Maeto A Bonolo Le A Atlegago A Go Boela

1 Na o dira maeto a go boela ka mehla goba gantši o go hwetša go le thata ka ge o tla be o sa tsebe se o tlago go se bolela? Ga go nyakege gore o ikwe o tšhogile. Dilo tše tharo di tla go thuša gore o be yo a atlegago: (1) tokišetšo e botse; (2) bokgoni bja go ahla-ahla ntlha e tee goba tše pedi ditabeng tše bonolo tša Beibele; le (3) maikemišetšo a go theetša seo se tšwago ka mafahleng a mong wa ntlo.

2 Ge o lokišeletša maeto a go boela, naganišiša ka taba e swanetšego go ka ahla-ahlwa le mong wa ntlo. Na ke morutwana wa sekolo? Barutwana ba bantši ba sekolo ba tla ba le nako e oketšegilego ya go boledišana ka ditaba tša Beibele kgweding ye ka ge ba le nakong ya go khutša dithutong tša bona. Go ka direga gore o hwetše ba bangwe ba amogela molaetša wa Mmušo. Na o rotošitše potšišo bofelong bja ketelo ya nakong e fetilego, goba na mong wa ntlo o bontšhitše kgahlego tabeng e itšego? Hlahloba gape dintlha tšeo o di ngwadilego gomme o diriše puku ya Go Boledišana go tsoma tsebišo yeo o tlago go e nyaka go dira gore leeto la go boela e be le le atlegago. Ge o etetše, e-ba yo borutho le yo a nago le bogwera. Dumediša mong wa ntlo o mmitša ka leina.

3 Ge e ba o sepedišeditše mong wa ntlo Morokami le Phafoga!, gona leeto la gago la go boela le tla thewa ntlheng e tee goba tše pedi tše o tlago go ba o di kgethile makasineng. Ge e ba o sepedišitše pampišana ketelong ya pele, mo gongwe o ka hlalosa pampišana ka boyona goba wa bolelela seo se sepedišwago ka go šupa ntlha e swanetšego makasineng goba pukwaneng.

4 Ge e ba o sepedišitše “Bophelo Lefaseng le Lefsa la Khutšo,” o ka fo re:

◼“Nakong e fetilego ge ke be ke etetše, re boledišane ka kholofetšo ya Modimo ya lefase le lefsa la khutšo. Ka ge re boletše, maemo a makaone a tla tla ka Mmušo wa Modimo. O nagana gore go nyakega eng go rena gore re be karolo ya lefase le lefsa?” Dumelela mong wa ntlo gore a hlalose, ke moka o boledišane le yena ka kgopolo e lego go Psalme 37:9, 11, 29.

5 Ge e ba o sepedišitše “Kholofelo ke Efe ka Baratiwa Bao ba Hwilego?,” ditlhaloso tše tše kopana di ka thoma poledišano:

◼“Mafelelong a poledišano ya rena ya nakong e fetilego, ke go tlogeletše pampišana ya sehlogo se se rego, Kholofelo ke Efe ka Baratiwa Bao ba Hwilego? Serapa sa boraro se rotoša dipotšišo tšeo di kgahlišago: ‘Ke ka baka la’ng batho ba e-hwa? Bahu ba gokae? Re ka kgonthišega bjang gore ba ka phela gape?’ Sehlogwana se se latelago se se rego, ‘Lehu le Seo se Diregago ge re E-hwa’ se araba e nngwe le e nngwe ya dipotšišo tše. Ke na le kopi e nngwe ya pampišana še. Ela hloko seo e se bolelago serapeng sa bone.” Ke moka ge mong wa ntlo a dutše a sepedišana le wena, bala serapa go akaretša le mangwalo a mabedi gomme o botšiše mong wa ntlo kamoo a bonago ka gona. Theetša ka kelohloko seo a tlago go se bolela, gomme o phethe ka mo go swanetšego.

6 Ge poledišano e dutše e tšwela pele, mong wa ntlo mo gongwe a ka tšweletša dikgopolo tše di sa nepagalago. Ga go nyakege gore o tsoše kgang ka se sengwe le se sengwe seo a se bolelago. Go e na le moo, kgomarela taba yeo e ahla-ahlwago. Dikgopolo lege e le dife tšeo e sego tša mangwalo di ka phošollwa maetong a go boela a ka morago.

7 Rulaganya ka mešego fela go latelela kgahlego lege e le efe ka go dira maeto a bonolo le ao a atlegago a go boela ka April.