Lebiša Tlhokomelo Kgahlegong Yeo E Hweditšwego

1 Ge re aba dimakasine tša rena le dipuku tše dingwe tša pušo ya Modimo, re phatlalatša gohle molaetša wo Jesu Kriste a bego a o goeletša. Ka gona re swanetše go dira boiteko bjo bo kgethegilego bja go boela go o mongwe le o mongwe yo a bontšhago kgahlego.

2 Ka dinako tše dingwe mong wa ntlo a ka nyaka go bala dimakasine pele a dira phetho ya ge e ba a nyaka go dira peeletšo goba go se bjalo. Ge e ba o boleletše sehlogo se itšego ka go Phafoga! seo se kgahlišitšego mong wa ntlo, hlalosa dintlha tše di oketšegilego go tšwa sehlogong ge o boela, o thea poledišano ya lena temaneng e tee mohlomongwe le serapeng se tee goba tše pedi. Ge e ba go e-na le kgahlego e tšwelago pele, hlalosa gore Phafoga! e hola lapa ka moka. Tokollo e nngwe le e nngwe e bolela ka dihlogo tše di fapa-fapanego tše bjalo ka tikologo, go ikaonefatša, go lebeletšana le mathata a lehono ka katlego le dipotšišo tšeo di tshwenyago batho ba bafsa. Hlalosa gore e a hwetšagala ka peeletšo le gore a ka amogela ditokollo tše 12 lebaka la dikgwedi tše 12 ka moneelo wa R9,50.

3 Go thwe’ng ge e ba mong wa ntlo a sa kgahlegele le ge e le sefe sa dihlogo tše di lego tokollong ya gona bjale ya Phafoga!? Go e na le go kgaotša poledišano, o ka diriša ka mo go holago sebaka se go ruta mong wa ntlo mo go oketšegilego ka modiro wa Dihlatse tša Jehofa ka go diriša tsebišo e lego go letlakala 155 la puku ya Go Boledišana.

4 Ge e ba nakong e fetilego o sepedišitše tokollo ya “Morokami” ka go diriša 2 Timotheo 3:1-5 le go bolelela tsebišo e lego go letlakala 2 la makasine, ge o boela o ka bolela se se swanago le se:

◼“Poledišanong ya rena ya nakong e fetilego, re ahla-ahlile seo se bolelwago ke se se diregago go re dikologa lefaseng lehono. Batho ba bantši ba bonala ba lahlegetšwe ke kgahlego go Modimo le ditekanyetšo tša gagwe tša go phela bjalo ka ge di hlalositšwe ka Beibeleng. Se se tutueditše kudu kgopolo ya batho ka o mongwe le o mongwe wa bona, bjalo ka ge go hlalositšwe karolong ya 2 Timotheo 3:1-5. Na o nagana gore go na le lebaka le le kwalago la go letela maemo a kaone nakong e tlago?” Ka morago ga go dumelela tlhaloso, o ka lebiša tlhokomelo go 2 Petro 3:13. Ka morago phetla go matlakala 325-31 ka pukung ya Go Boledišana, gomme o gatelele seo Mmušo o tlago go se direla batho.

5 Leetong la go boela, mo gongwe o ka lemoga gore mong wa ntlo ga a nyake go beeletša dimakasine. Mo gongwe o ka rata go leka matseno a go thoma tsejana ya dimakasine:

◼“Ke tla thabela kudu go fela ke go tlišetša ditokollo tša morago-rago tša Morokami le Phafoga! bekeng e nngwe le e nngwe ya bobedi. Na o be o tla rata gore ke dire seo?” Ge e ba mong wa ntlo a dumela, kgonthišetša gore o ngwala maina a gagwe ka botlalo gomme o boe ka potego bekeng e nngwe le e nngwe ya bobedi. Mabakeng a mangwe, ka baka la bokgole goba mathata a mangwe, mo gongwe o ka rata go šišinya gore o tla boela gatee ka kgwedi o swere ditokollo tše tharo. Tsejana ya dimakasine ke tsela e botse kudu ya go dira batho bao ba ka bago ba belaela Dihlatse tša Jehofa go se nene gore ba go bote. Ditsejana tše dintši tša dimakasine di feleleditše ka dithuto tše dibotse tša Beibele.

6 Anke re direng boiteko bjohle bja go boela go bohle bao ba bontšhago kgahlego therešong gomme re ba thuše go tsena tseleng e išago bophelong bjo bo sa felego.—Joh. 4:23, 24.