Go Bontšha Tebogo Bakeng Sa Topollo

1 Kganyogo ya go bontšha go leboga mogwera goba wa moloko yo a hwilego ke yeo e tlwaetšwego ditlogong ka moka. Kganyogo ye e ka ba e matla kudu ge e ba moratiwa a hwetše tseleng ya go phološa maphelo a ba bangwe. Bohle bao ba nago le kholofelo e swanago ya bophelo bjo bo sa felego ba na le mabaka a tiilego a go bontšha tebogo bakeng sa topollo ka go ba gona Segopotšong sa lehu la Kriste ka April 6.—2 Ba-Kor. 5:14; 1 Joh. 2:2.

2 Leboga Lerato la Jehofa: Ke mo go swanetšego gakaakang gore re bontšhe tebogo ya rena e tseneletšego ya go leboga Monei o mogolo wa dimpho, e lego Jehofa Modimo yo a neilego topollo! (1 Joh. 4:9, 10) Bogolo bja lerato la Jehofa bo bonagatšwa mphong e sa tlwaelegago yeo a e neilego bakeng sa go re lopolla, e sego o mongwe wa barongwa feela ba dimilione ba ba lokilego eupja Morwa wa gagwe yo a tswetšwego a nnoši yo a ratwago kudu. (Die. 8:22, 30) Morwa yo yo a tsebago Jehofa gakaone, e lego Jesu Kriste o re gopoditše gore: “Xobane Modimo ó ratile lefase xakaakaa, a bá a le nea Morwa wa xaxwe e a tswetšwexo à nnoši, xore mang le mang e a mo dumetšexo a se kê a lahlêxa, a bê le bophelô byo bo sa felexo.”—Joh. 3:16.

3 Leboga Lerato la Jesu Kriste: Ka mo go swanago, ke mo go swanetšego gore re bontšhe tebogo e tseneletšego bakeng sa Jesu Kriste, yo a gafilego bophelo bja gagwe e le topollo bakeng sa ba bantši. (Mat. 20:28) Lerato la gagwe le bonagatšwa go ikemišetšeng ga gagwe go ikokobeletša thato ya Jehofa ka yena mabapi le topollo. Ela hloko kamoo a gafilego maemo a gagwe a rategago ka gona a go ba gotee le Tatagwe le barongwa ba dikete tše dikete ba ba lokilego e le gore a be topollo ya rena. Teko ya go phela gare ga batho ba sebe le go bušwa ke bona gotee le go tseba gore go neela topollo go be go nyaka gore a hwe ga se tša ka tša mo šitiša. Go e na le moo, o ile a “tšea lebopô la mohlanka, a ba e a swanaxo le batho, . . . A ikokobetša a ba e a kwaxo le xo iša lehung, lehung la [koteng ya tlhokofatšo].”—Ba-Fil. 2:5-8, bapiša le NW.

4 Re Bontšha Bjang Tebogo Bakeng sa Topollo?: Tebogo ya rena ya go leboga topollo e swanetše go ba e fetišago go fo re, ke a leboga. Re swanetše go ithuta ka tokišetšo ya Modimo ya phološo ka Jesu Kriste. (Joh. 17:3) Ka gona re swanetše go bontšha tumelo topollong. (Dit. 3:19) Le gona, re swanetše go tutueletšega go ikgafela Jehofa Modimo ka boineelo gomme re kolobetšwe. (Mat. 16:24) Ge re dutše re phelela boineelo bja rena, re swanetše go reka sebaka se sengwe le se sengwe bakeng sa go botša ba bangwe ka tokišetšo e botse ya topollo bakeng sa phologo.—Ba-Roma 10:10.

5 Ga se mo go fetišago matla a motho lege e le ofe gare ga rena go fihlelela dinyakwa tše. Mika 6:8 e re kgonthišetša gore: “Se Morêna a se nyakaxo xo wene: Ké xo dira tokô, ké xo rata botho; ké xo sepela le Modimo w’axo Ò n’e boipoetšô.” Ka mo go swanago, Dafida o ile a re go Jehofa: “Di tšwile xo Wene tšohle, rè Xo nthšeditše tšohle di tšwaxo ’atleng sa xaxo.”—1 Kor. 29:14.

6 Go dira gore tebogo ya rena ya go leboga tokišetšo e kgahlišago ya Jehofa e be e tseneletšego, ke ka baka la’ng re sa bale le go ahla-ahla dikgaolo 112 go ya go 126 tša puku ya Motho yo a Phagamego re le lapa pele ga letšatši la Segopotšo? Ka tsela ye, ka moka ga rena re ka itokiša monaganong go bontšha tebogo bakeng sa topollo monyanyeng wa Segopotšo wo o tlago go swarwa ka April 6, 1993.