Thuša Ba Bangwe Go Ithuta Ka Morwa Wa Modimo, Jesu Kriste

1 December ke kgwedi yeo ka yona ba bantši bao ba ipolelago gore ke Bakriste ba naganago kudu ka Jesu go feta nakong lege e le efe e nngwe ya ngwaga. Ka gona, ke kgwedi e botse ya go sepediša puku ya Motho yo a Phagamego Kudu yo a Kilego a Phela. Ka ntle le pelaelo re tla hwetša beng ba dintlo ba bantši bao ba tlago go thabela go ithuta mo gontši ka Morwa wa Modimo. Re ka dira bjang ge re sepediša puku ye e bohlokwa?

2 Leka go tsena ka go lebanya poledišanong yeo e theilwego Beibeleng yeo e lebišago tlhokomelo go Jesu.

Ka morago ga ge o dumedišitše mong wa ntlo, mo gongwe o ka bolela se se swanago le se:

◼“Lehono re botšiša baagišani ba rena mabapi le seo ba se naganago ge ba bala ka go phela ka mo go sa felego ka Beibeleng ya bona. [Dumelela karabo.] Ke mo go thabišago ka mo go kgethegilego ka gobane Beibele e bolela ka kgonagalo yeo ka makga a ka bago 40. Bophelo bjo bjalo bo ka bolela’ng go rena? Hlokomela seo se bolelwago ke Kutollo 21:4. [Bala.] Na o lemogile seo se holofetšwago? [Dumelela karabo.] Re ka hwetša bjang bophelo bjo bo sa felego?” Bala Johane 17:3 gomme o gatelele bohlokwa bja go ba le tsebo ka Modimo le ka Morwa wa gagwe, Jesu Kriste. Bontšha mong wa ntlo puku ya Motho yo a Phagamego, o diriša dihlogwana tše di lego matsenong gore o fehle kgahlego ya gagwe ka mo go tšwelago pele.

3 Ge e ba mong wa ntlo a sa rate go amogela puku ye e botse, neela ditokollo tša gona bjale tša Morokami le Phafoga! goba pampišana e rego Na Lefase le le tla Phologa? Lebiša tlhokomelo ntlheng e tee goba tše pedi tše kgethegilego ka pukung yeo e sepedišwago. Ithapele go boa ka nako yeo e swanetšego go tla go tšwela pele o ahla-ahla taba le yena.

4 Ge e ba mong wa ntlo a bonala a swaregile, e ka ba bohlale go khutsofatša thero ye e lego ka mo godimo. Bagoeledi ba bafsa le bona ba ka hwetša thero e latelago go le bonolo go e diriša.

Ka morago ga ge re itsebišitše, re ka re:

◼“Lehono re botšiša baagišani ba rena mabapi le seo ba se naganago ge ba bala ka ga go hwetša bophelo bjo bo sa felego ka Beibeleng ya bona. Ka mohlala, ela hloko seo Jesu a se boletšego go Johane 17:3. [Bala.] Bakeng sa go thuša batho go ithuta mo gontši ka Jesu Kriste le seo a se rutilego, go ile gwa gatišwa puku ye.” Phetla puku ya Motho yo a Phagamego go tše dingwe tša diswantšho tše di botse. Phetla matseno ke moka o bale serapa sa bobedi ka tlase ga sehlogwana se se rego “Go Holega ka go Ithuta ka Yena.” Botša mong wa ntlo gore a ka hwetša puku ye ka moneelo wa R9,00.

5 Ge e ba o sepediša puku, thea motheo wa thuto ya Beibele ka go ithapela go ahla-ahla kgaolo ya pele e rego, “Melaetša e Tšwago Legodimong,” ka nako yeo goba leetong la go boela matšatšing a sego kae ka morago. Go e na le go botša mong wa ntlo nako e beilwego yeo e swanetšego go tšewa ketelong e latelago, e-fo bolela gore ka metsotso e sego kae feela, a ka ithuta tsebišo e ntši e kgahlišago ka Jesu Kriste go tšwa Lentšung la Modimo, Beibele.

6 Eka ka moka ga rena re ka diriša sehla se sa maikhutšo sa lefase go lebiša tlhokomelo therešong e lego mabapi le Morwa wa Modimo, Jesu Kriste, e le gore re thuše ba bangwe go tsena tseleng e išago bophelong bjo bo sa felego.—Mat. 7:14.