Tokelo E Botse Ya Tirelo

1 Mmadi o mongwe o boletše gore o ithutile mo gontši ga bohlokwa bja kgonthe ka go bala Morokami le Phafoga! go feta seo a ithutilego sona nywageng e tshelelago a tsena sekolo yunibesithing. Ga se mo go sa tlwaelegago gore babadi bao ba botegago ba nee ditlhaloso tše bjalo tšeo di thabišago pelo tša tebogo ka morago ga ge ba badile dimakasine tše ka nakwana feela. Re na le tokelo e botse gakaakang ya go abelana dimakasine tša rena ka mehla le bao ba tlogago ba di lebelela e le tša bohlokwa!

2 Batho ba bantši, gaešita lege ba thabela therešo go se nene, ga se ba ka ba tšwela pele go fihla bokgoleng bja go amogela thuto ya Beibele ya legae. Eupja kgahlego ya bona e ka hlagolelwa ge e ba motho o mongwe a boela go bona ka mehla a e-na le tokollo e nngwe le e nngwe e mpsha ya Morokami le Phafoga! Ee, go iša dimakasine ka potego tsejaneng ya dimakasine go thušitše go tutuetša batho mafelelong gore ba dumele go ba le thuto ya ka mehla ya Beibele.

3 Rena ka noši re holwa ke go ba le tsejana ya dimakasine ge e ba re bala dimakasine pele gomme ra lemoga dintlha tše kgethegilego tšeo di tlago go kgahliša motho o mongwe le o mongwe ka mo go kgethegilego, yo a lego lelokelelong.

4 Ka dinako tše dingwe mong wa ntlo a ka re nea moneelo o fetago wo o boletšwego. Ke ka baka la’ng o sa šišinye gore o tla mo tlišetša ditokollo tša morago-rago lebakeng la dibeke tše pedi? Se e ka ba mathomo a ketelo e nngwe ya tsejana ya dimakasine. O mongwe le o mongwe yo a bontšhago kgahlego dimakasineng tša rena o swanetše go akaretšwa lelokelelong la gago la diketelo tša tsejana ya dimakasine. Ge e ba motho a bontšha kgahlego ya kgonthe ge a amogela dimakasine, mo gongwe o ka hlalosa gore dihlogo tše di kgethegilego di tšwelela dimakasineng tša rena dibekeng tše dingwe le tše dingwe tše pedi le gore o tla thabela go mo tlišetša tšona. Kgonthiša gore o ya ka mehla, o diriša ka mo go holago dibaka tša go boledišana le mong wa ntlo ka ditaba tša Beibele. Re a tseba gore o tla thabela tokelo ye e botse ya tirelo.