Dithero Tše Bonolo Le Tše Di Atlegago

1 Jesu o ile a goeletša Mmušo wa Modimo ka mokgwa o bonolo le o lebanyago. O be a tseba gore batho bao ba swanago le dinku ba be ba tla arabela gabotse ge ba e-kwa therešo. Le gona o be a tseba gore batho ba fapana go ya ka dikgopolo tša bona, dikgahlego tša bona le matla a bona a go nagana. Ka mo go swanetšego, o ile a diriša matseno a mantši a bonolo, dipotšišo le dipapišo bakeng sa go tanya tlhokomelo ya batheetši ba gagwe le go kgoma dipelo tša bona. Re ka ekiša mohlala wa gagwe le go diriša dithero tše bonolo le tše di atlegago ka mo go holago.

2 Diriša Puku ya Go Boledišana ka mo go Holago: Matseno a mathomo ka tlase ga sehlogo se se rego “Modiro/Madulo” go letlakala 13 la puku ya Go Boledišana ke ao a lego nakong le ao go lego bonolo go a hlalosa.

Mo gongwe o ka re:

◼“Re be re dutše re boledišana le baagišani ba gago mabapi le seo se ka dirwago go kgonthišetša gore go tla ba le modiro le madulo bakeng sa o mongwe le o mongwe. Na o dumela gore ke mo go nago le tlhaloganyo go letela gore mebušo ya batho e phethe se? . . . Eupja go na le motho o mongwe yo a tsebago kamoo mathata a a ka rarollwago ka gona; yoo ke Mmopi wa batho.” Bala Jesaya 65:21-23. Ke moka o ka botšiša mong wa ntlo kamoo se se kwalago ka gona go yena.

3 Matseno ao a lego ka tlase ga sehlogo se se rego “Bokgopo/Mahloko” go letlakala 10 se tla kgahliša batho ba bantši lehono.

O ka botšiša gore:

◼“Na o kile wa ipotšiša gore: Na Modimo o tloga a tshwenyega ka bokgopo le mahloko ao batho ba welwago ke wona?” Dumelela mong wa ntlo go araba ke moka o bale Mmoledi 4:1 le Psalme 72:12-14. Phetla diswantšho tše di lego go matlakala 150-3 ka pukung ya Phela ka mo go sa Felego gomme o bontšhe ka boripana kamoo maemo a lefase lehono a phethagatšago boporofeta bja Beibele ka gona. Ke moka phetla go matlakala 161-2 bakeng sa go bontšha dilo tše dingwe gape tšeo Modimo a di boletšego e sa le pele bakeng sa go šegofatša motho. Botšiša mong wa ntlo ka sebopego seo se mo kgahlišago kudu.

4 Ge e ba mong wa ntlo a sa thabele puku goba a šetše a e-na le yona, ke ka baka la’ng o sa neele dimakasine tše pedi? Leka ka mehla go tlogelela mong wa ntlo puku lege e le efe, bjalo ka pukwana (brochure) goba gaešita le pampišana e sa lefelelwego.

Ka mohlala, ge e ba mpho ya puku e sa amogelwe, mo gongwe o ka re:

◼“Pukwana ye e rego Na Modimo Ruri o na le Taba le Rena? e hlalosa ka mo go kwalago seo Modimo a holofeditšego go se dira bakeng sa go nea dinyakwa tša rena tša letšatši le letšatši gomme e bontšha kamoo re ka holegago ka gona.” Phetla go matlakala 26 le 27 a pukwana ye gomme o lebiše tlhokomelo go serapa 21.

5 Ge e ba o kgetha go tlogela pampišana e bjalo ka Na Lefase le le tla Phologa?, o ka diriša matseno a latelago:

Mo gongwe o ka re:

◼“Go na le manyami a magolo le mathata lefaseng lehono. Pampišana ye e bontšha gore ntwa, tlhaelelo ya dijo le mathata a tša maphelo ka moka ga tšona di porofetilwe ka Beibeleng. Eupja Modimo o bile o holofeditše go tlišetša batho phetogo e makatšago.” Bala serapa sa mafelelo go letlakala 5 la pampišana.

6 Kgahlego ya rena ya kgonthe bathong, ye e sepedišanago le thero e bonolo le e atlegago yeo e kgomago pelo ruri e tla kgahliša batho bao ba swanago le dinku.—Joh. 10:16.