Dula o Šeditše Thuto ya Gago
1 Lenaneo le lefsa la Sekolo sa Bodiredi sa Pušo ya Modimo le tla thoma ka January 1995. Ke eng se sefsa lenaneong? Histori e kgahlišago ya mokgatlo wa Jehofa wa mehleng yeno e tla ba taba e ahla-ahlwago dipolelong tše dintši tša tayo. Mo ngwageng, go tla ahla-ahlwa matlakala a 178 a puku ya Dihlatse tša Jehofa—Bagoeledi ba Mmušo wa Modimo. Ka ge go ka se be le dipotšišo tša poeletšo tša ka morago ga polelo ya tayo e tšwago pukung ya Bagoeledi, re ka dira’ng gore re šetše thuto ya rena le go godiša mehola?—1 Tim. 4:16, NW.
2 Gaešita le ge ba bantši ba šetše ba badile puku ya Bagoeledi, go seka-sekwa ga taba lenaneong la sekolo go tla thuša bohle go leboga ka mo go oketšegilego kudu bohwa bja bona bja pušo ya Modimo. (Ps. 71:17, 18) Ke ka baka la’ng o sa beele nako e itšego ka thoko bekeng e nngwe le e nngwe bakeng sa go bala taba e abetšwego ka pukung ya Bagoeledi?
3 Dipolelo tša Tayo tše di Phelago le tše di Kgahlišago: Dipolelo tša tayo tše di tšwago pukung ya Bagoeledi di swanetše go neelwa ka tsela e phelago le e kgahlišago. Le gona di swanetše go gatelela bohlokwa bja kgonthe bja taba, di e dirišetše go nweletša tlhompho ya go hlompha mokgatlo wa Jehofa le go leboga ditokelo tše re nago le tšona re le bahlanka ba Modimo. Ge e ba lapa le lengwe le le lengwe le le bago gona Sekolong le e-tla le kopi ya puku ya Bagoeledi sebokeng, ditho tša lapa di ka latela polelo ya tayo ka kelohloko kudu gomme tša holwa ke diswantšho tše di lego ka pukung.
4 Mmalo wa Beibele o Šišinyago Kgopolo: Go bala gabotse le go gatelela kgopolo ka mo go swanetšego gotee le maikwelo, ke karolo e bohlokwa ya go ruta ka mo go atlegago. Go oketša moo, tekanyo ya taba e abetšwego yeo e swanetšego go balwa go Polelo No. 2 ga se e kgolo, gomme ka mehla go tla ba le nako e lekanego bakeng sa ditlhaloso tša matseno le tša go phetha tša seboledi. Matseno a swanetše go tutueletša kgahlego tabeng e abetšwego le go lokišetša batheetši go kwešiša mohola wa yona wa kgonthe. Phetho e ka akaretša ditlhaloso le kamoo taba e šomago ka gona, seboledi se diriša nako e abetšwego ka mo go tletšego.
5 Tsebišo e oketšegilego mabapi le lenaneo la sekolo le kamoo dikabelo di tlago go swarwa ka gona, e ka hwetšwa ka go “Lenaneo la Sekolo sa Bodiredi sa Pušo ya Modimo la 1995.” Re šetša thuto ya rena ka go boeletša ditaelo tše di lego tabeng ye, ka go lokišetša dikabelo tša rena gabotse le ka go diriša keletšo yeo re e newago e le gore re kaonefatše bokgoni bja go bolela le go ruta. Ba ba sa hlwago ba ngwadiša sekolong ba kgothaletšwa ka borutho gore ba dire bjalo.