheetši. Gatelela go nyakega ga gore batswadi ba phethe boikarabelo bja bona bja go bea mohlala le go tlwaetša bana ba bona ka noši bodireding. Kgopela motswadi o tee goba ba babedi gore ba laodiše seo ba se dirilego gore ba hwetše mafelelo a mabotse. Dira gore motswadi a bontšhe kamoo a thušitšego ngwana go lokišeletša poledišano ya Beibele bakeng sa go e diriša bodireding bja ntlo le ntlo. Phetha ka go dira gore mofsa a bontšhe e nngwe ya dipoledišano tše di šišintšwego.
20 mets:“Kopano ya Selete ya ‘Barwadi ba Seetša’ ya 1992”—Karolo 1. Poledišano le batheetši ka dirapa 1-12. Bagoeledi ba ka rata go bolela ka dintlha tše di swanetšego le barutwana ba bona ba Beibele bao ba tlago go ba gona kopanong. Gopotša phuthego ka kopano yeo e tlago go ba e e-ya go yona gomme le bee lengwalo (la May 2, 1992) letlapeng la ditsebišo.
Kopelo 221 le thapelo ya go phetha.
Beke e Thomago ka October 26
10 mets:Ditsebišo tša phuthego. Ahla-ahla mpho ya November, e lego Beibele—Na ke Lentšu la Modimo Goba la Motho? Kgothaletša bagoeledi gore ba hwetše sesola sa mpho gomme ba itokišetše go e sepediša ka Sontaga, November 1. Kgothaletša bohle go nagana ka kgonagalo ya go tsenela bobulamadibogo bja go thuša ka November goba December nakong yeo ka yona matšatši a maikhutšo gantši a dirago gore go be le nako e oketšegilego.
15 mets:“Kopano ya Selete ya ‘Barwadi ba Seetša’ ya 1992”—Karolo 2. Poledišano le batheetši ka dirapa 13-18 le tlhahlobo e kopana ya “Dikgopotšo tša Kopano ya Selete” ge nako e dumela. Akaretša dikgopotšo tše swanetšego tšeo di theilwego tsebišong yeo e lego go Morokami wa June 15, 1989, matlakala 10-20. Kgothaletša dihlopha ka moka tša malapa gore di hlahlobe dintlha tše di lego dihlogong tše pele di e e-ya kopanong.
10 mets:Letlolo la Dipotšišo. Boledišana le batheetši. Gatelela lebaka leo ka lona go lego bohlokwa gore bana ba be le botumo bja go ba le boitshwaro bjo bobotse le kganyogo ya kgonthe ya go ba le karolo bodireding bja tšhemo e le gore ba swanelege bjalo ka bagoeledi ba sa kolobetšwago.
10 mets:“Oketša go ba ga Gago le Karolo go Abeng Dimakasine.” Polelo ka molebeledi wa tirelo, ka borutho a kgothaletša phuthego gore e thekge dithulaganyo ka moka tša modiro wa dimakasine, kudu-kudu ka Mekibelo. Hlahloba go sepediša ga phuthego dimakasine dikgweding tše sego kae tše fetilego. Thuša bohle gore ba kgomege ka dimakasine gomme ba ipeele pakane ya motho ka noši.
Kopelo 111 le thapelo ya go phetha.