Go Thuša Ba Bangwe Go Lemoga Lehumo Le Legolo

1 O mongwe wa merero ya rena ge re bolela le ba bangwe ka ditaba tše di lokilego tša Mmušo e swanetše go ba go thuša batho ba dipelo tše di botegago go lemoga mohola o fetišago wa Lentšu la Modimo. (Ba-Fil. 3:8) Dipuku tša rena tšeo di theilwego Beibeleng di bapala karolo e bohlokwa go phatlalatšeng molaetša wa Mmušo. Ka mohlala, puku ya Phela ka mo go sa Felego e thušitše batho ba dikete tše makgolo go hlankela Jehofa ka baka la ditherešo tša Beibele tšeo ba ithutilego tšona.

2 Bodiredi bja rena bo akaretša mo gontši go feta go fo tlogela dipuku go motho lege e le ofe yo a ratago go di tšea. Re swanetše go rola molaetša ka mokgwa o ipiletšago, re theetše ka temogo seo mong wa ntlo a se bolelago gomme re itokišetše go ‘boledišana le yena ka Mangwalo.’—Dit. 17:2, NW.

3 Se se ka Dirwa Bjang? Matseno a rena a ka bulela beng ba dintlo tsela gore ba bontšhe ge e ba ba kgahlegela Beibele le molaetša wa yona e le ka kgonthe.

O ka re:

◼“Re etela gore re tle go ahla-ahla se se bolelwago ke seo se diregago go re dikologa lefaseng lehono. Gare ga batho ba bantši go bile le go felelwa ke kgahlego go Modimo le ditekanyetšo tša gagwe tša go phela bjalo ka ge di hlalositšwe ka Beibeleng. Se se tutueditše kudu kgopolo ya batho ka ba bangwe. Na o lemogile se? [Dumelela tlhaloso. O ka šupa mehlaleng e itšego.] Hle ela hloko kgoplo ya bao ba boletšwego go 2 Timotheo 3:1-5, gomme o mpotše ge e ba o nagana gore ke kamoo lefase le lego ka gona lehono. [Bala; dumelela tlhaloso.] Na go na le lebaka le le kwalago la go letela maemo a kaone nakong e tlago?” Ge e ba go bontšhwa kgahlego, šupa seswantšhong seo se lego go matlakala 12 le 13 a puku ya Phela ka mo go sa Felego gomme o lebiše tlhokomelo go dirapa 12 le 13. Ge e ba mpho e ganwa, gona go ka neelwa pampišana ya Bophelo Lefaseng le Lefsa la Khutšo.

4 Ge e ba motswadi a e-tla mojakong, re ka thoma poledišano ya rena ka tsela ye:

◼“Re boledišana le batho bao ba kgahlegelago go tseba kamoo re ka lebeletšanago ka gona ka katlego le mathata a lapa. Ka moka ga rena re leka go dira seo re ka se kgonago, eupja ge e ba go e-na le selo seo se ka re thušago gore re atlege kudu, re a se thabela, na ga go bjalo? [Dumelela karabo.] Beibele e nea tlhahlo tabeng ye bjalo ka ge e hwetšwa go Ba-Kolose 3:12-14. [Bala.] Ka gona, go nyakega’ng bakeng sa go thabela bophelo bjo bo atlegago bja lapa? Hlokomela seo se ngwadilwego ka pukung ye kgaolong e nago le sehlogo se se rego ‘Go Dira Bophelo bja Lapa Gore bo Atlege.’” Bala serapa 3 go letlakala 238 la puku ya Phela ka mo go sa Felego. Ge e ba mong wa ntlo a swaregile goba a sa arabele kapejana, leka go neela makasine wa morago-rago wo o ahla-ahlago ditaba tša lapa goba pampišana ya Thabela Bophelo bja Lapa.

5 Le ka mohla ga re nyake go lahlegelwa ke pono ya morero wa rena wa go nea bohlatse bjo bo tletšego ka Mmušo. (Mat. 24:14) Ka go diriša Beibele kudu le ditokišetšo tše botse tša dipuku tša pušo ya Modimo tšeo re nago le tšona, re ka lebelela ka kholofelo gore Jehofa a re šegofatše go phethagatšeng thato ya gagwe mehleng ye ya makgaola-kgang.—Ba-Gal. 6:9.