Lokišeletšang Modiro Wa Dimakasine Ka April

Go etša ge go bontšhitšwe go 1996 Calendar ya rena, Selalelo sa Morena se tla binwa lenyaga ka April 2. Re kgothaditšwe ke tiragalo ye e kgolo kudu, anke ka moka ga rena re tšee karolo go abeng dimakasine ka mafolofolo kgweding ya April ka moka. Nywageng e sego kae e fetilego re ile ra thabela Letšatši le le kgethegilego kudu la Dimakasine ka April. Lenyaga April 20 e beetšwe ka thoko. Re tla be re diriša dimakasine tše di lego nakong gakaakang! Morokami wa April 1 o tla lebiša tlhokomelo polelong ya phatlalatša ya kopano ya selete ya ngwagola e rego, “Retang Kgoši ya Bosafelego!” Morokami wa April 15 o tla latela sehlogo sa polelo e kgethegilego ya phatlalatša ya April e fetilego se se rego, “Bofelo bja Bodumedi bja Maaka bo Kgaufsi.” Polelo e kgethegilego e rego, “Go Dula re se na Bosodi Gare ga Moloko o Kgopamego” ya lenyaga ka April 21 e swanetše go nea tutuetšo e oketšegilego. Re tla be re sepediša Phafoga! ya May 8 ka sehlogo se se rego, “Nako Yeo Dintwa di ka se Hlwego di E-ba Gona.”

E le go etša se se dirilwego lesolong la Kingdom News la April e fetilego, April ye e swanetše go ba kgwedi e kgethegilego bakeng sa kabo ya dimakasine. Bjale ke nako ya go dira dithulaganyo. Ba bantši ba tla rata go ingwadiša e le babulamadibogo ba go thuša. Ge e ba go nyakega, dikopi tše oketšegilego tša dimakasine tša April di swanetše go otarwa. Go ka dirwa dithulaganyo bakeng sa Matšatši a Dimakasine, yo mongwe le yo mongwe a tšea karolo ge e ba go kgonega—mesong, mosegare le/goba mantšiboa. Anke ka moka ga rena re be “badiri ba Lentšu.” Go etša ge go boletšwe e sa le pele mabapi le Mesia go Psalme 69:9, eka le rena re ka kgona gore: “Ke llwe ke lehufa ka ’baka la Ngwakô wa xaxo.”—Jak. 1:22; Joh. 2:17.