Dipoledišano Tša Bogwera Di Ka Fihlelela Pelo
1 Poledišano e ka hlaloswa e le “go abelana dikgopolo ka molomo.” Go thoma dipoledišano tša bogwera tabeng yeo e tshwenyago ba bangwe go ka tanya kgahlego ya bona gomme go ka re thuša go fihlelela dipelo tša bona ka molaetša wa Mmušo. Phihlelo e bontšhitše gore ke mo go atlegago kudu go tsenya batho poledišanong ya bogwera le ya go iketla go e na le go ba nea thero feela.
2 Kamoo go ka Thongwago Poledišano ya Bogwera ka Gona: Go ba ga rena ba kgonago go boledišana le ba bangwe ga go bolele gore re swanetše go nea thulaganyo ya dikgopolo le mangwalo e kgahlišago. Go fo bolela go akaretša motho yo mongwe gore a bolele le rena. Ka mohlala, ge re e-na le poledišano ya bogwera le moagišani wa rena, ga se e thata eupša ke ya go iketla. Ga re nagane ka mantšu a rena a latelago, eupša re arabela ka tsela ya tlhago kgopolong yeo a e bolelago. Go bontšha kgahlego ya kgonthe go seo a se bolelago go ka mo kgothaletša gore a tšwele pele a boledišana le rena. Se se swanago e swanetše go ba sa therešo ge re nea bohlatse go ba bangwe.
3 Ditaba tše bjalo ka bosenyi, mathata a bofsa, ditaba tša tikologong, maemo a lefase goba gaešita le boemo bja leratadima di ka dirišwa go thoma dipoledišano tša bogwera. Ditaba tšeo di kgomago maphelo a batho ka go lebanya ke tše di atlegago kudu mabapi le go tsoša kgahlego ya bona. Ge feela poledišano e thomile, re ka e lebiša gabonolo molaetšeng wa Mmušo.
4 Go ba le poledišano e iketlilego ga go bolele gore go lokišetša e sa le pele ga go nyakege. Go a nyakega. Lega go le bjalo, ga go nyakege gore go hlangwe thulaganyo e sa feto-fetogego goba go swara thero ka hlogo, e lego tšeo di tla feleletšago ka poledišano yeo e sa feto-fetogego goba yeo e sa dumelelanego le maemo ao go lebanwago le ona. (Bapiša le 1 Ba-Korinthe 9:20-23.) Tsela e botse kudu ya go lokišetša ke go kgetha taba e tee goba tše pedi tša Mangwalo ka tebelelo ya go thea poledišano go tšona. Go hlahloba ditaba tše di hwetšwago pukung ya Go Boledišana go tla ipontšha e le mo go thušago go se.
5 Dika tše Bohlokwa tša Poledišano ya Bogwera: Ge re boledišana le ba bangwe, re swanetše go ba ba borutho le ba botegago. Go myemyela le ponagalo ya go thaba di thuša go bonagatša dika tše. Re na le molaetša o kaone-kaone lefaseng; ke wo o ipiletšago go ba dipelo tše botegago. Ge e ba ba ikwa gore kgahlego ya rena go bona e tutuetšwa ke kganyogo ya kgonthe ya go abelana le bona ditaba tše dibotse, gona ba ka tutueletšega gore ba theetše.—2 Ba-Kor. 2:17.
6 Go akaretšwa poledišanong e swanetše go ba phihlelo e kgahlišago. Ka baka leo, re swanetše go ba botho le go ba bohlale ge re neela molaetša wa Mmušo. (Ba-Gal. 5:22; Ba-Kol. 4:6) Katanela go tlogela motho yo mongwe a e-na le pono e swanetšego. Ka tsela ye, gaešita le ge e ba re sa atlege mathomong go fihlelela pelo ya gagwe, mo gongwe e ka ba yo a arabelago kudu nakong e tlago ge Hlatse e boledišana le yena.
7 Go thoma poledišano ya bogwera ga se mo go bakwago ke go kgona thero e raraganego. E fo ba taba ya go tsoša kgahlego tabeng yeo e kgomago motho. Ge feela re lokišeditše e sa le pele, gona re tla be re loketše go tsenya batho poledišanong ya bogwera. Anke re kataneleng go fihlelela dipelo tša bao re kopanago le bona ka go abelana le bona ditaba tše dibotse kudu tšeo di ka hwetšwago, e lego tša ditšhegofatšo tše di sa felego tša Mmušo.—2 Pet. 3:13.