Go Bontšha Go Se Bebe Sefahlego Bodireding Bja Rena

1 Petro o itše, “Modimo xa a bebe motho” eupja “ó kxahlwa ke ba ba mmoifaxo, xe ba dira tše di lokilexo.” (Ditiro 10:34, 35) Bodiredi bja rena lehono bo phethwa ka kwešišo e tletšego ya therešo yeo ye e boletšwego ka mo go kwalago. Ka gona, ke gabohlokwa gore re dire boiteko bjohle go fenya lepheko lege e le lefe leo le ka re šitišago go fihlelela motho o mongwe le o mongwe ka ditaba tše di lokilego.

2 Dinakong tša morago bjale, batho ba ditšhaba tše di fapa-fapanego ba ka ba ba hudugetše tšhemong ya phuthego ya lena. Kudu-kudu metseng e megolo, ga se mo go sa tlwaelegago go hwetša batho bao ba bolelago leleme le šele le tee goba go feta. Nakong e fetilego, mašemong a mangwe go ka ba go be go bolelwa Seisemane kudu. Lega go le bjalo, mafelong a mantši ga go sa le bjalo. Gaešita le tšhemong yeo go bego go bolelwa se-Zulu kudu, banababo rena bjale ba gahlana le ma-Tsonga, Mapotokisi, ma-Venda goba batho ba leleme le lengwe. Ke eng seo se ka dirwago go thuša batho ba ka moka go hwetša tsebo ya therešo?

3 Sa pele, rena ka noši re swanetše go ikwa re e-na le boikarabelo ka motho o mongwe le o mongwe yo re gahlanago le yena tšhemong go sa šetšwe morafo wa motho yoo goba leleme. Bagolo, kudu-kudu molebeledi wa tirelo, o tla rata go kgonthišetša gore dihlopha ka moka tša maleme di hlokomelwa ka mo go lekanego bobedi tšhemong le dibokeng tša phuthego.

4 Phuthego e nngwe le e nngwe e swanetše go kgonthišetša gore go dula go e-na le sesola sa dipuku tša maleme ka moka ao a hwetšwago tšhemong ya yona. Bagoeledi le babulamadibogo ba swanetše go swara sesola se senyenyane sa dipuku tše ge ba le bodireding. Mabakeng a mantši, motho a ka kgona go bolela Seisemane goba le lengwe la maleme a mangwe a magolo ao a dirišwago tšhemong. Nakong e fetilego, mo gongwe re ka ba re ile ra akgofela go romela maina a bona le diaterese go Mokgatlo, re kgopela gore motho o mongwe wa leleme la bona a ba etele. Ge e ba go se na phuthego goba sehlopha lefelong leo seo se ka neago bohlatse ka leleme leo le nyakegago, go ka ba go e-na le mogoeledi go e nngwe ya diphuthego tša lefelong leo yo a tsebago leleme le yo a ka etelago. Ge e ba se se sa kgonege, ke ka baka la’ng o sa leke go mediša kgahlego yeo ka bowena? Bagoeledi ba bangwe ba ile ba ithuta leleme le lengwe gaešita le polelo ya diatla e le gore ba thuše motho yo a thabelago go ithuta Beibele. Ge e ba go sa kgonagale go boledišana le motho yoo, boledišana le molebeledi wa tirelo yo a tlago go ikopanya le molebeledi wa motse. Ge e ba go se na yo a hwetšwago yo a bolelago leleme leo gaešita le ka morago ga go boledišana le molebeledi wa motse, banababo rena ba lefelong leo ba swanetše go dira sohle seo ba ka se kgonago go bona gore bohlatse bo a newa. Pukwana ya Thabela Bophelo Lefaseng ka mo go sa Felego! e ipontšhitše e le e thušago kudu ka tlase ga maemo a bjalo.

5 Diphuthegong tše dintši kudu tšhemong ya rena go bolelwa maleme a mantši. Se se ka tšweletša tlhohlo ya kgonthe go bagolo. Ge e ba bao ba bago gona dibokeng tša rena ba ka kgona go nea ditlhaloso ka le lengwe la maleme a magolo, ba swanetše go kgothaletšwa go dira bjalo. Lega go le bjalo, ba bangwe ba bona mo gongwe ba kgona go nea tlhaloso ka leleme la bona feela. Mo go kgonegago e bile go hola, bagolo ba ka rata go rulaganyetša gore thuto ya puku goba gaešita le Thuto ya Morokami e arogilego di swarwe ka leleme leo. Ge e ba ba sa kgone go nea dipolelo tša bona ka le lengwe la maleme a magolo ao a bolelwago phuthegong Sekolong sa Bodiredi sa Pušo ya Modimo, molebeledi wa sekolo a ka rulaganyetša gore ba nee dipolelo sekolong sa bobedi goba sa boraro, mohlomongwe a rulaganyetša gore sekolo ka moka sa bobedi se be ka leleme leo mantšiboeng ao. Se se lebišitše go bopeng diphuthego tša maleme a šele tikologong. Gape re šišinya gore le bontšhe leswaong la dinako tša diboka tša phuthego ya lena gore batho bohle ba a amogelwa dibokeng tša rena, le dira bjalo e sego feela ka leleme le legolo la phuthego eupja gape le ka le tee goba a oketšegilego a maleme a šele ao a bolelwago tšhemong ya lena.

6 Ka go dira boiteko bjo mafolofolo bja go fihlelela batho bohle ka ditaba tše di lokilego go sa šetšwe leleme la bona, re tla be re bontšha lerato la Modimo wa rena, Jehofa yo “a rataxo xore batho bohle ba phološwê ba fihlêlê tsebô [e nepagetšego, NW] ya therešô.”—1 Tim. 2:4.