Ditsejana tša Dimakasine—Di Thuša go Thoma Dithuto tša Beibele
1. Ke ka baka la’ng go tloga kgale mokgatlo wa Jehofa o kgothaletša bagoeledi go ba le batho bao ba ba išetšago dimakasine ka mehla?
1 Batho ba bantši ga ba nyake go ithuta Beibele le rena eupša ba thabela go bala dimakasine tša rena. Ka go re’alo, ke kgale mokgatlo wa Jehofa o kgothaletša bagoeledi gore ba be le batho bao ba ba išetšago dimakasine ka mehla. Ge batho ba bala dimakasine tša rena ka mehla, gantši ba hlagolela kganyogo ya go kganyoga Lentšu la Modimo. (1 Pet. 2:2) Mafelelong, selo se itšego seo ba se balago se ka tsoša kgahlego ya bona gomme sa dira gore ba amogele thuto ya Beibele.
2. Re ka hlagolela bjang kgahlego ya bao re ba išetšago dimakasine ka mehla?
2 ‘Nošetša’ Dipeu tša Therešo: Go e na le go fo tlogelela mong wa ntlo dimakasine, swara magang le yena gomme o leke go aga segwera le yena. Se se tla go thuša gore o tsebe maemo a gagwe, dilo tšeo a di ratago le ditumelo tša gagwe, e lego seo se tla dirago gore o kgone go boledišana le yena ka temogo. (Die. 16:23) Ka mehla lokišeletša ge o mo etela. Ge e ba go kgonega, bolela ntlha e itšego ka bokopana go tšwa ka dimakasineng tšeo gomme o bale le lengwalo leo le tswalanago le yona, o nošetše dipeu le ge e le dife tša therešo tšeo di lego ka pelong ya gagwe. (1 Bakor. 3:6) Ngwala fase letšatši leo o mo etetšego ka lona, seo le boledišanego ka sona, dikgatišo tšeo o mo tlogeletšego tšona gotee le mangwalo ao le a ahlaahlilego.
3. Re swanetše go boela gakae bathong bao re ba išetšago dimakasine ka mehla?
3 Re Swanetše go Boela Gakae? O swanetše go išetša motho dimakasine tša moragorago gatee ka kgwedi. Lega go le bjalo, go ithekgile ka maemo a gago le ka kgahlego ya motho yoo, o ka kgetha go mo etela gantšinyana. Ka mohlala, beke e tee goba tše pedi ka morago ga go mo tlogelela dimakasine, o ka boela gomme wa re: “Ke no feta ke le hlola gore ke le bontšhe selo se itšego ka dimakasineng tšela ke le tlogeletšego tšona.” Se se tla dira gore motho yoo a nyake go bala sehlogo seo. Ge e ba a šetše a se badile, o ka mmotšiša gore o nagana eng ka sehlogo seo ke moka ra se ahlaahla ka boripana. Goba ge e ba motho yoo a thabela go bala dikgatišo tša rena, o ka boela gomme wa mo nea pampišana, poroutšha goba puku yeo re e sepedišago kgweding yeo.
4. Re ka fela re dira’ng go bona ge e ba bao re ba išetšago dimakasine ka mehla ba ka thabela go ithuta Beibele?
4 O se ke wa letela gore mong wa ntlo a go kgopele thuto. Gata mogato wa pele. Le ge e ba a kile a gana thuto ya Beibele nakong e fetilego, o ka fela o mmontšha karolo e rego, “Dipotšišo tša Beibele di a Arabja” yeo e lego ka go Morokami gomme o bone ge e ba a ka thabela go e ahlaahla le wena. Mohlomongwe o ka thoma thuto o eme mojako. Lega go le bjalo, ge e ba o sa kgone go thoma thuto, o ka tšwela pele o mo išetša dimakasine go hlagolela kgahlego.