Go Thuša Malapa Go Kgonthišeletša Bokamoso Bjo Bo Swarelelago
1 Ramatlotlo o boditše sehlopha sa dialoga tša kholetšhe gore, “Megabaru e lokile,” gomme a oketša ka gore: “O ka ba le megabaru gomme wa ba wa ikwa o kgotsofetše.” Seo ke mohlala wa kamoo lefase le godišago go ikgahlegela e le tsela ya go kgonthišetša bokamoso bja motho. Ka mo go tlogago go fapane, Jesu o rutile gore Mokriste o swanetše gore “a ikxafê . . . xobane motho xo tlo mo hola’ng xe a ka rua lefase ka moka ’me a senyêxêlwa ke môya wa xaxwe?” (Mat. 16:24-26) Go kgonthišetša bokamoso bjo bo swarelelago, motho o swanetše go thea bophelo bja gagwe ka moka tabeng ya go dira thato ya Modimo—e lego pakane e bohlokwa kudu bakeng sa malapa lehono. (Ps. 143:10; 1 Tim. 4:8) Molaetša woo o bolelwa kgaolong ya mafelelo ya puku ya Sephiri sa Lethabo la Lapa. Puku ye e mpsha e thuša batho gore ba bone seo e tlogago e le sa bohlokwa bophelong le kamoo ba ka gatago mogato ka mo go holago mabapi le malapa a bona. Ge re dutše re tšwela pele go bolela ditaba tše di lokilego kae le kae, ke eng seo re ka se bolelago seo se tlago go kgothatša bao re gahlanago le bona gore ba bale puku ya Lethabo la Lapa? Ditšhišinyo tše dingwe ke tše:
2 Bobedi mojakong le setarateng mohlomongwe o ka leka go diriša pampišana ya “Thabela Bophelo bja Lapa” go thoma poledišano. Mo gongwe o ka botšiša: ◼“Ka baka la ditlalelo ka moka tšeo bophelo bja mehleng yeno bo di tlišago godimo ga rena, na o nagana gore go a kgonega go ba le bophelo bjo bo thabilego e le ka kgonthe bja lapa? [Dumelela karabo.] Pampišana ye e re kgonthišetša gore go a kgonega. Na o tla rata go e bala?” Ge e ba e amogetšwe, o ka tšwela pele ka gore: “Ka ge o e-na le kgahlego tabeng ye, mo gongwe o ka thabela gape le puku ye yeo e neago keletšo e tletšego mabapi le kamoo go ka hwetšwago lethabo ka gona thulaganyong ya lapa.” Bontšha lelokelelo la dikagare ka pukung ya Lethabo la Lapa. Šupa dihlogo tša dikgaolo tše sego kae tšeo di ipiletšago. Phetla go letlakala 10, gomme o bale go tloga lefokong la mafelelo la serapa 17 go ya bofelong bja serapa 18. Sepediša puku ka moneelo wa R4,00. Hlalosa gore o na le go gontši mo o ka go abelanago le yena, gomme o botšiše gore ke neng moo o ka ikopanyago le yena gape.
3 O ka tšwetša pele poledišano ya gago ya mathomo ya mabapi le bophelo bjo bo thabilego bja lapa ka gore: ◼“Ke be ke tla rata go go bontšha selo se sengwe ka pukung yeo o e amogetšego seo ke naganago gore o tla se thabela. Kgaolo ya mafelelo e lebiša tlhokomelo go seo e tlogago e le sephiri sa lethabo la lapa. [Bala serapa 2 go letlakala 183.] Ela hloko gore go šoma gotee go direng thato ya Modimo ke senotlelo. Re eletša gore malapa a ithute Beibele gotee go hwetša seo thato ya Modimo e lego sona le kamoo e ka dirišwago ka gona ka lapeng. Re nea lenaneo la thuto e sa lefelelwego ya Beibele leo le tšeago dikgwedi tše sego kae feela go le fetša. Ge e ba o ka ntumelela, ke tla go bontšha kamoo e swarwago ka gona.” Boa o swere poroutšha ya Ke Eng Seo Modimo a se Nyakago go Rena? goba puku ya Tsebo, le ge e le efe yeo e tlago go ba e swanetšego kudu.
4 Ge o boledišana le bao o tsenago le bona ka klaseng kua sekolong goba bafsa tšhemong, mo gongwe o ka hwetša karabo potšišong ye: ◼“Go bohlokwa gakaaka’ng gore batswadi le bana ba bona ba boloke mekero ya poledišano magareng ga bona e butšwe? [Dumelela karabo.] Hlokomela seo puku ye ya dikgakollo mabapi le bophelo bja lapa e se bolelago ka taba ya ‘Poledišano ya Potego le e Lokologilego.’ [Bala serapa 4 ka moka ga sona le mafoko a mabedi a pele a serapa 5 go letlakala 65 ka pukung ya Lethabo la Lapa.] Dirapa tše di latelago di nea ditšhišinyo tše šomago mabapi le kamoo poledišano e ka kaonefatšwago ka gona ka lapeng. Puku ye e na le sehlogo se se rego Sephiri sa Lethabo la Lapa. Ge e ba o tla rata go e bala, o ka hwetša kopi ye ka moneelo wa R4,00.” Hlalosa gore o tla etela gape ka morago go tlo kwa ditlhaloso tša gagwe mabapi le seo a se badilego.
5 O ka agela godimo ga poledišano ya gago ya mathomo le mofsa yeo e bego e le mabapi le poledišano ya motswadi le ngwana ka go bolela se: ◼“Ke thabetše kgahlego yeo o e bontšhitšego go bohlokwa bja go ba le poledišano e botse ka lapeng. Ke eng seo o ka rego ke taba ya bohlokwa kudu yeo batswadi le bana ba swanetšego go boledišana ka yona?” Dumelela karabo. Ke moka, phetla go letlakala 68 ka pukung ya Lethabo la Lapa, gomme o bale karabo yeo e hwetšwago seripeng sa pele sa serapa 11. “Go ba le thuto ya beke le beke ya Beibele ke tsela e botse kudu ya go hwetša tsebo ya Modimo.” Nea poroutšha ya Ke Eng Seo Modimo a se Nyakago go Rena? Hlalosa gore dithuto tša yona tše 16 di nea kakaretšo ya motheo ya molaetša wa Beibele. Bala matseno ao a lego go letlakala 2, ke moka le ahla-ahle gotee thuto ya pele. Sepediša poroutšha ka moneelo wa R1,20.
6 Ge e ba o gahlana le motswadi modirong wa ntlo le ntlo goba mohlomongwe phakeng goba mabenkeleng, mo gongwe o ka tsoša kgahlego ka gore: ◼“Ke kgolwa gore o tla dumela gore go godiša bana lehono ke tlhohlo ya kgonthe. O nagana gore ke eng yeo e ka šireletšago lapa la gago ditutuetšong tše sa lokago? [Dumelela karabo.] Keletšo e kwagalago yeo ke e thabetšego še.” Laodiša seswantšho seo se lego go serapa 1, gomme o bale serapa 2 go letlakala 90 ka pukung ya Lethabo la Lapa. Hlalosa kamoo e neago tlhahlo e leka-lekanego yeo e šomago e le ka kgonthe go šireletša malapa ditutuetšong tše di senyago. Ithapele go tlogela puku ka moneelo wa R4,00, gomme o itire gore o hwetšagale bakeng sa go araba dipotšišo le ge e le dife tšeo di rotogago.
7 Ketelong ya gago ya bobedi ge o etela motswadi yo a amogetšego puku ya “Lethabo la Lapa,” o ka tšwetša pele poledišano ka tsela ye: ◼“Ge re be re gahlana la mathomo, ke ile ka lemoga gore o tshwenyega e le ka kgonthe ka bana ba gago le gore o nyaka go dira sohle seo o ka se kgonago go ba šireletša ditutuetšong tše di fošagetšego. O ka no ba o se wa hlwa o bala seo, eupša go na le tlhaloso e bohlokwa kudu e bolelwago ka pukung yeo ke go tlogeletšego yona yeo o swanetšego go e bona. [Bala serapa 19 go letlakala 59.] Go hlagolela tswalano le Modimo go nyaka gore re mo tsebe ka go diriša matlakala a Lentšu la gagwe le le ngwadilwego, Beibele. Na o tla rata gore ke go bontšhe kamoo re ithutago Beibele ka gona re le lapa?”
8 Baeletši ba lefase ba ka se ke ba bontšha malapa tsela e išago lethabong, eupša ka ntle le pelaelo ba tla ba tlogela ba nyamile. Anke re abeng ka bophara puku ya Lethabo la Lapa e le gore batho kae le kae ba ka thušwa ke Lentšu la Modimo go kgonthišetša bokamoso bjo bo swarelelago.—1 Tim. 6:19.