Thea Motheo Ketelong Ya Gago Ya Mathomo

1 Go dira dipoelo tšeo di atlegago go ba bonolo kudu ge re thea motheo o swanetšego ketelong ya mathomo. Puku ya Go Boledišana e ka re thuša go dira seo.

2 Thero e latelago e theilwe matsenong a bobedi a lego go letlakala 9 la puku ya Go Boledišana ka tlase ga sehlogo se se rego “Beibele/Modimo.”

Ka morago ga ditumedišo tša bogwera, e re:

◼“Re lemoga gore batho ba bantši lehono ba ikwa ba sa kgonthišege ge e le ka moo ba ka hwetšago ditharollo tše di holago bakeng sa mathata ao a oketšegago a letšatši le lengwe le le lengwe. Na o hweditše seo e le therešo? [Dumelela karabo.] Batho ba kile ba lebelela Beibeleng bakeng sa thušo. Eupja mo nakong ye ba bantši ba bolela gore ba na le dipelaelo. O ikwa bjang ka Beibele?” Ge e ba mong wa ntlo a bontšha go se kgodišege ka go rereša ga yona, gona ntšha pampišana ya Lebaka Leo ka Lona o ka Botago Beibele gomme o bale serapa sa bobedi le sa boraro go letlakala 2. Ge e ba mong wa ntlo a dumela gore Beibele ke Lentšu la Modimo, phetla gomme o bale mangwalo ao a bontšhitšwego go serapa sa bobedi go letlakala 2 la pampišana, o boledišane le yena ka boripana ka ona. Neela mpho ya kgwedi.

3 Ge e ba go e-na le batho ba bantši tšhemong ya lena bao ba bontšhago go se dumele, leka go diriša matseno a bohlano a lego go letlakala 10 la puku ya Go Boledišana bakeng sa go tsoša kgahlego ya bona.

O ka re:

◼“Ka baka la dikgohlano ka moka tšeo di lego lefaseng lehono, batho ba bantši bao ba botegago ba hwetša go le thata go dumela go Modimo. Goba ge e ba ba dumela go yena, ga ba dumele gore a ka kgona go rarolla mathata ao re lebeletšanego le ona. O ikwa bjang?” Dumelela karabo. Bala matseno a puku ya Lentšu la Modimo go letlakala 5. Kgopela pono ya mong wa ntlo mabapi le potšišo ya mafelelo e rego: “Na o nagana gore mathata a go swana le a a tla ka a rarollwa?” Tšwetša poledišano pele ka go bala dikarolo tše di swanetšego dirapeng tše hlano tše di latelago tša kgaolo ya pele. Neela mong wa ntlo puku gomme o rulaganyetše go boela bakeng sa go tšwela pele ka poledišano.

4 Botšiša Dipotšišo ka Pampišana Bakeng sa go Thea Motheo wa Ketelo ya Gago e Latelago: Rulaganya gore ketelo ya gago ya pele e be feela mathomo a lelokelelo la diketelo tše di holago. O se ke wa nagana gore o swanetše go hlalosa ditaba ka mo go nabilego kudu; le gona ga se wa swanela go kgaoletša ditaba kudu moo mong wa ntlo a ka naganago gore ga o mo kgahlegele e le ka kgonthe. Ka morago ga go bala dirapa tše pedi goba tše tharo pampišaneng, botšiša potšišo yeo e tlago go ahla-ahlwa ketelong e tlago.

5 Ka mohlala, o ka lebiša tlhokomelo serapeng sa boraro go letlakala 4 gomme wa botšiša gore: “Na o nagana gore Beibele e nea bohlatse bjo bo lekanego gore re ka dumela seo e se bolelago mabapi le bokamoso?” Se se tla thea ntlha yeo e tlago go ahla-ahlwa bakeng sa poelo. Neela puku ya Lentšu la Modimo. Ge o boela mo gongwe o ka hlahloba dikgaolo 9 le 10 ka pukung ya Lentšu la Modimo.

6 Ge e ba re lebelela mong wa ntlo o mongwe le o mongwe e le yo a ka bago morutiwa, gona re tla leka go diriša ditlhaloso tša rena tša go phetha bakeng sa go thea motheo bakeng sa poelo.