Hola Ba Bangwe Ka Go Diriša Dimakasine

1 Re thaba gakaakang ge re amogela ditokollo tša morago-rago tša Morokami le Phafoga! Re diriša ka mo go holago sebaka sa go di bala kapejana ka mo go kgonegago e le gore re ka holwa ke tsebišo yeo e neilwego. Go oketša tabeng ya go nyaka sehlogo seo se ka thušago rena ka noši, ke mo gobotse go nyaka dintlha tšeo di ka dirišwago ge go neelwa dimakasine go ba bangwe. Mo gongwe re ka rata go swaya dikarolo tšeo ka mo go kgethegilego di tlago go ipiletša go bao ba lego tšhemong ya phuthego ya rena, goba gaešita le go ngwala dintlha ka mathoko koping ya rena bakeng sa go ikgopotša dintlha tšeo re ka di bolelelago le kamoo sehlogo se ka rolwago ka gona tšhemong ya rena.

2 Dimakasine tša rena di na le mohola o sa felego. Gaešita lege mo gongwe re ka lebiša tlhokomelo kudu go sepedišeng dimakasine tša gona bjale, ga go nyakege gore re lahle ditokollo tša kgale ka ge molaetša ka bowona o sa fetwe ke nako. Boloka ditokollo tša kgale ka mokotleng wa gago wa tšhemo e le gore o be le tšona ge o nea bohlatse. Tše di ka thuša ka mo go kgethegilego ge senyakwa se itšego sa mong wa ntlo se thoma go tsebja. Dikamasine tša kgale di ka dirišwa gape nakong ya lesolo la tšhemo e sa abjago.