Kamoo re ka Dirišago Poroutšha ya Ditaba tše Dibotse tše di Tšwago go Modimo!
Poroutšha e Mpsha Yeo e Hlametšwego go re Thuša go Dira Maeto a go Boela le go Thoma Dithuto tša Beibele
1. Ke poroutšha efe e mpsha yeo e hlametšwego go re thuša go dira maeto a go boela le go thoma dithuto tša Beibele yeo e lokolotšwego Kopanong ya Selete ya ‘Šireletša Pelo ya Gago’?
1 Kopanong ya Selete ya ‘Šireletša Pelo ya Gago!’ re thabišitšwe ke go amogela poroutšha e mpsha yeo e tlago go re thuša go dira maeto a go boela le go thoma dithuto tša Beibele. Poroutšha ya Ditaba tše Dibotse tše di Tšwago go Modimo! e tšeela ya Seo Modimo a se Nyakago legato. Poroutšha ye e mpsha e swana le poroutšha ya Seo Modimo a se Nyakago ka ge dithuto tša yona e le tše dikopana. Se se tla re thuša gore re diriše poroutšha ye ka katlego bakeng sa go thoma dithuto tša Beibele re eme mojakong. Lega go le bjalo, gaešita le ge poroutšha ya Seo Modimo a se Nyakago e be e ahlaahla dinyakwa tša Bokriste, e lego tšeo e ka bago tlhohlo gore barutwana ba bafsa ba di amogele, poroutšha ye e mpsha e bolela kudu ka ditaba tše dibotse tšeo di hwetšwago ka Beibeleng.—Dit. 15:35.
2. Ke ka baka la’ng go ile gwa tšweletšwa poroutšha ya Ditaba tše Dibotse?
2 Ke ka baka la’ng e ile ya tšweletšwa? Bana babo rena lefaseng ka bophara ba be ba nyaka kgatišo e itšego e bonolo yeo e bego e tla dira gore batho ba kgahlegele therešo gomme ya ba lebiša pukung ya Seo Beibele e se Rutago, e lego sedirišwa sa rena se segolo sa go swara dithuto tša Beibele. Batho bao ba dikadikago go bala puku gantši ba ka rata go ithuta Beibele ba diriša poroutšha. Go oketša moo, poroutšha e ka fetolelwa gabonolo ka maleme a mantši.
3. Poroutšha ye e fapana bjang le dikgatišo tše dingwe tša go ithuta?
3 Kamoo e Hlamilwego ka Gona: Tsela yeo dikgatišo tša rena tše dintši di ngwadilwego ka yona ke e bonolo gore motho a ka di bala le go kwešiša therešo ya Beibele ntle le gore a nyake thušo. Kgatišo ye ga e bjalo. E ngwadilwe ka tsela yeo motho a ka kgonago go ithuta Beibele a thušwa ke motho yo mongwe. Ka gona, ge o e sepedišetša motho, ke mo gobotse kudu gore o ahlaahle serapa setee goba tše pedi le yena. Dirapa tša yona ke tše dikopana, ka gona di ka ba tša ahlaahlwa le motho le eme mojakong goba lefelong la gagwe la kgwebo. Gaešita le ge e le mo gobotse gore re thome go ithuta le motho go thuto 1, re ka thoma go ithuta le yena mo e ka bago thutong le ge e le efe yeo e lego ka poroutšheng ye.
4. Poroutšha ye e re thuša bjang go ruta ka go lebanya go tšwa Beibeleng?
4 Dikgatišong tše dintši tša rena, dikarabo tša dipotšišo di ka hwetšwa dirapeng. Lega go le bjalo, kgatišong ye dikarabo di hwetšwa ka Beibeleng. Batho ba bantši ba rata go ithuta Beibele go e na le dikgatišo tša rena. Ka gona, mo e ka bago mangwalo ka moka ao a bontšhitšwego ga a tsopolwa. A swanetše go balwa go tšwa Beibeleng ka boyona. Se se thuša barutwana go lemoga gore seo ba ithutago sona se tšwa go Modimo.—Jes. 54:13.
5. Ke ka baka la’ng e le gabohlokwa gore moswari wa thuto a lokišetše gabotse ge a yo swara thuto?
5 Poroutšha ye ga e hlalose mangwalo ka moka. Ka baka la’ng? E hlametšwe go kgothaletša morutwana go botšiša dipotšišo le go dumelela moswari wa thuto go diriša bokgoni bja gagwe bja go ruta. Ka gona, ke gabohlokwa gore re lokišetše gabotse pele ga ge re yo swara thuto. Eupša hlokomelang se: Le se ke la bolela kudu. Re rata go hlalosa Mangwalo. Eupša gantši morutwana o holega kutšwanyana ge re mo kgopela gore a hlalose seo a naganago gore se bolelwa ke lengwalo. Ka go diriša dipotšišo ka bohlale, re ka kgona go mo thuša go hlalosa seo se bolelwago ke lengwalo le lengwe le le lengwe.—Dit. 17:2.
6. Re ka diriša poroutšha ye bjang (a) moo batho ba belaelago Modimo le Beibele? (b) bodireding bja ntlo le ntlo? (c) go thoma dithuto tša Beibele ka tsela ya go lebanya? (d) ge re dira maeto a go boela?
6 Go swana le dikgatišo tše dingwe tša go swara dithuto tša Beibele, poroutšha ye e ka sepedišwa nako le ge e le efe go sa šetšwe gore mpho ya kgwedi yeo ke efe. Ba bantši ba tla thabela go e sepediša ba diriša tsela ya go lebanya ya go thoma dithuto tša Beibele ba eme mojakong. Go oketša moo, go etša ge go bontšhitšwe kopanong ya selete, go diriša poroutšha ye ge re boela go bao ba bontšhitšego kgahlego go “ka tloga [go] dira gore maeto a go boela a kgahliše!”—Bona mapokisi go matlakala 5-6.
7. O ka swara bjang thuto ya Beibele o diriša poroutšha ye?
7 Kamoo re ka Swarago Thuto ka Poroutšha ye: Re ka thoma go ithuta le motho ka go bala potšišo yeo e nago le nomoro gomme e ngwadilwe ka mongwalo o mokoto. Se se latelago, bala serapa le mangwalo ao a ngwadilwego ka mongwalo o sekamego. Diriša dipotšišo ka bohlale go thuša mong wa ntlo go kwešiša seo se bolelwago ke mangwalo ao. Ke moka, pele ga ge le ka fetela karolong e latelago, botšiša mong wa ntlo potšišo yeo e ngwadilwego ka mongwalo o mokoto go kgonthišetša gore o a kwešiša. E ka ba mo gobotse gore le hlahlobe potšišo e tee yeo e ngwadilwego ka mongwalo o mokoto diketelong tša pele tše sego kae. Ge nako e dutše e eya, le ka kgona go oketša nako yeo le e fetšago le ithuta gore le akaretše thuto ka moka.
8. Re swanetše go rola bjang mangwalo, gona ka baka la’ng?
8 Mangwalo a bontšhitšwego ao a ngwadilwego gore “bala” ke ona ao a arabago ka go lebanya potšišo yeo e lego ka mongwalo o mokoto. Ge le rola lengwalo, phemang gore: “Moapostola Paulo o ngwadile gore” goba: “Ela hloko seo Jeremia a se boletšego.” Mong wa ntlo a ka nagana gore re ithuta seo se tšwago bathong. E tla ba mo gobotse go bolela gore: “Lentšu la Modimo le re” goba: “Ela hloko seo se boletšwego ke Beibele.”
9. Nakong ya thuto, na re swanetše go bala mangwalo ka moka ao a bontšhitšwego?
9 Na re swanetše go bala mangwalo ka moka ao a bontšhitšwego goba mangwalo feela ao a ngwadilwego gore “bala”? Seo se tla ithekga ka maemo. Mangwalo ka moka ao a bontšhitšwego a beilwe moo ka morero. Lengwalo le lengwe le le lengwe le hupere tsebišo yeo go swanetšego go boledišanwa ka yona. Eupša maemong a mangwe, ge morutwana a se na nako, a sa bontšhe kgahlego goba a sa kgone go bala gabotse, go ka nyakega gore re bale feela mangwalo ao a ngwadilego gore “bala.”
10. Re ka thoma go ithuta neng le morutwana puku ya Seo Beibele e se Rutago?
10 Nako ya go Fetela Pukung ya Seo Beibele e se Rutago: Ka morago ga go boledišana le motho ka makga a mmalwa le go ithuta le yena ka mehla, re ka fetela pukung ya Seo Beibele e se Rutago goba ra tšwela pele re ithuta le yena poroutšha ya Ditaba tše Dibotse go fihlela re e fetša. Bagoeledi ba ka itirela phetho ya gore ke neng moo ba ka fetelago pukung e nngwe. Ka morago ga gore re fetele pukung ya Seo Beibele e se Rutago, na re swanetše go e thoma mathomong? Ga go molao woo o beilwego tabeng ye. Batho ga ba swane. Lega go le bjalo, barutwana ba bantši ba tla holwa gape ke dihlogo tše swanago le tšeo ba di badilego ka poroutšheng ge di hlaloswa ka mo go tseneletšego ka pukung ya Seo Beibele e se Rutago.
11. Ke ka baka la’ng re swanetše go diriša poroutšha ye e mpsha gabotse?
11 Lefaseng leo ditaba tše dibotse di hwetšagalago ka sewelo, re na le tokelo e kgolo ya go tsebatša ditaba tše dibotse kudu—gore Mmušo wa Modimo o a buša e bile kgauswinyane o tla tliša lefase le lefsa moo toko e tla agago go lona! (Mat. 24:14; 2 Pet. 3:13) Re kgodišegile gore ba bantši bao ba kwago molaetša wo ba tla dumelelana le mantšu a a buduletšwego a rego: “Di kgahliša gakaakang dithabeng dinao tša yo a tlišago ditaba tše dibotse, yo a tsebatšago khutšo, yo a tlišago ditaba tše dibotse tša se sekaone, yo a tsebatšago phološo le yo a rego go Tsione: ‘Modimo wa gago ke kgoši!’” (Jes. 52:7) Anke re dirišeng poroutšha ye e mpsha gore re iše ditaba tše dibotse tše tšwago go Modimo go batho bao ba nyoretšwego therešo bao ba lego tšhemong ya gabo rena!
[Lepokisi go letlakala 5]
Moo Batho ba Belaelago Modimo le Beibele:
● Mafelong a mangwe, bagoeledi ba hwetša gore mantšu “Modimo” le “Beibele” a šitiša poledišano. Boemong bjoo, e ka ba mo gobotse gore ketelong ya pele le bolele ka ditaba tšeo di tshwenyago batho ba lefelong la gabo lena, tše bjalo ka go nyakega ga mmušo wa go loka, moo go ka hwetšwago thušo e holago malapa le seo bokamoso bo se huperego. Mohlomongwe poroutšha ye ya Ditaba tše Dibotse e ka sepedišwa ka morago ga ge re bile le dipoledišano tše mmalwa gomme re hlahlobile mabaka a bontšhago gore Modimo o gona le lebaka leo ka lona Beibele e botegago.
[Lepokisi go letlakala 5]
Ge re Eya ka Ntlo le Ntlo:
● “Ke tlo go bontšha kamoo go lego bonolo ka gona go tseba seo Modimo a se rerilego ka bokamoso bja batho. Na o kile wa ipotšiša ge e ba Modimo a tla re imolla tlaišegong? [Dumelela karabo.] Poroutšha ye e bontšha moo o ka hwetšago karabo ya potšišo yeo ka Beibeleng. [Mo nee poroutšha, gomme le bale serapa sa pele go thuto 1, gotee le Jeremia 29:11.] Go tšwa go se, na go bonagala e le mo go kwagalago go wena gore Modimo o nyaka gore re be le bokamoso bjo bokaone? [Dumelela karabo.] Ge e ba o rata, poroutšha ye e ka ba ya gago. Nakong e tlago, re tla ahlaahla serapa sa bobedi go hwetša karabo ya Beibele ya potšišo e rego: ‘Modimo o tla fediša bjang tlaišego ya batho?’” Ge e ba mong wa ntlo a bonagala a na le nako e oketšegilego ketelong ya pele, gona le ka bala le go ahlaahla serapa sa bobedi le mangwalo a mararo a Beibele ao a lego serapeng seo. Dira dithulaganyo tša go boela gore le ahlaahle potšišo ya bobedi yeo e lego thutong yeo.
● “Batho ba bantši ba rata go rapela, kudukudu ge ba na le mathata. Na ka dinako tše dingwe o a rapela? [Dumelela karabo.] Na o nagana gore Modimo o theetša dithapelo ka moka, goba e ka ba e le gore dithapelo tše dingwe ga di mo kgahliše? [Dumelela karabo.] Ke swere poroutšha yeo e bontšhago kamoo re ka hwetšago dikarabo tša dipotšišo tšeo ka Beibeleng. [Mo nee poroutšha gomme le ahlaahle serapa sa pele sa thuto 12 ke moka le bale mangwalo ao a ngwadilwego gore “bala.”] Na ga se mo go kgahlišago go tseba gore Modimo o ikemišeditše go re theetša? Eupša e le gore re holwe ke thapelo ka botlalo, re swanetše go tseba Modimo gabotse. [Eya go thuto 2 gomme o mmontšhe dipotšišo tše di ngwadilwego ka mongwalo o mokoto.] Ge e ba o rata, nka go tlogelela poroutšha ye gomme nakong e tlago re ka bala dikarabo tša Beibele tša dipotšišo tše tše di kgahlišago.”
● “Ke tlile go wena ka gobane batho ba tshwenywa ke taba ya gore lefase le le lebile kae. Na o nagana gore maemo a tla ka a kaonefala? [Dumelela karabo.] Batho ba bantši ba makatšwa ke go ithuta gore Beibele e na le ditaba tše dibotse tšeo di ka re neago kholofelo. Ka mo poroutšheng ye, go na le tše dingwe tša dipotšišo tšeo Beibele e di arabago.” Mo nee poroutšha, gomme o mo kgopele go kgetha potšišo yeo e lego letlakaleng la ka morago yeo e mo kgahlago kudu. Ke moka eya thutong yeo gomme o mmontšhe kamoo thuto e swarwago ka gona. Dira dithulaganyo tša go boa gore o tlo ahlaahla potšišo e latelago yeo e lego thutong yeo.
[Lepokisi go letlakala 5]
Leka go Diriša Tsela ya go Lebanya:
● “Ke tlo go bontšha mokgwa o mofsa wa go ithuta Beibele. Poroutšha ye e na le dithuto tše 15 tšeo di bontšhago moo o ka hwetšago dikarabo tša dipotšišo tše bohlokwa tšeo di lego ka Beibeleng. [Mmontšhe letlakala la ka ntle le la ka morago la poroutšha ye.] Na o kile wa leka go kwešiša Beibele? [Dumelela karabo.] E re ke go bontšhe kamoo dithuto tše di lego bonolo ka gona. [Ahlaahla serapa sa pele sa potšišo 3 go thuto 3, gomme o bale Kutollo 21:4, 5. Ge e ba go kgonega, hlahlobang serapa se latelago le mangwalo a ngwadilwego gore “bala.”] Ge e ba o rata, nka go tlogelela poroutšha ye. Re šišinya gore o leke go ithuta Beibele o diriša mokgwa wo o mofsa. Ge e ba o e rata, gona o ka tšwela pele o ithuta. Nakong e tlago, re ka hlahloba thuto ya pele. Ela hloko gore thuto ye ke letlakala le letee feela.”
[Lepokisi go letlakala 5]
E Sepediše Leetong la go Boela:
● Ge re boela mothong yo a ilego a bontšha kgahlego, re ka re: “Ke mo gobotse go go bona gape. Ke go tlišeditše poroutšha ye yeo e neago dikarabo tša Beibele tša dipotšišo tše dintši tšeo di kgahlišago. [Mo nee poroutšha, gomme o mo kgopele go lebelela letlakala la ka morago.] Ke sehlogo sefe seo se ipiletšago go wena? [Dumelela karabo. Ke moka eya thutong yeo a e kgethilego.] Anke ke go bontšhe kamoo poroutšha ye e ka dirišwago ka gona go hwetša dikarabo tšeo di lego ka Beibeleng.” Mmontšhe kamoo thuto e swarwago ka gona gomme le ahlaahle serapa setee goba tše pedi ke moka le bale mangwalo ao a ngwadilwego gore “bala.” Ruri ye ke tsela e bonolo ya go thoma thuto ya Beibele! Tlogelela mong wa ntlo poroutšha ye gomme o dire dithulaganyo tša go boa. Ge le fetša thuto yeo, le ka ahlaahla thuto e nngwe yeo e kgethilwego ke mong wa ntlo goba la ya mathomong a poroutšha ye.