Thušang Ba Bangwe Go Hwetša Tsebo E Išago Bophelong
1 Moapostola Paulo o hlalositše gore ke ‘thato ya Modimo gore batho bohle ba fihlele tsebo e nepagetšego ya therešo.’ (1 Tim. 2:4, bapiša le NW.) Re ka thuša ba bangwe bjang go hwetša tsebo yeo? Tsela e nngwe ke ka go dira maeto a go boela go batho bao kgahlego ya bona e ilego ya tsošwa ka puku ya Tsebo e Išago Bophelong bjo bo sa Felego. Puku ye e nea therešo ya Beibele ka mantšu a kwalago, a bonolo le a kgethilwego gabotse. Ka go ithuta yona, batho ba mehuta ka moka ba ka išwa bophelong. Re ka bolela eng se se tlago go kgothaletša ba bangwe gore ba ithute yona le rena?
2 Go bao ba bontšhitšego kgahlego Beibeleng e le tlhahlo e šomago, o ka boela bakeng sa go ithapela go swara thuto, mohlomongwe ka go re:
◼“Ge ke be ke le mo nakong e fetilego, re ile ra ahla-ahla lebaka leo ka lona re ka botago Beibele e le mothopo o šomago wa tlhahlo. Ka go ba ga yona e buduletšwego ke Modimo, Beibele gape ke mothopo o kgonthišeditšwego wa khomotšo le kholofelo, go etša ge yo mongwe wa baapostola ba Kriste a boletše. [Bala Ba-Roma 15:4.] Mafelelong a poledišano ya rena ya nakong e fetilego ke ile ka rotoša potšišo e rego, Rena ka noši re ka holwa bjang ke tsebo e lego ka Beibeleng?” Bala serapa 18 go letlakala 11 ka pukung ya Tsebo. Bontšha gore Dihlatse tša Jehofa di swara dithuto tša Beibele tše ka bago tše dimilione tše hlano lefaseng ka bophara, go thuša batho kae le kae gore ba hwetše tsebo e išago bophelong bjo bo sa felego. Bontšha ka boripana kamoo thuto e swarwago ka gona, o diriša dirapa tša pele tše hlano go kgaolo 1.
3 Ge e ba thapelo e be e le sehlogo seo o se ahla-ahlilego ka lekga la pele le motho yo mongwe, mo gongwe o ka leka matseno a ka boiteko bja go thoma thuto:
◼“Ke holofela gore o thabetše tsebišo mabapi le thapelo yeo re boledišanego ka yona ka pukung ya Tsebo e Išago Bophelong bjo bo sa Felego. Ke holofeditše gore ke tla boa gape le go boledišana le wena kamoo bao ba rapelago Modimo le bona ba ka mo theetšago ka gona. Ela hloko seo se bolelwago go letlakala 158. [Bala serapa 18.] Ka go rialo, ka go ithuta Beibele ka noši, re theetša seo Modimo a se bolelago le rena. Go dira seo go re batametša kgaufsi le yena le go re thuša go lebeletšana le mathata a letšatši le letšatši ao re a rapelelago. Ke tla thabela go ithuta Beibele le wena.” Ge e ba motho a rata, thoma ka kgaolo ya pele ya puku ya Tsebo.
4 Ge e ba o dirišitše matseno a lebanyago bakeng sa go thoma thuto, mohlomongwe o ka bolela se go latelela poledišano ya lekga la pele:
◼“Ke dirile boiteko bjo bo kgethegilego bja go go etela gape ka gore ke be ke nyaka go go botša ka mo go oketšegilego ka lenaneo la rena la thuto e sa lefelelwego ya Beibele. Ke go tlogeletše kopi ya puku ye e rego, Tsebo e Išago Bophelong bjo bo sa Felego yeo e lego thušo ya go ithuta yeo re e dirišago. Ela hloko kamoo e re kgothaletšago ka gona go naganišiša ka Lentšu la Modimo. [Bala serapa 23 go letlakala 22.] Ge e ba o tla kgona go tla le kopi ya gago ya puku, mohlomongwe re ka tšwela pele go ithuta moo re feleleditšego gona nakong e fetilego.” Ge e ba thuto e se ya ka ya thongwa leetong la pele, mo gongwe o ka re: “Mohlomongwe ye e ka ba nako e botse go nna bakeng sa go bontšha kamoo re ithutago Beibele ka gona.” Ka morago ga go ahla-ahla dirapa tše sego kae, rulaganyetša nako e swanetšego ya go boa bakeng sa thuto e latelago.
5 Go diriša puku ya Tsebo ka katlego go tla dira gore re kgone go phatlalatša tsebo e nepagetšego bakeng sa go kgothatša ba bangwe. (Die. 15:7) Tsebo e bjalo e tla tlišetša ba dipelo tše di lokilego lethabo gomme e tla ba tutuetšo e matla go bona bakeng sa gore ba phele ka go dumelelana le go loka ga Jehofa, moo mafelelong go išago bophelong bjo bo sa felego.