Dirišang Dipampišana Go Rola Puku Ya Motho Yo A Phagamego

1 Kgweding ya June re tla be re sepediša puku ya Motho yo a Phagamego Kudu yo a Kilego a Phela. Bagoeledi ba bantši ba tla neela puku ka go lebanya go mong wa ntlo, mohlomongwe ba diriša e nngwe ya dithero tšeo di lego letlakaleng la ka morago la Tirelo ya Rena ya Mmušo ya August 1992. Go ka dirišwa matseno a mangwe ka go diriša e nngwe ya dipampišana tša rena go rola mpho. Ke ka baka la’ng o sa leke e nngwe ya ditšhišinyo tše di latelago?

2 Na Lefase le le tla Phologa? Dipampišana di thuša kudu tabeng ya go thoma dipoledišano. Di thuša go tanya tlhokomelo ya beng ba dintlo ka gobane dipampišana di bolela ka ditaba tše bohlokwa tšeo di ba kgomago ka noši.

Ka mohlala, mo gongwe o ka bolela selo se se swanago le se:

◼“Ge re dutše re bolela le batho, re lemogile gore ba bantši ba bolela ka go tshwenyega ga bona ka . . . [kgetha tiragalo yeo e sa tšwago go begwa ditabeng]. Go bonala eka maemo a lefase a befela pele. Ba bangwe ba bile ba ipotšiša ge e ba lefase le le ka phologa. O ikwa bjang ka seo? [Dumelela mong wa ntlo gore a arabe. Batho ba bantši ba na le kholofelo.] Ke badile selo se sengwe seo se kgothatšago seo ke ratago go se abelana le wena. Se mo pampišaneng ye. [Nea mong wa ntlo pampišana ya Na Lefase le le tla Phologa? ge le wena o swere pampišana e swanago ka seatleng sa gago.] Ela hloko kamoo Jesu a porofetilego ka gona gore . . . ” Bala serapeng go letlakala 4 goba 5 seo se dumelelanago le tiragalo yeo e sa tšwago go direga yeo e boletšwego matsenong a gago. Rola puku ya Motho yo a Phagamego. Ge e ba go bonala e le mo go swanetšego, phetla tsebišong e oketšegilego e lego mabapi le boporofeta bja Jesu bjo bo gateletšwego go kgaolo 111. Kgonthišetša gore o rotoša potšišo mabapi le taba yeo bakeng sa go e ahla-ahla ge o boela.

3 Bophelo Lefaseng le Lefsa la Khutšo: Go phela lefaseng le lefsa la khutšo go bolela’ng go wena? Ka kakaretšo, batho ba nagana ka ditikologo tše botse tšeo di nago le dinoka tše dikgolo le melapo e fokago moya wa khutšo, le diphoofolo tše dibotse tšeo di phedišanago ka khutšo. Bao ba nyamišitšwego ke maemo a gona bjale a lefase ba ka hwetša kholofelo ya lefase le lefsa la khutšo e le yeo e lapološago kudu.

4 Na o ikemišeditše go neela selo se itšego se se lapološago le se se kgahlišago go baagišani ba gago, bašomi-gotee le wena le bao o gahlanago le bona ge o e-ya ka ntlo le ntlo?

Ge o diriša pampišana ya “Bophelo Lefaseng le Lefsa la Khutšo,” o ka bolela se sengwe se se swanago le se:

◼“Na o nagana gore go tla tsoga go kgonegile gore batho ba phele ka khutšo go etša ge go bontšhitšwe letlakaleng la ka ntle la pampišana ye? [Dumelela mong wa ntlo gore a arabe.] Hle bona mothaladi wa mafelelo serapeng sa pele go letlakala 2. O botšiša gore: ‘Eupja na ke toro feela goba go ikgopolela go dumela gore maemo a a tla ka a ba gona lefaseng?’ [Ka gona bala serapa se se latelago pampišaneng.] Tsopolo yeo e lego mabapi le magodimo a mafsa le lefase le lefsa e tšwa Beibeleng go 2 Petro 3:13. Ge e ba Beibele ya gago e le kgaufsi, re ka bala Psalme 104:5 gore re ithute mo go oketšegilego ka bokamoso bja lefase.” Goba o ka fo bala temana yeo Beibeleng ya gago. Bjale o ka lebiša poledišano pukung ya Motho yo a Phagamego, kgaolo 133.

5 Go tla nyakega gore go dirwe maeto a mangwe a go boela go ya go ‘nošetša’ peu yeo e bjetšwego. (1 Ba-Kor. 3:6, 7) Sehlogo se se lego ka mo tlase se šišinya kamoo go ka thongwago thuto ka gona ka puku ya Motho yo a Phagamego, e ka ba ketelong ya mathomo goba leetong la gago la go boela.