Thuša Batsomi Ba Therešo go Tsoma Modimo
1 Jesu o itše, “Ebangedi e swanetše xo kwatšwa pele dithšabeng ka moka.” (Mar. 13:10) Se se be se bolela gore barutiwa ba gagwe ba be ba tla kopana le batho ba maleme a mantši a fapanego, ditšo le ditlogo tša bodumedi. Se bolela gape gore barutiwa ba gagwe ba mehleng yeno, e lego Dihlatse tša Jehofa, ba na le kabelo ya go ruta batho ba mehuta ka moka. Batho ba dimilione tše dikete ba lefase go tšwa ditlogong ka moka tša bodumedi, ba nyaka tsebo yeo e lego Modimo feela yo a ka e neago—tsebo ya go tseba yena le Morwa wa gagwe, Jesu Kriste.—Die. 2:1-6; Joh. 17:3.
2 Ka ge e le thato ya Jehofa Modimo gore mehuta ka moka ya batho e swanetše go phološwa gomme e hwetše tsebo e nepagetšego ya therešo, ke tokelo go rena go thuša ba bantši ka mo go oketšegilego gore e be bareti ba gagwe. (1 Tim. 2:3, 4) Ka November, re tla kgona go thuša ba bantši Bojakaneng gotee le bao e sego Bakriste le bao ditlogong tša bona ba se nago Modimo go thoma go rapela Jehofa “ka Môya le ka therešô” ka thušo ya puku ya Go Tsoma ga Batho Modimo.—Joh. 4:23.
3 Puku ya Go Tsoma ga Batho Modimo e re thušitše gore re be le kwešišo e kaone ka madumedi a mangwe le histori ya setlogo sa ona. Ke thušo bakeng sa go re thuša go boledišana ka katlego le bohle ba re kopanago le bona. E araba dipotšišo tše makgolo mabapi le ditumelo tša motheo tša madumedi a magolo a lefase. Ke dihlogo dife go tšwa go thušo ye e bohlokwa kudu tšeo re ka di gatelelago bakeng sa go kgothaletša batho ba botegago gore ba ithute mo go oketšegilego ka Modimo?
4 Potšišo e nngwe ya motheo yeo e ahla-ahlwago pukung ka moka ke e rego: Na motho o na le moya o sa hwego wo o phologago lehu gomme wa tšwela pele o phela ka morago ga lehu? Mo e nyakilego e e-ba bodumeding bjo bongwe le bjo bongwe, go rutwa kgopolo yeo ka sebopego se itšego. Dipotšišo tše dingwe tše di ahla-ahlilwego ka pukung šidi: Na go na le lefelo le go thwego ke dihele moo meoya e hlokofatšwago gona? Kholofelo ya kgonthe ya bahu ke efe? Na go na le Modimo o tee goba go na le medimo e mentši? Go ka lebišwa tlhokomelo dipotšišong tše di lego go matlakala 17 le 18 a puku. Gaešita le ge o boledišana le moila-Modimo goba mo-agnostic, tsebišo e lego go letlakala 7, serapa 9, e ka tanya tlhokomelo ya gagwe gomme mohlomongwe ya feleletša ka poledišano e holago.
5 Ke therešo gore bohlale bo swanetše go bontšhwa ka mehla. Ga re thabele go tsoša ngangišano, eupša go e na le moo re nyaka go boledišana le batho. Re na le mabaka ka moka a go fišegela go sepediša puku ye. Ge e ba re tlwaelane le dikagare tša yona gabotse, gona re tla hwetša dibaka tša go tsoša kgahlego ya batho ba botegago bao ba nago le ditlogo tše dintši tša bodumedi. Eka re ka bontšha go fišegela tirelo ye. Batho ka moka ba swanetše go tsoma Modimo le go tsoma go amogelwa ke yena gona bjale. Ditiragalo tša lefase di bontšha gore Haramagedone e tla ka lebelo. Ke nako ya go gata mogato o mafolofolo.
6 Eka re ka phegelela go hwetša batsomi ba therešo gomme re matlafatše tswalano ya bona le Modimo wa therešo. A ka hwetšwa!