Letlolo La Dipotšišo

◼ Ke ka baka la’ng re swanetše go bega modiro wa rena wa tirelo ya tšhemo ka nako kgwedi e nngwe le e nngwe?

Ka moka ga rena re ikwa re thabile ge re e-kwa ka dilo tše dibotse tše di phethilwego go boleleng molaetša wa Mmušo. (Bona Diema 25:25.) Ditiro 2:41 (PK), e bega gore ka morago ga polelo ya Petro e tutuetšago letšatšing la Pentekoste, ‘go ile gwa ekeletšwa batho ba e ka bago ba dikete tše tharo.’ Nakwana ka morago palo yeo e be e oketšegile go fihla go ‘ba e ka bago ba dikete tše hlano.’ (Dit. 4:4, PK) Dipego tšeo di swanetše go ba e ile ya ba tše di thabišago gakaakang go Bakriste ba lekgolong la pele la nywaga! Re arabela ka tsela e swanago dipegong tše kgothatšago lehono. Re thabišwa ke go kwa ka katlego yeo banababo rena ba bago le yona go boleleng ditaba tše di lokilego lefaseng ka bophara.

Ka ge go akaretšwa nako e ntši le boiteko go kgoboketšeng dipego tše bjalo, go nyakega tirišano ya mogoeledi yo mongwe le yo mongwe wa Mmušo. Na o yo a šetšago mabapi le go tliša pego ya gago ka nako kgwedi e nngwe le e nngwe?

Dipego tša koketšego di re tlišetša lethabo le legolo. Go oketša moo, dipego di thuša Mokgatlo go ela hloko tšwelopele ya modiro wa lefase ka bophara. Go swanetše go dirwa diphetho ge e le mabapi le moo thušo e oketšegilego e ka bago e nyakega gona goba mohuta wa dipuku tšeo di swanetšego go tšweletšwa le tekanyo ya tšona. Bagolo phuthegong e nngwe le e nngwe ba diriša dipego tša tirelo ya tšhemo go bona moo go ka kaonefatšwago gona. Dipego tše dibotse ke tše di agago, tšeo di re tutuetšago ka moka ga rena gore re hlahlobe bodiredi bja rena ka noši bakeng sa dikaonefatšo tše di ka dirwago.

Bagoeledi ka moka ba swanetše go lemoga boikarabelo bja bona e le batho ka o tee ka o tee bja go tliša pego ya tirelo ya tšhemo ka nako kgwedi e nngwe le e nngwe. Baswari ba Thuto ya Puku ya Phuthego ba boemong bjo bobotse bja go gopotša bagoeledi ka boikarabelo bjo, ka ge ba bile ba phafogela go nea thušo ya motho ka noši go bao mo gongwe ba ka bago ba e-na le bothata bja go kopanela tirelong ya tšhemo ka mehla kgwedi e nngwe le e nngwe. Kgopotšo ye e ka newa thutong ya mafelelo ya puku kgwedi e nngwe le e nngwe goba nakong e nngwe e swanetšego. Ge e ba go se na sebaka sa go tliša dipego tša tirelo ya tšhemo Holong ya Mmušo, moswari wa Thuto ya Puku ya Phuthego a ka di kgoboketša gomme a kgonthišetša gore di newa mongwaledi ka nako e le gore di akaretšwe le pego ya ka mehla ya phuthego ya kgwedi le kgwedi yeo e yago go Mokgatlo.

Phišego ya rena go begeng ka potego modiro wa rena wa tirelo ya tšhemo ka nako e dira gore morwalo o be bohwefo go bao ba ikarabelago ka go phela gabotse ga rena moyeng.