Abang Pampišana Ya Kingdom News No. 35 Ka Mo Go Nabilego 1 October Le November E Tla Ba Dikgwedi Tša Leema-ema Go Rena Ka Moka. Matšatšing A Mathomo A 11 A October, Re Tla Be Re Sepediša Dikopi Ka E Tee Ka E Tee Tša Morokami Le Phafoga! Ke Moka, Go Tloga Ka Sontaga Sa October 12 Go fihla Ka Sontaga Sa November 16, Re Tla Kopanela Kabong Ya Lefase Ka Bophara Ya Pampišana Ya Kingdom News No. 35. E Tla Ba Tokelo Ya Rena Go Iša Molaetša O Bohlokwa Go Batho Ka Moka Lefelong La Gabo Rena. Ke Karabo Potšišong E Rego, “Na Batho Ka Moka Ba Tla Ka Ba Ratana?” Nakong Ya Lesolo Le Le Kgethegilego, Re Tla Aba Pampišana Ya Kingdom News No. 35 Ka Matšatši A Gare Ga Beke. Ka Mafelo-beke, Go Tlaleletša Go Go Neeleng Pampišana Ya Kingdom News, Re Tla Bolelela Ditokollo Tša Gona Bjale Tša Dimakasine.

² Ke Bomang Bao ba Kago go ba le Karolo? Go etša mehleng, bagolo ba tla etelela modiro pele. Yo mongwe le yo mongwe o thabela go aba pampišana ya Kingdom News, gomme ka ntle le pelaelo palo e kgolo ya bagoeledi e tla ngwadiša bjalo ka babulamadibogo ba go thuša kgwedi e tee goba dikgwedi ka bobedi tša lesolo. Bagoeledi ba bangwe ba tla rata go diriša nako e oketšegilego go feta ya mehleng bodireding.

³ Na o na le morutwana wa Beibele yo a šetšego a e-⁠tla kgole ka thuto ya gagwe ya puku ya Tsebo gomme e le yo kgaufsinyane a tlago go swanelegela go ba le karolo tirelong ya tšhemo? Mohlomongwe a ka ba mogoeledi yo a sa kolobetšwago ka nako go ka ba le karolo lesolong la pampišana ya Kingdom News. Se se nyakegago feela ke thero e bonolo bakeng sa go rola pampišana. Ka mohlala, motho a ka re: “Molaetša wo ke wa bohlokwa kudu mo e lego gore o abja lefaseng ka bophara kgweding ye ka maleme a 169. Ke tla rata gore o be le kopi ya gago ya motho ka noši.” Gaešita le bana ba banyenyane ba ka ba le karolo e nago le morero modirong wo o kgahlišago.

⁴ Baswari ba thuto ya puku ba swanetše go kgothatša setho se sengwe le se sengwe sa sehlopha sa bona gore se be le karolo ka mo go tletšego kabong ya pampišana ya Kingdom News No. 35. Gape go ka ba le bagoeledi ba tapilego eupša e le bao ba ka bago mafolofolo gape tirelong ge e ba ba ka amogela kgothatšo e nyakegago. Pele ga lesolo, bagolo ba swanetše go etela yo mongwe le yo mongwe wa ba go bona seo se ka dirwago go ba thuša go sepela gotee le bagoeledi ba ba nago le phihlelo sebopegong se sa bodiredi.

⁵ Re ka Kopana Neng Bakeng sa Tirelo? Modiro wo ka moka o tla nyaka dithulaganyo tša go nea bohlatse ka sehlopha tšeo di swanetšego le tše di šomago. Mo go kgonegago, diboka tša tirelo di swanetše go rulaganywa bakeng sa letšatši le lengwe le le lengwe la gare ga beke, mafelo-bekeng le mantšiboa. Di swanetše go swarwa ka dinako tšeo di tla dirago gore bagoeledi le babulamadibogo ba diriše ka mo go holago kudu nako ya go nea bohlatse. Gape go ka dirwa dithulaganyo tša go kopana mathapama bakeng sa go hola barutwana ba sekolo, bašomi ba ditšhifi le ba bangwe. Molebeledi wa tirelo o swanetše go kgonthišetša gore go tla ba le tšhemo e lekanego ya ntlo le ntlo le ya kgwebo e le gore yo mongwe le yo mongwe a ka ba le karolo ka mo go tletšego modirong. Moo go nago le bagoeledi ba bantši lefelong, ba swanetše go diriša bohlale mabapi le gore ke ba bakae bao ba šomago karolo e itšego ya tšhemo.

⁶ Go Thwe’ng ka Bao ba Sego Gona Gae? Re nyaka go bolela ka go lebanya le beng ba dintlo ba bantši ka mo go ka kgonegago go hlalosa lebaka leo ka lona ba swanetšego go bala pampišana ya Kingdom News No. 35. Ka gona ge e ba go se na motho gae ge o etela, ngwala aterese gomme o boe gape ka nako e fapanego ya letšatši. Ge e ba bekeng ya mafelelo ya lesolo maiteko a gago a go ikgokaganya le beng ba ba dintlo a sa dutše a sa atlege, o ka tlogela kopi ya pampišana ya Kingdom News lemating lefelong leo e ka se kego ya bonwa ke bafeti ka tsela. Mafelong a bodulo, phafogelang go nea batho bao ba ka bago ba itshepelela setarateng pampišana ya Kingdom News. Ge le šoma tšhemo e sa abjago, mafelo a magae goba moo go nago le tšhemo e ntši kudu go feta yeo e kago go akaretšwa nakong ya lesolo, go ka tlogelwa kopi ya Kingdom News magaeng ao go sego motho go ona ketelong ya mathomo.

⁷ Boikemišetšo bja Rena ke Bofe? Diphuthego di swanetše go katanela go diriša sesola sa tšona ka moka sa pampišana ya Kingdom News go akaretša tšhemo ya tšona ka moka pele lesolo le fela ka November 16. Ge e ba kabelo ya tšhemo ya phuthego ya gabo lena e le e kgolo kudu gomme e le mo go šireletšegilego go e šoma o le noši go e na le go šoma le modirišani, o ka go hwetša e le mo go holago go dira bjalo. Se se tla le dira gore le kgone go fihlelela batho ba ba swanelegago ba bantši ka mo go ka kgonegago ka ditaba tše di lokilego. (Mat. 10:​11) Mašemong a mangwe e ka ba mo go holago go swara dipampišana tše mmalwa ka seatleng le Beibele ka potleng goba ka sekhwameng, go e na le go diriša mokotla wa dipuku. Kgonthišega gore o boloka pego e botse ya moo kgahlego e bontšhitšwego gona.

⁸ Na o Loketše go Thoma? Bagolo ba swanetše go naganela e sa le pele gore ke dimakasine tše kae tše oketšegilego tšeo phuthego e tlago go di nyaka gomme ba otare ka mo go swanetšego. Phuthegong e nngwe le e nngwe go tla romelwa sesola sa pampišana ya Kingdom News No. 35. Babulamadibogo ba ba kgethegilego, ba ka mehla le ba go thuša ba tla hwetša dikopi tše 250 yo mongwe le yo mongwe wa bona bakeng sa go di aba, mola bagoeledi ba phuthego ba tla abelwa dikopi tše 50 motho ka o tee. Re na le modiro wo re o abetšwego. Na o fagahlela go ba le karolo modirong wo o kgahlišago? Ga go pelaelo gore o fagahlela go dira bjalo. Anke re abeng molaetša wa bohlokwa o theilwego Beibeleng wa pampišana ya Kingdom News No. 35 ka mo go nabilego kudu ka mo go ka kgonegago!