‘Go Dira go Gontši Modirong wa Morena’
1 Ruri re na le lenaneo le le tletšego la mediro ya pušo ya Modimo yeo re ka lebelelago pele go yona ka April le May! Ka April 14 re tla bina monyanya wa Segopotšo sa lehu la Kriste. Batho ba bantši ka mo go kgonegago ba swanetše go kgothaletšwa go ba gona bakeng sa tiragalo yeo e bohlokwa: bo-rakgwebo bao re ba tsebago, ba leloko bao e sego badumedi, bao re tsenago le bona sekolo, batho bao ba sa tšwago go thabela le barutwana ba Beibele. Ngwala lelokelelo la bao o rulaganyago go ba laletša e le gore go se be le ba ba tlogelwago.
2 Bekeng e latelago yeo re tla kgothaletša bohle bao ba bilego gona Segopotšong gore ba tlo kwa polelo e kgethegilego ya phatlalatša ka April 23, e theilwego tabeng e rego “Bofelo bja Bodumedi bja Maaka bo Kgaufsi.” Go holofelwa gore bontši bja bao ba thabelago bao ba kwago molaetša wo o lebanyago ba tla bona bohlokwa bja go kopanela le phuthego ka mehla, e sego feela ditiragalong tše kgethegilego.
3 Pampišana e Kgethegilego ya Kingdom News yeo e Tlago go Lokollwa: Karolo e kgahlišago kudu ya seboka ka April 23 e tla ba go lokollwa ga pampišana e lego nakong ya matlakala a mane ya Kingdom News No. 34 yeo e tlago go phatlalatšwa gohle go fihla ka May 14. Na ga o dumele gore go tla ba le ‘go gontši mo go dirwago modirong wa Morena’ sehleng se sa Segopotšo?—1 Ba-Kor. 15:58, NW.
4 Sesola sa pampišana ya Kingdom News se tla romelwa phuthegong e nngwe le e nngwe. Mapokisi ao a swerego dipampišana tša Kingdom News a swanetše go bolokwa lefelong le le šireletšegilego gomme ga se a swanela go bulwa go fihlela lenaneo le fela ka April 23. Ka nako yeo pampišana ya Kingdom News e tla hwetšagala bakeng sa go phatlalatšwa go banababo rena le go batho bohle. Bofelong bja diboka tša phuthego, dikopano tša tikologo goba mananeo a letšatši le le kgethegilego la kopano ka April 23, yo mongwe le yo mongwe wa bao ba lego gona o tla amogela kopi e le gore ba ka tlwaelana le dikagare tša yona gomme ba hlamelwa go phatlalatšwa ga yona.
5 Bagolo ba tla ba le go Gontši mo ba Swanetšego go go Dira: E sa le ka pela kgweding ye sehlopha sa bagolo se swanetše go kopana bakeng sa go boledišana ka ditaba ka botlalo tša lesolo le le kgethegilego. Diphuthego di swanetše go ikemišetša go akaretša tšhemo ya tšona ka moka yeo di e abetšwego. Pele lesolo le fela, dirang boiteko bjo bo kgethegilego bja go šoma mašemo ao a sego a akaretšwa dikgweding tše tshela tše di fetilego. Ka baka la bohlokwa bja modiro, re tla rata go beela ka thoko nako e oketšegilego ka mo go ka kgonegago bakeng sa bodiredi. Ga go na pelaelo gore bagoeledi ba oketšegilego go feta mehleng ba tla ngwadiša bjalo ka babulamadibogo ba go thuša. Mohlomongwe barutwana ba bantši ba Beibele le bona ba tla ba ba re tlatša e le bagoeledi ba sa tšwago go amogelwa ba ba sa kolobetšwago. Re tla ba le nako e thabišago gakaakang ge re dutše re šoma gotee ka thata modirong wa Morena!
6 Baswari ba Thuto ya Puku ya Phuthego ba swanetše go dira dithulaganyo tše di tsepamego bakeng sa go nea bohlatse ka sehlopha ka Mekibelo le ka Disontaga. Yo mongwe le yo mongwe o swanetše go kgothaletšwa go tšea karolo ka mafolofolo. Go tlaleletša modirong wa mafelo-bekeng, go nea bohlatse mantšiboa go swanetše go rulaganywe bonyenyane gatee ka beke nakong ya lesolo. Ba bangwe ba ka rata go kopana bakeng sa tirelo ka morago ga sekolo e le gore ba akaretše barutwana bao ba tlago go rata go tšea karolo ka mo go oketšegilego.
7 Diboka tša tirelo ya tšhemo di swanetše go rulaganywa e le gore bagoeledi le babulamadibogo ba ka thoma ka pela bodireding letšatši le lengwe le le lengwe. Diboka tše e swanetše e be tše kopana. Se sengwe le se sengwe se swanetše go bolelela thero e bonolo ya pampišana ya Kingdom News. Diboka tša thapama bakeng sa tirelo di ka akaretša tšhišinyo e tee goba tše pedi tša go dira maeto a go boela go bao ba amogetšego pampišana ya Kingdom News. Lega go le bjalo, bagoeledi ba bangwe ba ka rata go kopanela kabong ya yona bobedi mesong le thapama. Go fihlelela seo, molebeledi wa tirelo o tla rata go kgonthišetša gore tšhemo e lekanego e a hwetšagala. Leina le aterese tša yo mongwe le yo mongwe yo a bontšhago kgahlego di swanetše go ngwalwa pegong ya ntlo le ntlo. Dintlha tše kgolo tša poledišano e kopana di ka akaretšwa karolong ya ditlhaloso. Se se tla kgora tsela bakeng sa leeto la go boela ka morago bekeng goba kgweding.
8 Ge e ba phuthego e thuša e nngwe go akaretša tšhemo ya yona, maina le diaterese tša batho ba ba thabelago di swanetše go newa phuthego yeo tšhemo e lego ya yona.
9 Batswadi, na bana ba lena ba dira maiteko a go ba bagoeledi ba sa kolobetšwago? Go lemogilwe gore diphuthegong tše dingwe, bana bao ba itshwerego gabotse ba ile ba sepela le batswadi ba bona ba ineetšego bodireding ka nywaga e mentši, gomme bana ba dira gabotse le ge e sa hlwa e e-ba bagoeledi ba ditaba tše di lokilego. Batswadi ba swanetše go ela hloko ge e ba bana ba bona ba tloga ba swanelegela tokelo ye. Ba babedi ba bagolo ba ka bolela ditaba ka moka le hlogo ya lapa le go hlahloba ge e ba ngwana a ka balwa e le mogoeledi yo a sa kolobetšwago.—om-SE matl. 99-100.
10 Na go na le bagoeledi le ge e le bafe tšhemong ya phuthego ya lena bao ba se sa hlwago ba le mafolofolo go neeng sehlabelo sa theto go Jehofa? (Ba-Heb. 13:15) Ba bangwe bao ba tapilego ba ka ba ba ile ba fenywa ke manyami goba ke dipelaelo tša bophelo, le ge ba tšwela pele go kgomarela ditekanyetšong tša Beibele tša boitshwaro. Ketelo ya bogwera ya yo mongwe wa bagolo e ka ba dira gore ba boele go kopaneleng ka mehla le phuthego, gomme ka nako e swanetšego ba boele modirong o tsošološitšwego bodireding.
11 Bohle Bao ba Swanelegago ba ka ba le Karolo Modirong wo o Thabišago: Na ba bangwe ba lena bana goba bafsa ba ba lego mahlalagading le hwetša go le thata go kopanela bodireding bja ntlo le ntlo? Go thwe’ng ka lena ba bafsa bao phihlelo ya lena modirong wa boboledi e lego e nyenyane kudu? Le tla hwetša go šoma ka pampišana ye e kgethegilego ya Kingdom News e le mo go thabišago kudu! Thero e bonolo ke sohle se se nyakegago.
Mo gongwe o ka bolela selo se se swanago le se:
◼ “Kgweding ye re phatlalatša molaetša o bohlokwa dinageng tše 232 go dikologa lefase. Molaetša ke o bohlokwa ka gobane o re nea mabaka a tiilego a go dumela gore go na le tharollo mathateng a re lebeletšanego le ona lehono. Re tla rata gore o be le kopi ya gago ka noši.”
Goba o ka leka se:
◼ “Kgweding ye baithapi ba e ka bago ba dimilione tše hlano ba phatlalatša molaetša o bohlokwa ka maleme a mantši. O lokišeleditšwe batho bao ba ratago go bona go fela ga mathata ao ka moka ga rena re lebanago le ona lehono. Ye ke kopi ya gago ka noši.”
Mohlomongwe thero ye e bonolo e ka go swanela:
◼ “Re kgothaletša yo mongwe le yo mongwe go bala molaetša wo o bohlokwa wo o nago le sehlogo se se rego [bala sehlogo sa pampišana ya Kingdom News]. Hlokomela seo e se bolelago mo go letlakala 2 mabapi le mathata a oketšegago a . . . [bala lefoko le le kgethilwego go tšwa pampišaneng ya Kingdom News]. Re kgodišegile gore o tla thabela go bala molaetša wo wo o lego nakong ka moka. Ye ke kopi ya gago.”
12 Bontšha kgahlego ya motho ka noši go yo mongwe le yo mongwe yo a amogelago pampišana ya Kingdom News. Bolela ka go iketla le ka tsela e kwagalago; ga go nyakege gore o akgofiše thero ya gago. Re nyaka go ba ba ba dirago dilo ka botlalo ge re akaretša tšhemo ya rena le go bona gore ka moka bao ba bontšhago kgahlego ya go bala pampišana ya Kingdom News ba neilwe kopi ya motho ka noši. Ge go se na motho gae, swaya ka kelohloko pego ya gago ya ntlo le ntlo e le gore o kgone go boa ka nako e swanetšego bakeng sa go nea mong wa ntlo pampišana ya Kingdom News. Pampišana ye ya Kingdom News e ka dirišwa go neeng bohlatse seterateng ge motho a thabela go bala taba. Dikopi ga se tša swanela go abja ka go se kgethe bjalo ka ge eke ke dipampiri tša phatlalatšo. Go e-na le moo, batamela mofeta-ka-tsela gomme o hlalose bohlokwa bja molaetša wo o bolelelwago. Diriša pampišana ya Kingdom News go nea bohlatse bjo bo sa rulaganyetšwago, bjalo ka ge o le leetong goba ge o nea bohlatse go bathwalwa-gotee le wena nakong ya lena ya dijo tša mosegare. Bao ba sa kgonego go tšwa ka gae goba bao ba lwalago ka tsela e nngwe ba ka di sepediša go baeng, dingaka le baoki, barekiši le ba bangwe bao ba tlago magaeng a bona.
13 O tla dira maeto a makae a go boela nakong ya lesolo? Ga go na pelaelo gore e tla ba a mantši kudu, ka ge bohle ba ba bontšhitšego kgahlego pampišaneng ya Kingdom News ba swanetše go etelwa gape. Ketelong ya pele, go kaone go nea feela pampišana ya Kingdom News. Ke moka, ge o boela bolela go se nene ka go ba nakong ga pampišana ya Kingdom News. Theetša ka kelohloko ge mong wa ntlo a bolela kgopolo ya gagwe ka seo a se badilego. Ditlhaloso tša gagwe di tla go thuša go tseba seo o tlago go mo nea sona dimakasineng tša morago-rago, mohlomongwe le kamoo o ka lokišeletšago ka gona dipoledišano tše di tšwetšego pele. Ge e ba o hwetša karabelo e botse leetong la go boela, leka go thoma thuto ya Beibele.—1 Ba-Kor. 3:6, 7.
14 “Xo Itapiša xa Lena xa se xa Lefêla”: Na modiro wo ka moka e tla ba o nago le mohola? Paulo o ile a kgonthišetša ba-Korinthe ka gore: “Xo itapiša xa lena xa se xa lefêla Moreneng.” (1 Ba-Kor. 15:58) Maiteko a rena a go phatlalatša pampišana ya Kingdom News a ile a šegofatšwa kudu ka nywaga e mentši. Banyalani ba bangwe bao ba bego ba hudugela foleteng e se nago selo ba ile ba hwetša kopi ya kgale ya pampišana ya Kingdom News ka laiking. E be e le selo se nnoši se se bego se tlogetšwe ka ntlong ka moka. Ka morago ga go e bala, ba ile ba ikopanya le phuthego ya lefelong leo gomme ba kgopela thuto ya Beibele. Ba ile ba thoma go ba gona dibokeng ka moka gomme ka morago ba bontšha kganyogo ya go nyaka go kolobetšwa. Mohlomongwe kopi yeo o e tlogelago e tla tliša mafelelo a swanago!—Bona gape le Awake! ya November 8, 1976, letlakala 15.
15 Re na le mošomo o mogolo kudu ka pele ga rena. Pakane ya rena ke gore phuthego e nngwe le e nngwe e akaretše kabelo ya yona ya tšhemo ka May 14 goba bofelong bja kgwedi ge e ba go nyakega gore go oketšwe nako ya go phatlalatša pampišana ya Kingdom News. Dithomelo di šetše di dirilwe e le gore mmulamadibogo yo mongwe le yo mongwe wa ka mehla le wa go thuša a hwetše dikopi tše 250 tša pampišana ya Kingdom News. Mogoeledi yo mongwe le yo mongwe wa phuthego o tla hwetša mo e ka bago dikopi tše 50. Bagoeledi le babulamadibogo ba swanetše go amogela feela dikopi tša bontši bjo ba tlago go kgona go bo aba gomme ba swanetše go buša le ge e le dife tše di šalago bakeng sa gore ba bangwe ba di diriše. Tirišano e botse tabeng ye e tla kgonthišetša phatlalatšo e kgolo ka mo go kgonegago ya molaetša wo o bohlokwa. Ge e ba ka baka la go ba le kabelo e kgolo ya tšhemo diphuthego tše dingwe di se tša akaretša tšhemo ya tšona bogareng bja May gomme dikopi di sa le gona e ka ba mo go holago go laletša diphuthego tša kgaufsi gore di thuše. Diphuthegong tše dingwe go nyakega mo ga thušo go ka lokišwa phuthegong, ge e ba bagoeledi ba oketša modiro wa bona ka go ngwadiša bjalo ka babulamadibogo ba go thuša goba ba e-ba le karolo gantši kudu bodireding.
16 Go tla nyakega boineelo bja pelo ka moka go Jehofa ge e ba re tla phetha modiro wa rena. (Ba-Kol. 3:23) Maphelo a a akaretšwa. Batho ba ka se kgone go hlokomologa seo se bolelwago ke maemo a lefase lehono. Nako e a fela. Ba swanetše go lebana le therešo ya gore motho ga a na tharollo mathateng a lefase le. Modimo ke yena a nago le tharollo. Bao ba ratago go hwetša ditšhegofatšo tša Modimo ba swanetše go gata mogato o tiilego ka ntle le go dika-dika, ka go dumelelana le ditaelo tša gagwe.
17 Bofelong bja lesolo le le kgethegilego ka May 14, na re tla nyefiša seatla? Aowa! Re tla dula re swaregile ka go dumelelana le keletšo ya Paulo e buduletšwego.