Holwa Ke Sekolo Sa Bodiredi Sa Pušo Ya Modimo Sa 1996—Karolo 2
1 Kapejana ka morago ga go thongwa ga Sekolo sa Bodiredi sa Pušo ya Modimo ka 1943, le lengwe la makala a Mokgatlo le ile la bega gore: “Thulaganyo ye e botse-botse e atlegile ka nako e kopana tabeng ya go thuša banababo rena ba bantši bao ba bego ba nagana gore le ka mohla ba ka se ke ba ba diboledi tša phatlalatša go ba bao ba atlegago kudu sethaleng le bao ba atlegago kudu tšhemong.” Sekolo se tšwela pele go nea tlwaetšo e botse kudu yeo ka moka ga rena re e nyakago.
2 Mmalo wa Beibele: Bao ba abelwago dikarolo tša go bolela ga se bona ba nnoši bao ba holwago ke sekolo. Ge e le gabotse, ka moka ga rena re na le kabelo—mmalo wa Beibele wa beke le beke. Lenaneo la sekolo le bontšha dikgaolo tša Beibele tšeo di swanetšego go balwa beke e nngwe le e nngwe. Go na le dikgopotšo tše dintši tša Mangwalo tšeo di gatelelago bohlokwa bja go bala Beibele letšatši le letšatši. (Još. 1:8; Ps. 1:2; Dit. 17:11) Mmalo wa Beibele o bohlokwa bakeng sa bophelo bjo bobotse bja moya; o fepa monagano le pelo. Ge e ba re bala Beibele bonyenyane metsotso e mehlano ka letšatši, re tla kgona go sepedišana le wona. Mafelelong a ngwaga, re tla be re badile dikgaolo tše di fetago tše 150 tša Lentšu la Modimo. Ge e ba Beibele e dula e le kgaufsi, re swanetše go kgona go bala karolo e itšego ya yona letšatši le lengwe le le lengwe.
3 Polelo ya Tayo: Bakeng sa go tutueletša banababo rena tirelong e botegago le ya phišego, seboledi seo se neelago polelo ya tayo se swanetše go diriša mekgwa e mebotse ya go ruta, se fetiše kwešišo le go aga tebogo ya go leboga Jehofa, Lentšu la gagwe le mokgatlo wa gagwe. Bagolo le bahlanka ba bodiredi ba ka phetha se ka go lokišetša gabotse, ba thea polelo ya bona ka go dumelelana le sehlogo, ba bolele ka kgodišego le go dira gore taba e be e kwalago. (Ba-Heb. 4:12) Ke gabohlokwa gore seboledi se kgomarele nako ya sona e abetšwego. Puku ya ‘Mangwalo ka Moka’ e tletše ka ditemana tša Beibele gomme e nea thulaganyo ya taba e kgahlišago ya Mangwalo yeo e ka re holago moyeng. Puku ya Bagoeledi e na le histori ya mehleng yeno ya mokgatlo wa Jehofa o bonagalago gomme e laodiša ditiragalo maphelong a batho ba kgonthe bao ba bontšhitšego tumelo, phišego, boineelo le lerato. Go na le go gontši mo go ka ithutwago ka bohwa bja rena bja pušo ya Modimo le tsela yeo ka yona Jehofa a šegofaditšego batho ba gagwe mehleng yeno.
4 Dintlha tše Dikgolo tša Beibele: Banababo rena bao ba abelwago kabelo ye ba swanetše go kgetha ditemana tše itšego tšeo di ka dirišwago ka tsela e šomago bakeng sa go hola phuthego. Se se nyaka gore go balwe dikgaolo tše di abetšwego, go naganišišwe ka tšona le go nyakišiša ditemana tše di kgethilwego bakeng sa go hwetša dintlha tšeo di tlago go hlalosa se se bolelwago ke mangwalo ao. Mafelelong a Watch Tower Publications Index, go na le “Scripture Index” yeo e ka thušago go hwetšeng tsebišo mabapi le ditemana tše itšego tša Beibele. Banababo rena ba ba swarago karolo ye ba swanetše go diriša kahlolo e botse gomme ba pheme go tlaleletša ka taba e sa tswalanego. Ga ba swanela go lokišetša taba e ntši go feta yeo e ka akaretšwago ka metsotso e tshelelago.
5 Ka moka ga rena re ka holwa ke Sekolo sa Bodiredi sa Pušo ya Modimo. Se ka re thuša go kaonefatša bokgoni bja rena bja go bolela le bja go ruta. Go diriša tokišetšo ye ka mo go tletšego ruri go tla re thuša go dira gore ‘tšwelopele [ya rena] e bonagale go batho bohle.’—1 Tim. 4:15, NW.