Kgonthišetša Gore O A Boela

1 “Ke godišitšwe ke le Mokatholika, ka tsena kereke ya Methodist lebakeng la ge ke be le kholetšheng, ka beana mabaka le lesogana la bodumedi bja Bojuda, ka morago ka nyalwa ke mo-Luthere. Le ka mohla ga se ka thabišwa le ke bjo tee bja madumedi a, ao a bego a dutše a ‘fetoga le dinako.’ Ke ile ka thoma go bala puku ya O ka Phela ka mo go sa Felego Paradeiseng mo Lefaseng ka go dika-dika mathomong gomme ke kgahlwa ke diswantšho tše di botse. Ke ile ka nwelela go yona gomme ka bala seripa sa mafelelo ka phišego ka diiri tše nne. [Ke leboga Modimo] ka tsebo ya-ka e mpsha le khutšo ya-ka ya ka gare.” Ke ka mo go ngwadilego mosadi o mongwe yo mofsa wa kua U.S.A., bjalo ka ge go begilwe go Morokami wa February 1, 1988, letlakala 32.

2 Ka ge puku ye e e-na le dilo tše bjalo tše botse, na rena ka moka ga se ra swanela go nea thekgo ka pelo ka moka tabeng ya go iša puku ya Phela ka mo go sa Felego diatleng tša batho bao ba thabelago ba bantši ka mo go ka kgonegago ka gona? Ka gona, re swanetše go kgonthišetša gore re dira maeto a go boela gore re hlohleletše kgahlego e tšwelago pele ya go kgahlegela puku ye e kgahlišago.

3 Ka ge puku ya Phela ka mo go sa Felego e hlametšwe go swara dithuto tša Beibele, re ka tsena modirong wo ka phišego le ka kgodišego. O se ke wa dika-dika go boela go batho ba thabelago. Gaešita lege ba amogetše puku, dikgateletšo tša bophelo bja letšatši le letšatši di ka nyameletša kgahlego ka pela, go etša ge Jesu a bontšhitše papišong ya gagwe ya mobjadi. (Mat. 13:18-23) Mo gongwe go ka tšea maeto a mmalwa a go boela pele thuto e ka thongwa.

4 Go Diriša Puku ya Phela ka mo go sa Felego go Thoma Thuto ya Beibele: Mo gongwe o ka rata go leka matseno a ge o boela go motho yo a thabelago: “Puku ye e araba dipotšišo tše dintši tša motheo tšeo batho gantši ba di botšišago ka Modimo le Beibele. Ka mohlala, madumedi a mantši a ruta gore dihele ke lefelo la tlhokofatšo e sa felego ya ba kgopo. Ke’ng seo wena o se dumelago ka taba ye? [Letela karabo.] Na o be o ka se thabele go tseba karabo e nepagetšego ya Beibele ya potšišo yeo?” Mo kgopele gore a phetle letlakala 81 ka koping ya gagwe ya Phela ka mo go Felego gomme a bale sehlogo sa kgaolo 9. Kgopela mong wa ntlo gore a hlahlobe dirapa tše tharo tša pele. Bala dipotšišo tše di ngwadilwego gomme o thuše mong wa ntlo go hwetša dikarabo dirapeng tše di sa tšwago go balwa. Ka morago ga go hlahloba dirapa tše tharo tša pele, botšiša mong wa ntlo ge e ba o ka boa bekeng e latelago go tlo tšwetša poledišano pele. Mmontšhe kamoo a ka lokišetšago ka gona ka go thalela dikarabo tša dipotšišo tše di ngwadilwego le go lebelela mangwalo ka Beibeleng ya gagwe ka noši.

5 Goba mo gongwe o ka re:

◼“Ge ke be ke go etetše matšatšing a sego kae a fetilego re ile ra boledišana ka kholofetšo ya Beibele ya gore lehu le ka se sa hlwa le e-ba gona. Na o kile wa ka wa nagana ka go phela ka mo go felego? [Letela karabo.] Ke therešo gore batho ba bantši ba be ba ka se kgahlwe ke kgopolo ya go dira bjalo ka baka la go tlaišega, bošoro le tlala tšeo di šetšego di re hlasela.” Ge o dutše o phetla go matlakala 11-13, mo gongwe o ka re: “Eupja a re re mohlomongwe o phela ka mo go sa felego maemong a go swana le a—na se se be se ka se kgahliše? [Letela karabo.] Lega go le bjalo, gore re tle re dire bjalo, go nyakega selo se sengwe go rena. Ela hloko seo serapa 19 se se bolelago. [Bala.] Anke ke go bontšhe kamoo puku ye e hlametšwego go go thuša go dira sona seo.”

6 Puku ye e botse e thušitše batho ba dikete go hwetša tsela e išago bophelong. O se ke wa palelwa ke go boela le go latelela kgahlego moo e bontšhitšwego gona. Kgopela Jehofa gore a go thuše, gomme ka morago o kgathe tema ya gago ka go diriša ka mo go holago thušo ye e botse ya go ithuta Beibele tabeng ya go thuša batho ba bangwe go tseba kholofelo ya go phela ka mo go sa felego Paradeiseng mo lefaseng.