Lentšu La Mmušo—Go Hwetša Kwešišo Ya Lona
1 Seswantšhong sa gagwe sa mobjadi, Jesu o boletše gore peu e welago “mmung-o-botse” e be e swantšhetša “e a kwaxo Lentšu a kwešeša.” (Mat. 13:23) Ka morago ga go kwa ka Mmušo, na re ile ra “kwešeša”? Mmušo o tutuetša maphelo a rena gakaaka’ng? Na re etišitše dikgahlego tša Mmušo pele, ka go rialo ra bontšha gore re kwešišitše molaetša?
2 Kwešišo e nepagetšego ya molaetša wa Mmušo e nyaka thuto ya motho ka noši. Re swanetše go tšea nako re naganišiša ka dijo tša moya tšeo re di newago. Go bala Morokami ka go akgofa go swana le go phaka dijo tše monate le tše di nago le phepo. Na o ipha nako ya go naganišiša ka dijo tša moya ka botlalo? E le gore go hwetšwe mohola o mogolo kudu, go swanetše go be le tutuetšo le kganyogo ya dijo tša moya tše di nago le phepo. Ge e ba tše di hlaelela, mediro e mengwe e ka nyenyefatša mehola ya thuto ya motho ka noši goba ya ja nako e re e nyakago bakeng sa yona. Go kgomarela lenaneo le lebotse la thuto ga go bonolo. Gaešita le ge go nyakega go ba šedi go leka-lekanya dilo tše di tlago pele, mahumo a moya ao a tlago go hwetšwa ke a bohlokwa.—Die. 3:13-18; Ba-Kol. 1:27.
3 Pukwana ya Go Hlahloba Mangwalo e re thuša letšatši le letšatši go naganišiša ka dikgopolo tše di nepagetšego le tše di agago tša Mmušo. Bao ba “lemogago dinyakwa tša bona tša moya” ba rulaganyetša go tšea metsotso e sego kae letšatši le lengwe le le lengwe ba bala temana ya letšatši le ditlhaloso. (Mat. 5:3, NW) Ditemana tše dintši di hlalosa dikarolo tše di fapa-fapanego tša Mmušo. Ka mohlala, ka November 22, 1994, temana e kgethilwego e be e le ya Mateo 13:4. Tlhaloso e be e ahla-ahla ka kholofelo ya Mmušo le go re gopotša ka dikotsi tša go gwerana mo go gobatšago le ba leloko le baagišani. Therešo ya gore magaeng a Bethele go dikologa lefase go swarwa poledišano ya metsotso e 15 ya temana ya letšatši mesong ya letšatši le lengwe le le lengwe la mošomo, e gatelela mehola le bohlokwa bja go ahla-ahla temana ya letšatši gotee. Na lapa la gago le akaretša poledišano e swanago mokgweng wa lena wa ka mehla?
4 Ge o dutše o godiša tebogo ya gago ka Mmušo, go tla ba le tutuetšo e kgolo ya go rata go abelana molaetša wa Mmušo le ba bangwe. Morokami le Phafoga! di nea seo se ka swantšhwago le sebešeletši sa mogopolo seo se fepago menagano ya rena ka tsebišo e mpsha le e lego nakong. Di re thuša go dula re hlokometše ka mo go feletšego tekanyo yeo ka yona lefase le nyakago Mmušo wa Modimo. Di re thuša gore re be batho ba moya, bao ba ‘nago le kelelo ya Kriste.’ (1 Ba-Kor. 2:15, 16) Tše ka moka di ka matlafatša kholofelo ya rena le go oketša phišego ya rena ya go rata go abelana kholofelo ya Mmušo le ba bangwe.—1 Pet. 3:15.
5 Ke gabohlokwa gore rena ka noši re kwešiše molaetša wa Mmušo. Mmušo ke tsela yeo Modimo a tlago go e diriša go phagamiša bogoši bja gagwe, a fediše bokgopo gomme a tliše lefase le lefsa—e lego paradeise. Jesu o re laetše gore re o etiše pele maphelong a rena. Gore re tle re phele ka tlase ga pušo ya wona, re swanetše go ba balata ba ba swanago le dinku. (Mat. 6:10, 33) Diriša sebaka sa gago ka mo go tletšego gore o thabele ditšhegofatšo tša wona.