Puku Yeo E Neago Tlhahlo Ya Kgonthe

1 Lefase le fetogile ka mo go lemogegago ngwaga-kgolong o fetilego. Gaešita lege go bile le ditšwelopele dikarolong tša tša poledišano, tša kalafo le tša dinamelwa, bohlokwa bja bophelo bja lapa bo theogile ka go se kgaotše. Ba dimilione ba itumelela gore ba hlahlwe ke filosofi ya batho yeo e fetogago ka mehla.

2 Sebopegong se sa lefase seo se fetogago ka lebelo, batho ba Jehofa ba holegile kudu ka go kgomarela Lentšu la gagwe. Beibele e dutše nywaga e dikete e sa fetoge, gomme keletšo ya yona e sa dutše e le e holago kudu bakeng sa go lebeletšana le mathata ao re lebeletšanego le ona lehono. Re ka thuša bjang batho bao ba thabelago go lemoga gore Beibele e nea tlhahlo ya kgonthe bakeng sa mehla ya rena ya lehono?

3 Ge e ba o tlogetše pampišana ya “Lebaka Leo ka Lona o ka Botago Beibele” ketelong ya mathomo, o ka boela gomme wa bolela gore:

◼“Ka ge Beibele e bolela ka mo go kwalago gore ke yona molaetša o tšwago go Modimo ka boyena le gore o re nea bophelo bjo bo sa felego ge e ba re dumela le go phela ka seo e se bolelago, na o nagana gore e be e tla ba mo go holago go nyakišiša mo go oketšegilego ka dipolelo tše? [Dumelela tlhaloso.] Ela hloko seo Beibele e se bolelelago pele mabapi le tshepedišo ya gona bjale ya dilo. [Bala 2 Timotheo 3:1-5 ka go lebanya go letlakala 5 la pampišana.] Na o nagana gore tlhaloso ye e swanela lefase lehono? [Dumelela tlhaloso.] Na go na le lebaka le le kwalago la go letela maemo a kaone nakong e tlago?” Ka morago o ka thea motheo bakeng sa ketelo e nngwe ka go ahla-ahla dirapa tše pedi tša mafelelo tša pampišana goba ka go diriša letlakala 161 la puku ya Beibele—Na ke Lentšu la Modimo Goba la Motho?, o gatelela kholofelo e botse yeo Beibele e e swaretšego batho.

4 Ge e ba mong wa ntlo a be a kgahlegela mohola wa kgonthe wa Beibele gomme o hlalositše melao ya motheo e kgethegilego go kgaolo 12 ya puku ya “Beibele—Na ke Lentšu la Modimo Goba la Motho?,” mo gongwe o ka re:

◼“Re kgahlegela dilo tšeo di re holago lehono, na ga go bjalo? Na o be o tla dumela gore go fediša ntwa e tla ba mo go holago? [Dumelela tlhaloso.] Ge e ba batho ba ithutile go phela gotee ka khutšo le ba ditšhaba tše dingwe, se e be e tla ba mathomo a mabotse, na ga go bjalo? [Dumelela karabo.] Beibele e boletše seo e sa le pele. [Bala Jesaya 2:2, 3.] Na o kile wa ipotšiša tsela le nako tšeo se se tlago go direga ka tšona?” Hlalosa gore o tla rata go ahla-ahla potšišo ye ka mo go oketšegilego ka nako yeo e swanelago mong wa ntlo.

5 Ge e ba o tlogetše “New World Translation,” o ka boela gomme wa re:

◼“Ge o bala Beibele yeo ke go tlogeletšego yona, mo gongwe o ka ba o lemogile gore e diriša leina la Modimo leo le mo hlaolago gohle. Ye ke kaonefatšo e bohlokwa yeo e dirilwego go feta diphetolelo tše dingwe tše dintši tša Beibele. Gaešita lege batho ba bangwe ba ka dika-dika go diriša leina Jehofa, re swanetše go dula re gopola gore o utolotše leina la gagwe kgale-kgale gomme a kgothaletša bahlanka ba gagwe gore ba le diriše bakeng sa go mo hlaola e le Modimo wa therešo le yo a phelago. Ela hloko seo mopsalme a se ngwadilego go Psalme 83:18.” Bala temana gomme o dumelele mong wa ntlo gore a hlalose. Go ya ka kgahlego yeo e bontšhwago, o ka diriša tsebišo e oketšegilego yeo e hwetšwago ka tlase ga sehlogo se se rego “Jehofa,” se se thomago go letlakala 204 la puku ya Go Boledišana.

6 Ke Beibele feela yeo e neago tlhahlo yeo motho a e nyakago. (Jer. 10:23) Go ithuta Lentšu la Modimo ke tsela e nnoši ya go ithuta ka merero ya Gagwe le go amogelwa ke Yena. Ka baka leo, anke re laletšeng ba bangwe ka mafolofolo gore ba holwe ke keletšo ya yona e bohlale le temošo ya yona e holago.