Kgetha Dintlha Tše Di Swanetšego Tšeo Di Ka Bolelelwago

1 Ke’ng seo re ka se dirago go kgothaletša batho go bala Morokami le Phafoga! ka mehla? Re swanetše go ba le dintlha tše di kgahlišago tšeo re ka bolelago ka tšona ge re neela ba bangwe dimakasine. Ge e ba re tlwaelane gabotse le batho tšhemong ya rena gomme re nagana ka bona ge re bala dimakasine, re ka ba re nyaka dintlha tše di ka bolelelwago bakeng sa go tanya kgahlego ya bona.

2 Mafelong a mangwe batho ba ka ba ba e-na le setšo se se swanago, ba dira gore go be bonolo kudu go lemoga selo seo se ka bago se kgahliša bohle. Eupja mafelong a mangwe, re ka hwetša batho bao ba tšwago ditšong tše dintši tše di fapanego. Ge e ba re e-na le dintlha tše dintši tše di ka bolelelwago monaganong, re ka kgetha e tee yeo e swanelago motho o mongwe le o mongwe yo re gahlanago le yena gakaone.

3 O se ke wa akgofela go lahla ditokollo tša kgale tša dimakasine ge o amogela tše difsa. Ngwanabo rena o mongwe gantši o bontšha mong wa ntlo ditokollo tša go fihla go tše tharo goba tše nne tša Morokami gomme a mo dumelela go kgetha tšeo a ratago go di bala. Ge e ba re hwetša gore re amogela dimakasine tše dintši go feta tšeo re kgonago go di aba, re swanetše go nagana ka go fetola otara ya rena.

4 Ka go diriša ka mehla dintlha tše di swanetšego tšeo di ka bolelelwago, re ka tutueletša ba bangwe go bala dimakasine tša rena, mohlomongwe le go tsenya batho ba bjalo tseleng e išago bophelong. (Mat. 7:14) Ge e ba re naganišiša ka taba ye e bohlokwa ka kelohloko, gona re ka kgonthišega ka tšhegofatšo ya Jehofa.