‘Go Ruta . . . Dilo Tšeo Ke Le Laetšego Tšona’

1 Go dira barutiwa go akaretša go ruta. Pele ga ge motho a ka ba morutiwa wa Kriste, o swanetše go rutwa “xo boloka tšohle” tšeo Jesu a di laetšego. (Mat. 28:19, 20) Tsela e kaone ya go phetha se ke ka thuto ya Beibele ya legae.

2 Ga se ka mehla go lego bonolo go thoma dithuto tša Beibele. Ge e ba o e-na le bothata bja go hwetša thuto ya Beibele, o se ke wa nyema moko. Go atlega go thoma dithuto tša Beibele go nyaka boikemišetšo le kganyogo ya kgonthe ya go kganyoga go fatišiša therešo go ba bangwe.—Ba-Gal. 6:9.

3 Go Mediša Kgahlego: Poledišano ya lena ya mathomo e ka tšweletša feela kgahlego e nyenyane. Bontši bja bana babo rena ba na le mokgwa wa go boela feela mo go sepedišitšwego puku goba mo go hweditšwego kgahlego e kgethegilego. Mabakeng a mantši re swanelwa ke go bjala kgahlego ya mong wa ntlo therešong. Mohlomongwe mong wa ntlo o amogetše pampišana feela, pukwana (brochure) goba dimakasine. Mo gongwe o ka kgona go diriša e nngwe ya tšona go thoma thuto ya Beibele ya lagae. Ge e ba mong wa ntlo a bontšha kgahlego e oketšegilego molaetšeng, mo gongwe a ka lebišwa pukung e swanetšego ketelong e latelago.

4 Go lokišetša ke senotlelo seo se išago katlegong. Ke ka baka la’ng o sa kgethe pele ga nako Lengwalo leo le tsopotšwego pampišaneng, pukwaneng goba makasineng wo o rerago go o diriša poelong ya gago? Ka tsela yeo o tla kgona go kgokaganya ditlhaloso tšeo di tšwago pukung le poledišano ya lena. Mo gongwe o ka ba wa kgona go bala serapa se tee goba tše pedi ka go lebanya go tšwa pukung.

5 Mo gongwe o ka bolela se:

◼“Re be re dutše re abelana le ba bangwe tsebišo mabapi le boporofeta bjo bo kgahlišago bjo bo phethagalago mo nakong ye.” Bala Mateo 24:3 gomme o e kgokaganye le seswantšho le ditlhaloso tše di lego go matlakala 149-54 a puku ya Phela ka mo go sa Felego. Matseno a swanago a ka dirišwa moo mong wa ntlo a amogetšego makasine, pukwana goba pampišana feela.

6 Re swanetše go akgofela go latelela kgahlego lege e le efe. Leka go boela lebakeng la beke e le gore poledišano ya nakong e fetilego e be e sa duma kgopolong ya mong wa ntlo. Nako le nako ge o etela, ahla-ahla dirapa tše sego kae tša puku yeo o e tlogetšego.

7 Lehono go sa dutše go e-na le modiro o mogolo wo o swanetšego go dirwa punong e kgolo yeo e boletšwego ke Jesu e sa le pele. (Mat. 9:37, 38) Ge re dutše re tšwela pele re ruta batho ba dipelo tše di botegago, re na le kholofetšo e matlafatšago ya Jesu ya gore o ‘na le rena mehla ka moka go fihla bofelong bja tshepedišo ya dilo.’