Bolelang Ka Temogo
1 Go ba le temogo go nyaka gore re kwešiše selo se sengwe ka batho bao re bolelago go bona. Ka baka la’ng? Ka gobane katlego ya rena ya go fihlelela dipelo tša batho e ithekgile ka bokgoni bja rena bja go neela molaetša wa Mmušo ka mokgwa wo o ipiletšago go bona. Kgweding ya January, re tla be re sepediša puku ya Motho yo a Phagamego Kudu yo a Kilego a Phela ka moneelo wa R10,50. Go tlaleletša ditšhišinyong tšeo di dirilwego ka go Tirelo ya Rena ya Mmušo ya December, mo gongwe o ka rata go leka a mangwe a matseno a latelago.
2 Ka morago ga go itsebiša, mo gongwe o ka bea se se latelago ka mantšu a gago:
◼“Ba bantši ba ile ba ipotšiša gore Jesu e be e le motho wa mohuta mang ge a be a phela e le motho lefaseng le. O nagana gore ke ka ditsela dife a bego a fapana le ba bangwe? [Dumelela karabo.] Puku ye e kgahlišago ya Motho yo a Phagamego Kudu yo a Kilego a Phela, e laodiša dintlha tše bohlokwa tša bophelo le bodiredi bja gagwe, e bile e nea temogo mabapi le mohuta wa motho yo e bego e le yena. Ka morago ga go e bala, ba bangwe ba ikwa eka ba bile le sebaka sa go ba gotee le yena ka boyena, ba tlaišwa le yena gomme ba iponela bodiredi bja gagwe ka mahlo.” Šupa seswantšhong sa pele ka pukung seo se bolelelago sehlogo. Ka morago ga moo phetla matseno gomme o bale serapa sa bobedi ka tlase ga sehlogwana se se rego, “Go Holega ka go Ithuta ka Yena.” Sepediša puku ka moneelo wa R10,50.
3 Mo gongwe o ka rata go diriša thero e swanago le ye:
◼“Thobela. Re be re dutše re boledišana le ba bangwe ba baagišani ka dika tšeo ba bego ba tla rata go di bona mothong yo a bušago ba bangwe. Na nka botšiša ka seka se tee goba tše pedi tše o naganago gore di bohlokwa kudu? [Dumelela karabo. Amogela dintlha. Dumela ge e ba go swanetše.] Na o be o tseba gore Beibele e hlalosa ditshwanelego tša Yo a amogetšwego go ba mmuši wa batho? Ke mo go Jesaya 9:5, 6. [Bala.] O nagana gore go be go tla ba bjang go phela ka tlase ga mmuši yo bjalo?” Dumelela karabo gomme ka morago o lebiše tlhokomelo go Psalme 146:3, 4. Phetla go kgaolo 133 ka pukung ya Motho yo a Phagamego Kudu bakeng sa go tutuetša poledišano e tšwelago pele.
4Diriša Pampišana Bakeng sa go Rola Puku ya Motho yo a Phagamego Kudu: Dipampišana ke tše di thušago kudu go thomeng dipoledišano. Di thuša go tanya tlhokomelo ya beng ba dintlo ka gobane dipampišana di bolela ka ditaba tše di holago tšeo di ba kgomago ka noši.
Ka mohlala, o ka bolela selo sa go swana le se:
◼“Ge re boledišana le batho, re lemogile gore ba bantši ba bolela go tshwenyega ga bona mabapi le . . . [kgetha tiragalo ya morago bjale e lego ditabeng]. Go bonala maemo a lefase a mpefala le go feta. Ba bangwe ba bile ba ipotšiša ge e ba lefase le le ka phologa. O ikwa bjang ka seo? [Dumelela mong wa ntlo gore a arabe. Batho ba bantši ba na le kholofelo.] Ke badile selo se sengwe se se kgothatšago seo ke tla ratago go se abelana le wena. Se ka pampišaneng ye. [Nea mong wa ntlo pampišana ya Na Lefase le le tla Phologa? o dutše o swere pampišana e swanago seatleng sa gago.] Ela hloko kamoo Jesu a porofetilego ka gona gore . . . ” Bala serapeng se se lego go letlakala 4 goba 5 seo se dumelelanago le tiragalo ya morago bjale yeo e boletšwego matsenong a gago. Bontšha mong wa ntlo puku ya Motho yo a Phagamego Kudu. Ge e ba go bonala go swanetše, phetla tsebišong e oketšegilego boporofeteng bja Jesu bjo bo bontšhitšwego go kgaolo 111. Sepediša puku. Gape, kgonthišega gore o rotoša potšišo tabeng e tlago go ahla-ahlwa ge o boela.
5 Temogo e botse e tla re dira gore re kgone go lemoga dinyakwa le dikgahlego tša batho bao re kopanago le bona. Diema 16:23 e re kgonthišetša ka se ge e re: “Pelo ya mohlale e ruta leleme la xaxwe; e atiša thutô molomong wa xaxwe.”