Go Diriša Dipampišana Bakeng sa go Tšweletša Mafelelo a Holago
1 Mokgatlo wa Jehofa wa mehleng yeno o na le histori ya go diriša dipampišana ka katlego. Lona leina le la mokgatlo wa rena wa molao, e lego Watch Tower Bible and Tract Society le bontšha gore dipampišana di kgatha tema ya bohlokwa go gašweng ga ditaba tše di lokilego. Na o diriša dipampišana ka moka bakeng sa go tšweletša mafelelo a holago bodireding bja gago?
2 Go tla nyakega gore re itlwaelanye le e nngwe le e nngwe ya tšona. Ka mohlala, na o kile wa di bala ka moka ka kelohloko go kwešiša seo e nngwe le e nngwe ya tšona e se ahla-ahlago? Na o kile wa nagana ka mohuta wa motho yo pampišana e nngwe le e nngwe e tlago go ipiletša go yena? Go itlwaelanya ka mo go tseneletšego le pampišana e nngwe le e nngwe go tla aga kgodišego ya gago go di dirišeng modirong wa ntlo le ntlo gaešita le maemong a mantši moo o ka neago bohlatse bjo bo sa rulaganyetšwago.
3 Di Diriše Bodireding bja Ntlo le Ntlo: Molebeledi yo mongwe wa tikologo o ngwala gore: “Ke atlega gabotse kudu ka go thoma dipoledišano tša-ka tše dintši ka pampišana.” Na o kile wa leka thero ye? Ka baka la dipampišana tše dintši, re na le matseno a mantši ao a tutuetšago ao re ka kgethago go ona. Pampišana e nngwe le e nngwe e re nea sebaka sa go thoma thuto ya Beibele e ka ba ketelong ya mathomo goba leetong la go boela.
4 Go na le dibaka tše dingwe tša go diriša dipampišana. Poledišanong ya lena mojakong, mohlomongwe o ka kwa gore motho o sa tšwa go lahlegelwa ke motho yo a mo ratago lehung goba gore motho yo mongwe ka lapeng o a babja. Batho bao ba nago le manyami a magolo goba bao ba lekago go lebeletšana le mathata ao a tšeago lebaka le letelele gantši ba ba le maikwelo a sa thabišego gomme ba a nyama. Ke ka baka la’ng o sa ba sepedišetše pampišana ya Khomotšo go Bao ba Nyamilego!? Mohlomongwe o ka kwa gore motho o sa tšwa go hlalwa moragonyana bjale goba gore o lahlegetšwe ke modiro wa gagwe. Diriša dipotšišo tšeo di lego go letlakala 2 la pampišana ya Thabela Bophelo bja Lapa tše rego: “Ke ka baka la’ng malapa a lehono a hlasetšwe ke mathata a bjalo a magolo? Re ka thabela bjang bophelo bja lapa?” Mohlomongwe tše ke dipotšišo tšeo di tlago pele monaganong wa motho. Gaešita le ge kgahlego ya gatee-tee e sa bonagale, go a kgonega gore a bale pampišana ka morago.—Mmo. 11:6.
5 Diriša Dipampišana ka mo go sa Rulaganyetšwago: Ge e ba re boloka dipampišana mo di ka fihlelelwago ga bonolo—ka potleng ya hempe, potleng ya baki, mokotlaneng goba mokotleng wa dipuku—re ka di diriša mafelong a mantši a fapa-fapanego. Di diriše ge o e-ya go reka, o le leetong goba ge o bolela le ba leloko goba baeng. Gantši re ka ikhwetša re le boemong bja go abelana molaetša wa Mmušo le ba bangwe ka boripana feela, go swana le mošomong goba sekolong. Dipampišana di re nea sebaka sa gore re nee bohlatse bjo bokopana. Pampišana ga se selo seo se imelago motho eupša ke e lebanyago le e bohlale. E amogelega gabonolo kudu go feta puku goba dimakasine, ka ge e sa nyake go balwa mo gogolo.
6 Phafogela dibaka tša go sepediša dipampišana ka mo go sa rulaganyetšwago sekolong le lefelong la gago la mošomo, mabenkeleng a go jela, lefelong la peterole bjalo bjalo. Kgaetšedi o ile a kgonthišetša gore o na le dipampišana ge a be a dira dithulaganyo tša go iša makgolo’agwe ngakeng. Ofising ya ngaka, o ile a thoma poledišano le mosadi wa moimana. Ka morago ga go bontšha mosadi pampišana ya Bophelo Lefaseng le Lefsa la Khutšo, kgaetšedi o ile a botšiša gore: “Na o be o ka rata go godiša ngwana wa gago lefaseng leo le swanago le leo le bontšhitšwego mo?” Kgaetšedi o ile a kgona go latelela poledišano ka gore a etele ntlong ya mosadi. Se se ile sa lebiša maetong a mantši a go boela a ka mehla.
7 Dithuto tša Beibele di ka Thongwa ka Dipampišana: O ka kgona go bontšha ka boripana kamoo thuto e swarwago ka gona ka go diriša pampišana. Kgaetšedi yo mongwe o ile a dira se ka go diriša pampišana ya Bophelo Lefaseng le Lefsa la Khutšo. A šupa seswantšhong, kgaetšedi o ile a botšiša mong wa ntlo ge e ba a kile a nagana gore lefase ka nako e nngwe le ka ba ka tsela yeo. Ka morago ga gore mong wa ntlo a arabele, kgaetšedi o ile a mo laletša gore a bale mangwalo a 2 Petro 3:13 le Jesaya 65:17, ao a bontšhitšwego pampišaneng. Ke moka kgaetšedi wa rena o ile a re: “Dikholofetšo tše ga se ditoro e bile ga se boikgopolelo eupša ge e le gabotse di bolelwa ka Lentšung la Modimo, Beibele.” Ke moka kgaetšedi o ile a rulaganyetša go tšwetša pele poledišano bekeng e latelago. Ketelong e latelago, dipotšišo tše dintši tša mosadi di ile tša arabja gomme go ile gwa tlogelwa puku ya O ka Phela ka mo go sa Felego Paradeiseng mo Lefaseng. Go ile gwa feleletša ka thuto ya Beibele.
8 Na o yo mongwe yo a sa tšwago go kolobetšwa goba mohlomongwe mogoeledi yo a sa kolobetšwago yo a hwetšago phihlelo bodireding bja gago? Ge e ba go le bjalo, o ka rata go tsoma bao ba nago le phihlelo e oketšegilego gomme wa kgopela ditšhišinyo tša bona mabapi le go diriša dipampišana tšhemong ya phuthego ya gabo lena. Re na le mehlala e mentši ka Beibeleng ya bao ba amogetšego kgothatšo le tlhahlo e tšwago go ba ba gotšego ka tsebo tumelong.—Dit. 18:24-27; 1 Ba-Kor. 4:17.
9 Re le motho ka o tee ka o tee goba malapa, dirišang nako le nagana kamoo le ka sepedišago e nngwe le e nngwe ya dipampišana tše tše di fapa-fapanego ka gona. E-bang le mananeo a go itlwaetša. O ka diriša bjang dipampišana le dipuku tše dingwe tšeo di sepedišwago bodireding bja tšhemo kgweding yeo? Ke dithulaganyo dife tšeo o nago le tšona moo o ka sepelago le dipampišana tše sego kae? Na bekeng ye o tla kopana le motho yo mongwe yo a tlago go holwa ke molaetša o lego nakong wo dipampišana tše di o neago?
10 Lerato le le tseneletšego la go rata Jehofa le go tshwenyega ka batho di tla re tutuetša gore re dire sohle seo re ka se kgonago go direng gore ditaba tše di lokilego di tsebje. Go diriša dipampišana ka mehla go tla re thuša go dira seo. Ge e ba re diriša dipampišana ka bohlale ge re bolela ka ditaba tše di lokilego tša Mmušo, ka ntle le pelaelo re tla ba le mafelelo ao a holago.