Diriša Dipampišana go Thoma Dipoledišano
1 Na o be o ka se dumele gore go nea bohlatse bjo atlegilego go ithekgile kudu ka go gata ga gago mogato wa pele wa go thoma dipoledišano? Tlhohlo ke ya go ba le selo se itšego seo o ka se bolelago seo se tanyago kgahlego ya motho gomme sa mo dira gore a akaretšwe tabeng. Eupša se se ka dirwa bjang ka mo go atlegilego?
2 Bagoeledi ba bantši ba hweditše gore ka mantšu a sego kae ao a kgethilwego gabotse, go sepediša e nngwe ya dipampišana tšeo di theilwego Beibeleng go ka thoma dipoledišano. Dihlogo ke tše ipiletšago, gomme diswantšho ke tša mebala le tše tanyago mahlo. Pampišana ga e fetše motho matla, ka go nea pono ya gore go na le tsebišo e ntši yeo e tlago go balwa. Lega go le bjalo, melaetša e mekopana yeo e lego ka dipampišaneng ke yeo e tanyago gomme e ka dirišwa go lebiša thutong ya Beibele.
3 Hlatse e nngwe e ile ya ikwa ka tsela ye: “Lefaseng le la leema-ema, batho gantši ga ba nyake go diriša nako e ntši ba bala, eupša dipampišana e fo ba tše ditelele ka mo go lekanego go nea molaetša wa bohlokwa eupša ga se tše ditelele kudu moo go ka fetšago kgahlego ya batho le pele ba ka di lebelela. Ke badile dipampišana tše dintši, gomme mafelelong ka ithuta therešo.” Le ka mohla o se ke wa nyatša matla a Lentšu la Modimo go etša ge le hlalositšwe melaetšeng ye e mekopana e gatišitšwego.—Ba-Heb. 4:12.
4 Megato e Mene e Bonolo: Ba bantši ba bile le katlego ka go diriša matseno a bonolo. (1) Bontšha motho dipampišana tše sego kae gomme o mmotšiše yeo a ka e thabelago. (2) Ka morago ga gore motho a kgethe e tee, botšiša potšišo e lokišeditšwego gabotse yeo e gatelelago ntlha ya bohlokwa pampišaneng. (3) E le go araba potšišo, bala serapa se se swanetšego goba lengwalo go tšwa pampišaneng. (4) Ge e ba o hwetša karabo e botse, tšwela pele o ahla-ahla dikagare tša pampišana goba šupa thutong e itšego ka poroutšheng ya Seo Modimo a se Nyakago goba kgaolong e itšego ka pukung ya Tsebo yeo e neago ditlhaloso tše oketšegilego. Ka tsela ye o ka kgona go tsena ka go lebanya thutong ya Beibele. Ditšhišinyo tše di latelago di tla go thuša go lokišetša seo o tlago go se bolela ge o diriša dipampišana tše nne.
5 Sehlogo sa pampišana e rego “Ge e le Gabotse ke Mang yo a Bušago Lefase?” se ka rotošwa e le potšišo.
◼ Ge e ba motho yo o bolelago le yena a araba ka gore ke “Modimo” goba “Ga ke tsebe,” bala mafoko a mabedi a pele go letlakala 2 le serapa sa pele go letlakala 3. Gatelela 1 Johane 5:19 le Kutollo 12:9. Go sa šetšwe ge e ba motho o belaela go ba gona ga Sathane Diabolo goba go se bjalo goba a dumela gore o tutuetša lefase, o ka tšwela pele le poledišano e lego sehlogwaneng sa “Tshedimošo e Tšwago Maemong a Lefase” go tšwetša pele poledišano. Ge e ba go bontšhitšwe kgahlego, ithapele go hlalosa moo Diabolo a tšwago gona, o diriša dintlha tše di lego go matlakala 3 le 4 a pampišana.
6 Pampišana “Kholofelo ke Efe ka Baratiwa Bao ba Hwilego?” e ka rotoša kgahlego gatee-tee. O ka thoma poledišano ka go botšiša gore:
◼ “Na o nagana gore re tla ke re bone baratiwa ba rena ba ba hwilego gape?” Ka morago ga ge motho a arabile, šupa serapeng sa bobedi go letlakala 4 la pampišana gomme o bale Johane 5:28, 29. Ke moka o hlalose gore go a thuša go kwešiša sehlogwana sa pele sa pampišana. Ithapele go se ahla-ahla le yena.
7 Pampišana ya “Thabela Bophelo bja Lapa” e ipiletša ka gohle go malapa. Ge o e diriša o ka re:
◼ “Ka ntle le pelaelo o tla dumela gore lapa le ka tlase ga tlhaselo lehono. Ke eng seo o naganago gore se ka dirwa bakeng sa go matlafatša ditlemo tša lapa?” Ka morago ga gore motho a arabe, lebiša tlhokomelo ya gagwe dintlheng tše di lego serapeng sa pele go letlakala 6. Kgetha le lengwe la mangwalo ao a tsopotšwego go matlakala 4 le 5 a pampišana, gomme o hlalose seo le se bolelago. Ke moka ithapele go swara thuto e sa lefelelwego ya legae ya Beibele.
8 Pampišana ya “Lebaka Leo ka Lona o ka Botago Beibele” e ka dirišwa ka thero ye:
◼ “Batho ba bantši ba kwele kanegelo ya Kaine le Abele, yeo e hwetšwago pukung ya pele ya Beibele. Pego yeo e lego go Genesi gape e bolela ka mosadi wa Kaine. Na o kile wa ipotšiša gore o tšwa kae?” Diriša serapa sa mafelelo go letlakala 2 la pampišana go nea karabo. Hlalosa gore pampišana e ahla-ahla gape le ditlhaloso tša bohlokwa tša Beibele tšeo di lego mabapi le seo bokamoso bja rena bo se huperego. Go thoma ka serapa sa boraro go letlakala 5, tšwela pele le poledišano, o diriša mangwalo a thekgago taba.
9 Go aba dipampišana tša Beibele ke mokgwa o kgonthišeditšwego ka nako e telele le o atlegago wa go bolela ditaba tše di lokilego. Ka ge e le tše di rwalegago gabonolo kae le kae mo o yago, o ka di diriša ka katlego modirong wa gago wa ntlo le ntlo le ge o nea bohlatse ka mo go sa rulaganyetšwago. Dipampišana di kgatha tema e bohlokwa go phethagatšeng bodiredi bja rena. Kgonthišega gore o swara tše fapa-fapanego gomme o di diriše ka bolokologi go thoma dipoledišano.—Ba-Kol. 4:17.