E-ya Ka Mehla Tirelong Ya Tšhemo

1 Na re gata megato e nepagetšego ya go tšea karolo tirelong ya tšhemo ka mehla? Na re fagahlela go iša kapejana pego ya rena ya tirelo ya tšhemo Holong ya Mmušo kgweding e nngwe le e nngwe? Ke selo seo ka moka ga rena re swanetšego go katanela go se dira, le ka mohla re se ke ra dumelela gore go fete kgwedi re sa ka ra bolela tumelo ya rena phatlalatša ka tsela e itšego.—Ba-Roma 10:9, 10.

2 Diphuthego tše dintši di sa dutše di e-ba le mathata ka go dira gore bagoeledi ba bege tirelo ya bona kapejana mafelelong a kgwedi e nngwe le e nngwe. Lengwalong la rena la August 15, 1992, re ile ra nea tlhahlo go diphuthego ka moka mabapi le mokgwa o nepagetšego wa go swaragana le dipego tša tirelo ya tšhemo. Re rata go boeletša tše sego kae tša dintlha tše bakeng sa go le hola. Mogoeledi o mongwe le o mongwe o na le tokelo le boikarabelo tša go tsenya pego ya gagwe ya tirelo ya tšhemo ka lepokising le le kgethegilego leo le swailwego “Dipego tša Tirelo ya Tšhemo,” leo le swanetšego go ba gona Holong e nngwe le e nngwe ya Mmušo. Na le be le dutše le latela tlhahlo ye ka potego ga e sa le go tloga ka nako yeo? Ge e ba go le bjalo, re a le reta. Ka gona go thwe’ng ge e ba o lebetše go tliša pego ya gago ka nako?

3 Mathomong a kgwedi e nngwe le e nngwe, mongwaledi wa phuthego o swanetše go nea moswari o mongwe le o mongwe wa thuto ya puku lelokelelo leo le bontšhago bagoeledi bao ba sa begago sehlopheng sa gagwe. Moswari wa thuto ya puku o swanetše go ya kapejana go bagoeledi bao a hwetše dipego tšeo di sa tlišwago gomme a di nee mongwaledi. Thulaganyo ye e swanetše go latelwa kgweding e nngwe le e nngwe go kgonthiša gore dipego ka moka tšeo di šiilwego ke nako di hweditšwe gomme di rometšwe go Mokgatlo. Ka gona dipego tše tše di šiilwego ke nako di tla tsenywa pegong ya kgwedi e latelago. Se se tla bolela gore mogoeledi o mongwe le o mongwe yo a begago ka morago ga nako o tla balwa e le bagoeledi ba babedi kgweding e latelago. Ka tsela ye mogoeledi e ka se be yo a sa begego ka mehla. Le ka mohla o se ke wa kopanya mediro ya dikgwedi tše pedi ya tirelo ya tšhemo pegong e tee, eupja ka mehla tliša pego yeo e arogilego bakeng sa kgwedi e nngwe le e nngwe.

4 Re ka dumelelana bjang le thulaganyo ye ge e ba re tla be re se gona mafelelong a kgwedi? Re ka tsenya dipego tša rena ka lepokising pele re tloga goba re kgonthiše gore re romela pego ya rena ya tirelo ya tšhemo go mongwaledi wa phuthego. Se se swanetše go dirwa e sa le ka pela ka mo go lekanego e le gore e kgone go tsenywa pegong ya phuthego ya kgwedi le kgwedi, yeo mongwaledi a e kgoboketšago gomme a e romela go Mokgatlo ka letšatši la botshelela la kgwedi e nngwe le e nngwe.

5 Ka ntle le go ba bao ba tšwago ka mehla ka borena, re nyaka go phafogela go thuša ba bangwe gore ba be le karolo ka mehla bodireding bja tšhemo. (Ba-Fil. 2:4) Se re ka se dira bjang? Mo gongwe re ka kgona go laletša bagoeledi bao ba sa kolobetšwago bao e lego gona ba thoma bodireding gore ba šome le rena. Thulaganyo yeo e tsepamego ya tirelo e tla thuša go dira gore therešo e be e tsemilwego ka go tia dipelong tša bona.

6 E-ya ka mehla tirelong ya tšhemo. Tliša pego ya gago ya tirelo ya tšhemo ka potego kgweding e nngwe le e nngwe. Thuša ba bangwe gore ba be le karolo ka mehla tirelong. Bontšha ‘go rata mokgatlo ka moka wa barwarre.’—1 Pet. 2:17, NW.