Fihlelela Pelo Ya Morutwana Wa Gago Wa Beibele
1 Na o nyaka gore morutwana wa gago wa Beibele a diriše seo a ithutago sona? O swanetše go dira bjalo ge e ba a tla holwa ke tsebo yeo a e hwetšago. Gore o tutueletše morutwana wa gago wa Beibele gore a gate mogato, o swanetše go fihlelela pelo ya gagwe. Ka letšatši la Pentekoste ya 33 C.E., polelo ya moapostola Petro yeo e tutuetšago e ile ya “hlaba dipelo” tša batho ba ka bago 3000, bao ba “dumetšexo polêlô ya xaxwe ka xo rata” gomme ba kolobetšwa letšatšing leo. (Dit. 2:37, 41) O ka fihlelela bjang pelo ya morutwana wa gago wa Beibele?
2 Lokišetša Gabotse: O se ke wa leka go akaretša taba e ntši kudu moo go bago le nako e nyenyane ya go boledišana le morutwana ka tsebišo. Swaya e sa le pele dintlha tšeo o tlago go di gatelela gomme o kgonthišetše gore o a kwešiša le gore o ka kgona go diriša ditemana ka mo go holago. Naganišiša e sa le pele ka dipotšišo tšeo di ka rotogago monaganong wa morutwana ka baka la setlogo sa gagwe. Ge e ba o tlwaetše morutwana wa gago gabotse, tsebo ye e tla go thuša gore o lokišetše tsebišo yeo e tlago go mo swanela ka mo go kgethegilego.
3 Ekiša Mokgwa wa Jesu wa go Ruta: Jesu o dirišitše diswantšho go nolofatša dintlha tše thata le go thuša barutwana ba gagwe go kwešiša le go kwa kamoo boemo bo kgomago maikwelo ka gona. (Luka 10:29-37) Ka mo go swanago, o ka gatelela dithuto tše botse pelong ya morutwana wa gago wa Beibele ka go dira gore diswantšho tša gago e dule e le tše bonolo, o di hlama go tšwa dilong tše di tlwaelegilego bophelong gomme o di diriša ka mo go kgethegilego maemong a morutwana.
4 Dipotšišo di thuša ka mo go kgethegilego go fihleleleng dipelo tša barutwana ba Beibele, bjalo ka ge Jesu a bontšhitše gantši. (Luka 10:36) Eupja o se ke wa kgotsofalela ge morutwana a fo bala karabo pukung. Diriša dipotšišo tšeo di hlahlago go lebiša monagano wa gagwe phethong yeo mo gongwe a sa kago a nagana ka yona pele. Gape mokgwa wo o thuša morutwana gore a loutše bokgoni bja go nagana. Botšiša dipotšišo tšeo di nyakago pono ya motho ka noši go bona seo yena ka noši a se dumelago ka taba. Ka morago o ka lemoga dikarolo tšeo go tšona go nyakegago thušo gomme o ka tšwela pele ka thušo e lebanego e nyakegago.
5 Ge e ba morutwana wa Beibele a sa tšwele pele, o swanetše go fatišiša mabaka go yena. Se se ka akaretša go etela ka nako e nngwe ka ntle le ka nako ya ka mehla ya thuto. Ke ka baka la’ng a dika-dika go tšea kgato? Na go na le ntlha e nngwe ya Mangwalo yeo a sa e kwešišego? Na ga a nyake go dira dipeakanyo tše itšego tseleng ya gagwe ya go phela? Ge e ba morutwana wa Beibele a leka go “hlotšetša ka dithokô tše pedi,” mo thuše go lemoga kotsi ya go dira bjalo.—1 Dikx. 18:21.
6 Moapostola Paulo o ile a lemoga gore go ruta batho bao ba thabelago ditherešo tša Beibele ke modiro o phološago bophelo, ka gona o eleditše Bakriste ka moka gore ba ‘lote thuto.’ (1 Tim. 4:16) Bao le ba swarelago dithuto tša Beibele ba swanetše go ithuta se se fetišago feela ditherešo mabapi le Beibele le ditiragalo tša lefase. Ba swanetše go hwetša tsebo e nepagetšego ka Jehofa le Jesu gomme ba thušwe go godiša tswalano e borutho ya motho ka noši le bona. Ke feela ka go dira bjalo moo ba tlago go tutueletšwa go bontšha tumelo ya bona ka mediro. (Jak. 2:17, 21, 22) Ge pelo ya morutwana e fihleletšwe, o tla tutueletšega go latela tsela yeo e tlago go godiša Jehofa gomme ya šireletša bophelo bja gagwe ka noši.—Die. 2:20-22.