Retang Modimo Wa Tlholo
1 Mafelo a mabotse a tlhago, go sobela ga letšatši ka mebala-bala, magodimo a tletšego dinaledi a bošego le melodi ya dinonyana—o iša tumišo go mang bakeng sa dilo tše tše di kgahlišago? Ee, re tutueletšega go reta Modimo wa tlholo. Re dumelelana ka pelo ka moka le polelo e lego go Kutollo 4:11. Jehofa Modimo o swanelwa ke gore re mo rete ka ge a hlotše dilo ka moka.
2 Ka September, rena bjalo ka bahlanka ba Jehofa re na le sebaka sa go neela therešo mabapi le Mmopi wa rena le morero wa gagwe o makatšago ka lefase le. Puku ya O ka Phela ka mo go sa Felego Paradeiseng mo Lefaseng ke e nngwe ya dipuku tše dibotse kudu tšeo re kilego ra ba le tšona tša go thuša batho go kwešiša Beibele. Puku ye e re hlamela go šireletša ditherešo tša motheo tša Beibele ka sebete.
3 Dibaka tša go Sepediša Puku: Go ka re thuša ge e ba ka kelohloko re dira lelokelelo la dibaka tša go sepediša puku ye e botse. Ga go na pelaelo gore modiro wa ntlo le ntlo e tla ba tsela ya motheo ya go sepediša dipuku tša Phela ka mo go sa Felego. September ke kgwedi ya pele ya ngwaga o mofsa wa tirelo. Na o ka rulaganyetša go ba le nako e oketšegilego ya go ba le karolo modirong kgweding ye? Diphuthego tše dintši di tla ba di bile di šoma le tšhemo e sa abjago. Ke ka baka la’ng o sa oketše maiteko a gago ka go sepedišetša batho ba ka moka bao ba hwetšago molaetša ka sewelo kudu puku ye? Puku e nyenyane ya Phela ka mo go sa Felego e ka kgona go fihlelelwa kudu ke batho bao ba phelago mafelong a diilago kudu.
4 Dihlatse tšeo e sa lego bafsa le tšona di tla rata go sepedišetša bao ba tsenago le bona sekolo le barutiši ba bona puku ye. Ke ka baka la’ng o sa ye go morutiši o mongwe le o mongwe le go o mongwe le o mongwe wa bao o tsenago le bona sekolo bao o naganago gore ba tla thabela go bala puku ye e botse? Ke maemong afe a mangwe ao mo gongwe re ka sepedišago puku ya Phela ka mo go sa Felego go ona? Mootledi o mongwe wa lori o ile a sepedišetša batho bao a ilego a gahlana le bona puku maetong a gagwe. Thero ya gagwe e be e le bonolo. O ile a bontšha batho puku gomme a tlhalosa gore o ithutile dilo tše dintši tšeo di makatšago go yona le gore ge e le gabotse seo a ithutilego sona go yona se fetotše bophelo bja gagwe. Dikgweding tše tharo o sepedišitše dipuku tše 200 tša Phela ka mo go sa Felego ka mokgwa wo wa go nea bohlatse bjo bo sa rulaganyetšwago.—wSE84 5/1 26-8.
5 Bodireding bja ntlo le ntlo, go neeng bohlatse setarateng, go direng maeto a go boela—go kgothaletšwa gore mogoeledi o mongwe le o mongwe a be le kopi goba tše otšegilego tša puku ya Phela ka mo go sa Felego. O se ke wa ya tšhemong o se wa e swara! Go ba ga gago le pono e botse go sepedišeng puku, o hlalosa dikagare tša yona le go e sepediša go tla bula tsela ya go thoma dithuto tše dintši tše difsa tša magae tša Beibele.
6 Anke o mongwe le o mongwe wa rena a rapelele thušo ya Jehofa e le gore re ka diriša sebaka se sengwe le se sengwe go botša batho ka Mmopi wa rena yo a makatšago. Tsoma ditsela tša go sepediša puku ya Phela ka mo go sa Felego. Eka sedirišwa se se sebotse se ka hlohleletša kganyogo ya go phela ka mo go sa felego ka go batho ba bantši kudu e le go tumiša Monei wa bophelo le “e a dirilexo maxodimo le mafase.”—Ps. 146:6.